...Хөлөгт тоглоомны бяцхан мастерууд буюу хожлын нүүдлийн эзэд хоёрдугаар өрөгт бэлэн болжээ. Ширээний ард “Зөв цагтаа зөв шийдвэр гаргаж чадсан цагт ирээдүй миний гарт” хэмээн өөрийгөө зоригжуулах нэгэн хүү энэ удаагийн тэмцээний хагас шигшээ тоглолтод шалгарсан нь энэ. Тийм ч учраас нүүдэл бүр нь түүнээс хариуцлага нэхэх аж. Учир нь хожил эсхүл хожигдол хүүг хүлээж байна. Харин тэр өнөөдрийг хүртэл энэ спортоор хичээллэхдээ зуу, зуун нүүдлийн ард гарч, ялалт, ялагдал хоёрыг тэнцүүхэн амсаж ирсэн болохоор гагцхүү хожлын төлөө өөрийгөө дайчилж байгаа нь илт. Насанд хүрэгчдийн улсын аварга шалгаруулах 100 буудалт даамын хагас шигшээ тоглолт ийн үргэлжилж байх зуур “Хөлөгт тоглоом” клубын бяцхан тамирчдаас Монголын гэрэлт ирээдүй булангийнхаа энэ удаагийн дугаарыг бэлтгэлээ. 

      Хагас шигшээ тоглолтод шалгарсан 200 гаруй тамирчид насны ангилалгүйгээр оюун ухаанаа сорин өрсөлдөж байлаа. Хожигдох эрхгүй цаг үеийг тэд даван гарч чадвал шилдгүүдийн эгнээнд нэг алхам ойртох аж. Тийм ч учраас зөвхөн хожилд бэлтгэгдсэж ирсэн үе үеийн тамирчид нэгэн өрөг дээр нүүдэл хийж байгаа нь энэ.  Харин үүнтэй зэрэгцэж “Хөлөгт тоглоом” клубээс улсын аварга шалгаруулах тэмцээнд оролцож буй бяцхан тамирчдаа хүлээн сэтгэл нь тогтож ядах эцэг, эхчүүд үүдний хэсэгт сууж байхтай таарлаа. Тэдгээр дундаас тэмцээнд оролцож буй охиноо хожиж байгаа даа гэхээс найдвар тасраагүй нэгэн аав хаалганы цаанаас тэмцээнийг байн байн ажина. “Охин чинь даамтай болчихсон байна. Давуу байдалтай болжээ” гэхэд сая нэг урт амьсгал авч, инээд тодрох тэрбээр охиноо зургаан настайгаас нь даамын спортоор хичээллүүлж, дэлхийн аварга болоход нь ч дэргэд нь байсан гэнэ. “Охиноо тэмцээнд ороход сэтгэл тайван байж чаддаггүй юм. Таван жил дэргэдээс нь холдолгүй дэмжсээр ирлээ. Тэмцээний зааланд эцэг эхчүүдийг оруулдаггүй учраас гаднаас нь юу болж байгаа бол гээд л санаа зовж суудаг. Эцэст нь хожоод гараад ирэхэд нь л сэтгэл тайвширдаг шүү” хэмээн таван жилийн турш амжилт бүртэй нь хамт байжээ. 

