Монгол Улс 2024 онд Ерөнхийлөгчийн түвшний 15, УИХ-ын даргын түвшний гурав, Ерөнхий сайдын түвшний найман айлчлал хийж, ОХУ-ын Ерөнхийлөгч, БНХАУ-ын дэд дарга тэргүүтэй гаднын төрийн өндөрлөгүүдийг хүлээн авч, гуравдагч хөршийн бодлогоо тэлж, шинэ түншлэлийн харилцаа тогтоосон ажлууд явуулав. Мөн гадаад харилцаагаа эдийн засгийн чиглэлд түлхүү төвлөрүүлж, стратегийн ач холбогдол бүхий улс орнуудтай харилцаагаа өргөжүүлсэн онцгой ач холбогдолтой жил болж өнгөрч байна. Тэгвэл үүнтэй холбогдуулан Эргэлт.мн мэдээллийн сайт дотоодын засгийн өсөлтөд тодорхой хувь нэмэр оруулах, бүс нутгийн болон олон улсын хамтын ажиллагаанд өөрсдийн байр сууриа бататгахад чухал нөлөө үзүүлсэн 2024 онд гаднын оронд хийсэн болон гаднын төрийн өндөрлөгүүдийн хүлээн авсан гадаад харилцааны чухал айлчлал, уулзалтуудыг тоймлон хүргэе.

     Дээр дурдсанчлан Монгол Улс энэ онд Ерөнхийлөгч түвшинд 15, УИХ-ын даргын түвшинд гурав, Ерөнхий сайдын түвшинд найм, Гадаад харилцааны сайдын түвшинд найм айлчлал хийсэн. Түүнчлэн ОХУ-ын Ерөнхийлөгч, БНХАУ-ын дэд дарга нар Монгол Улсад айлчлал хийж, АНУ-тай Стратегийн гуравдагч хөршийн түншлэлийн хүрээнд Гадаад хэргийн сайд нар харилцан айлчилж, ХБНГУ, Казахстан Улсын Ерөнхийлөгч нарын Монголд хийсэн айлчлалын дүнгээр Стратегийн түншлэлийн харилцаа тогтоож, Вьетнам Улстай их бүрэн түнлэлийн харилцаа тогтоох зэргээр хоёр, гуравдагч хөршүүд рүү чиглэсэн айлчлалыг тэнцвэрийн хангасан гадаад харилцаатай жил байсан гэж болно.

     Мөн Ерөнхийлөгчийн ивээл дор “Дэлхийн эмэгтэйчүүдийн чуулга уулзалт”-ыг НҮБ-тай хамтран Улаанбаатар хотод зохион байгуулж, “Тогтвортой хөгжлийн төлөөх Улаанбаатарын тунхаглал”-ыг гаргасан. Тус чуулга уулзалтад 19 улсын төр, засгийн тэргүүн, парламентын дэд дарга, сайд нар, 10 гаруй олон улсын байгууллага, гадаад дотоодын 800 гаруй эмэгтэй манлайлагч оролцсон билээ. Түүнчлэн Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг Улаанбаатар хотод 2026 онд зохион байгуулах бэлтгэлийг хангахад дэмжлэг үзүүлж, нэгдсэн удирдлага, зохион байгуулалтаар хангаж, үйл ажиллагааг уялдуулан зохицуулах чиг үүрэг бүхий Бэлтгэл ажлын албыг Гадаад харилцааны яамны дэргэд байгуулсан юм.

ЕРӨНХИЙЛӨГЧИЙН ТҮВШНИЙ ОНЦЛОХ АЙЛЧЛАЛУУД

Бүгд Найрамдах Узбекистан Улсад хийсэн төрийн айлчлал:

Монгол Улсын Ерөнхийлөгч У.Хүрэлсүх Бүгд Найрамдах Узбекистан Улсын Ерөнхийлөгч Шавкат Мирзиёевийн урилгаар өнгөрсөн зургадугаар сарын 23-26-ны өдөр тус улсад төрийн айлчлал хийсэн. Тус айлчлалын үеэр Ерөнхийлөгч У.Хүрэлсүх Бүгд Найрамдах Узбекистан Улсын Ерөнхийлөгч Ш.Мирзиёевтэй албан ёсны хэлэлцээ хийсэн бөгөөд Сенатын дарга Танзила Нарбаева, Ерөнхий сайд Абдулла Арипов нартай уулзаж, харилцаа, хамтын ажиллагааг өргөжүүлэн хөгжүүлэх, бүс нутаг, олон улсын тавцан дахь хамтын ажиллагааны өргөн хүрээний асуудлаар санал солилцсон юм. Ерөнхийлөгч У.Хүрэлсүхийн Узбекистанд хийсэн айлчлал нь хоёр улсын хооронд 1992 онд дипломат харилцаа тогтоосноос хойших дээд түвшний анхны айлчлал болсон билээ.