СПОРТЫН ДЭД МАСТЕР Ч.ГООМАРАЛ: ГЭР БҮЛ МИНЬ МИНИЙ АМЖИЛТ ГАРГАХ ХАМГИЙН ТОМ ШАЛТГААН 

        Хоёрдугаар өргийн турш тэмцээний заал ажин ялалтын мэдээ хүлээж суусан тэр, өрсөлдөөнөө тэнцлээр дуусгасан охиноо угтан авлаа. Түүний охин спортын дэд мастер Ч.Гоомарал өнгөрсөн оны дэлхийн аварга шалгаруулах тэмцээнээс хоёр алт, нэг мөнгөн медалийн эзэн болж чадсан чамгүй амжилтыг үзүүлжээ. Тэрбээр “Би даамын спортоор таван жил хичээллэж байна. Энэ хугацаанд 2019 оны улсын аварга шалгаруулах тэмцээний хоёр алт, азийн аварга шалгаруулах тэмцээний гурван алт, өнгөрсөн оны дэлхийн аварга шалгаруулах тэмцээнд хоёр алт, нэг мөнгөн медаль хүртсэн. Анх олон улсын тэмцээнд шагналт байранд шалгарч байсан мэдрэмж хамгийн гоё. Энэ болгонд миний гэр бүл надтай хамт байсан. Гэр бүл минь миний амжилт гаргах хамгийн том шалтгаан. Мөн одоогоор спортын мастер цолонд хүрэхэд хоёр бал оноо дутуу байгаа. Тийм болохоор бэлтгэлээ сайн хийж, багшийнхаа заавраар хичээнгүйлэн тоглож чадвал удахгүй цолоо ахиулна. Даамын спорт нь оюуны тоглоом учраас хүнийг их өөрчилдөг гэж боддог. Ялангуяа төвлөрч, тогтвортой сууж сурдаг. Хичээл, сурлагад маань ч ихээр нөлөөлдөг” гэв. Улсын аварга шалгаруулах тэмцээний хагас шигшээ тоглолт ийн үргэлжилж, Гоомарал охинд дахин хоёр өдрийн тоглолт дутуу байв. Хэрэв дараагийн өрөгт өөртөө хожил авчирч чадвал, тэмцээний аварга болоход тун ойрхон иржээ. Тэрхүү амжилтыг аав нь ч мөн хүлээж байгаа нь гарцаагүй байсан юм. 

ЯНЖИНСҮРЭН: ХҮҮГЭЭ ДЭЛХИЙН ИХ МАСТЕР БОЛОХ ХҮРТЭЛ НЬ ДЭМЖСЭЭР БАЙХ БОЛНО

     Үүдний зааланд цүнх үүрч, савтай ус, төрөл бүрийн амттан барьж зогссон аав, ээжүүд хэзээ мөдгүй “Хожчихлоо” гэсээр гарч ирэх хүүхдээ хүлээсээр сэтгэл нь гэгэлзэж ядан байв. Мөн л тэдний дунд хагас шигшээд шалгарсан хүүгээ хүлээх Янжинсүрэн хожлын чимээ чагнан харагдана. Тэрбээр хүүгээ зургаан настай байхад нь “Хөлөгт тоглоом” сургалтын төвд хичээллүүлжээ.  

-Хүүгээ анх даамын спортоор хичээллүүлэх болсон шалтгаан нь юу вэ? 

     -Хүү минь зургаан настай байхдаа даамын спортоор хичээллэж эхэлсэн. Бага байхаасаа л хөдөлгөөнтэй хүүхэд байлаа. Спорт бол хүүхдийг хүмүүжүүлж, төлөвшүүлэх нэг арга барил. Тиймээс би хүүгээ даамын спортоор хичээллүүлэх болсон юм. Түүнээс хойш удаа дараа тэмцээнд амжилттай оролцож, өөрийн гэсэн чадвартай болж эхэлсэн. 

-Хүүгийнхээ анхны амжилтыг нь хэрхэн хүлээж авч байв? 

      -Даамын сургалтанд хичээллэж эхлээд удаагүй байхдаа анхны хүрэл медалиа хүртэж байсан юм. Тэр цаг үеэс хүү минь цаашид илүү их амжилт гаргаж чадна гэдэгт итгэх болсон. Тиймдээ ч санасанаар болж олон уралдаан тэмцээнд байр эзэлж байна даа. 

-Хичээллэж байх хугацаандаа чамгүй амжилтыг гаргаж байсан байх? 

      -Тийм ээ. Хүү минь таван жил энэ спортоор хичээллэхдээ хоёр удаагийн азийн аварга, өнгөрсөн жил дэлхийн аваргын алт, мөнгөн медаль хүртэж байсан. Анх олон улсын тэмцээнүүдээс медаль хүртэхэд нь маш ихээр бахархаж, цаашид илүү их амжилт гаргаасай гэж найддаг болсон доо. Тэмцээн бүрт нь л сэтгэл тогтож чаддаггүй юм. 

-Хүүгээ даамын спортоор хичээллүүлж эхэлснээр ямар давуу талыг олж, анзаарсан бэ? 

     -Хүү минь аливаа зүйлд төвлөрч, харилцаа хандлага нь тогтвортой болж эхэлсэн. Ялангуяа бага насны хүүхэд энэ төрлийн спортоор хичээллэх нь хүмүүжил, төлөвшилд асар их өөрчлөлтийг бий болгодог. 

СПОРТЫН ДЭД МАСТЕР БОЛОР-ЭРДЭНЭ: БИ ИРЭЭДҮЙН ИХ МАСТЕР БОЛНО

        Хөлөгт тоглоомны бяцхан мастерууд буюу хожлын нүүдлийн эзэд хоёрдугаар өрөгт бэлэн болжээ. Ширээний ард “Зөв цагтаа зөв шийдвэр гаргаж чадсан цагт ирээдүй миний гарт” хэмээн өөрийгөө зоригжуулах нэгэн хүү энэ удаагийн тэмцээний хагас шигшээ тоглолтод шалгарсан нь энэ. Тийм ч учраас нүүдэл бүр нь түүнээс хариуцлага нэхэх аж. Учир нь хожил эсхүл хожигдол хүүг хүлээж байна. Харин тэр өнөөдрийг хүртэл энэ спортоор хичээллэхдээ зуу, зуун нүүдлийн ард гарч, ялалт, ялагдал хоёрыг тэнцүүхэн амсаж ирсэн болохоор гагцхүү хожлын төлөө өөрийгөө дайчилж байгаа нь илт. Гэвч түүний өрсөлдөгч олон жилийн хашир туршлага суусан ахимаг насны эрэгтэй тамирчин. Оюун ухааны энэ спорт өрсөлдөөний талбар дээр хэнийг ч үл ялгаж байдаг тод жишээ. Нийтдээ хоёр цагийн турш үргэлжилсэн тэдний өрсөлдөөн тэнцлээр өндөрлөлөө. Хүү өөрийн бүхнээ дайчилж, зөв шийдвэр гаргаж чадсаны эцэст тэмцээнийг тэнцүүлж чадсан юм.

      Түүнийг Болор-Эрдэнэ гэдэг. Спортын дэд мастер цолтой арван нэгхэн настай хүү хөлөгт тоглоомын өрсөлдөөнд өөрийгөө бүтээж яваа нь энэ. Тэрбээр “Би анх даамын их мастер болох зорилгоор л энэ спортыг сонирхсон. Гэхдээ энэ цолонд хүрэхэд их хугацаа, хөдөлмөр шаардана. Дээрээс нь гэр бүл минь намайг зорилгодоо хүрнэ гэдэгт итгэж, тэмцээн болгонд намайг хүлээж байдаг болохоор би шантрахгүй хичээсээр байгаа. Долоо хоногийн гурван өдөр бэлтгэлээ хийж, бусад өдөр хичээлдээ анхаардаг. Даамын спортоор хичээллэж эхэлсэн цагаас хойш хичээлдээ сайн болоод байгаа юм шиг санагдах болсон. Учир нь би тоглож байхдаа олон нүүдлийн цаадхыг тунгааж боддог. Энэ нь надад маш их нөлөөлдөг л дөө” гэлээ. 

    Ирээдүйн их мастеруудын хожлын нүүдэл энэ удаагийн улсын аварга шалгаруулах тэмцээний хоёрдугаар өрөгт ингэж үргэлжилж байлаа. Гагцхүү тэднийг их мастер болох хүсэл мөрөөдөл нь ирээдүйн замд нь хүлээж, харин итгэл тээх аав ээжүүд нь тэмцээнийх нь үүдэнд ийн харуулдан сууж байв.