Туркменистан Улсад хийсэн төрийн айлчлал:

Ерөнхийлөгч Ухнаагийн Хүрэлсүх Туркменистан Улсын Ерөнхийлөгч Сердар Бердымухамедовын урилгаар өнгөрсөн аравдугаар сарын 10-13-ны өдөр Туркменистан Улсад төрийн айлчлал хийсэн. Айлчлалаар Ерөнхийлөгч У.Хүрэлсүх Туркменистан Улсын Ерөнхийлөгч Сердар Бердымухамедовтай албан ёсны хэлэлцээ хийж, Туркменийн ард түмний үндэсний удирдагч, Туркменистаны Халк Маслахат-ын дарга Гурбангули Бердымухамедовтай уулзаж, хоёр улсын найрсаг харилцаа, хамтын ажиллагааг өргөжүүлэн хөгжүүлэх болон бүс нутаг, олон улсын тавцан дахь хамтын ажиллагааны өргөн хүрээний асуудлаар санал солилцсон байдаг.

ЕРӨНХИЙ САЙДЫН ОНЦЛОХ АЙЛЧЛАЛУУД

Бүгд Найрамдах Хятад Ард Улсад хийсэн ажлын айлчлал:

Монгол Улсын Ерөнхий сайд Л.Оюун-Эрдэнэ өнгөрсөн арваннэгдүгээр сард Бүгд Найрамдах Хятад Ард Улсад ажлын айлчлал хийж, Хятадын олон улсын импортын VII ЭКСПО-д оролцсон. Тухайлбал, ажлын айлчлалын үеэр Ерөнхий сайд Л.Оюун-Эрдэнэ БНХАУ-ын Төрийн зөвлөлийн Ерөнхий сайд Ли Чян нар албан ёсны уулзалт хийж, Шанхай хот болон Жөжян мужийн удирдлагатай уулзаж, санал солилцсон байдаг. Айлчлалаар Монгол Улс “Алибаба” групптай хамтран ажиллаж, Эрдэнэбүрэнгийн усан цахилгаан станц, Гашуунсухайт-Ганцмод боомтын төмөр замын төслүүдийг эхлүүлэх шийдвэрийг баталгаажуулсан.

НҮБ-ын конвенцын Талуудын бага хуралд хийсэн ажлын айлчлал:

Ерөнхий сайд Л.Оюун-Эрдэнэ энэ сарын 1-9-ний өдөр Саудын Арабын Хаант Улсын Эр-Рияд хотноо зохион байгуулагдах Цөлжилттэй тэмцэх тухай НҮБ-ын конвенцын Талуудын 16 дугаар бага хуралд (UNCCD COP16) оролцож, Саудын Арабын Хаант Улс болон Арабын Нэгдсэн Эмират Улсад ажлын айлчлал тус тус хийсэн. Тодруулбал, НҮБ-ын конвенцын Талуудын 16 дугаар бага хуралд тус хурлын дараагийн даргалагчийн хувиар оролцож, цөлжилт, уур амьсгалын өөрчлөлт, газрын доройтлын асуудлаарх Монгол Улсын Засгийн газрын байр суурийг илэрхийлж, үндэсний түвшинд хэрэгжүүлж буй бодлого, үйл ажиллагааг танилцуулахын зэрэгцээ НҮБ-ын Ерөнхий нарийн бичгийн даргын орлогч Амина Мохаммед, Цөлжилттэй тэмцэх тухай НҮБ-ын конвенцын Гүйцэтгэх нарийн бичгийн дарга Ибрахим Тио, НҮБ-ын Хөгжлийн хөтөлбөрийн захирагч Аким Штайнер нартай тус тус уулзаж, харилцаа, хамтын ажиллагааны асуудлаар санал солилцсон. Мөн бага хурлын үеэр болсон Усны дээд түвшний уулзалтад оролцож, Монгол Улсын байр суурийг илэрхийлсэн байдаг.

ГАДНЫН ТӨРИЙН ӨНДӨРЛӨГҮҮДИЙН МОНГОЛ УЛСАД ХИЙСЭН АЙЛЧЛАЛААС ОНЦЛОХ НЬ

Оросын Холбооны Улсын Ерөнхийлөгчийн айлчлал:

ОХУ-ын Ерөнхийлөгч Владимир Путин өнгөрсөн есдүгээр сарын 2-3-ны өдөр Монгол Улсад албан ёсны айлчлал хийсэн. Айлчлалын үеэр Монгол Улсын Ерөнхийлөгч Ухнаагийн Хүрэлсүх, ОХУ-ын Ерөнхийлөгч В.В.Путин нар албан ёсны хэлэлцээ хийж, харилцаа, хамтын ажиллагааны баримт бичгүүдэд гарын үсэг зурах ёслолд оролцсон юм. Түүнчлэн уг айлчлалын хүрээнд Эгийн голын УЦС-ын төслийн Байгаль орчны үнэлгээг эхлүүлэх тохиролцоог хийсэн зэрэг чухал ач холбогдолтой баримт бичгүүдэд гарын үсэг зурсан билээ.

Бүгд Найрамдах Беларусь Улсын Ерөнхийлөгчийн айлчлал:

Бүгд Найрамдах Беларусь Улсын Ерөнхийлөгч А.Г.Лукашенко өнгөрсөн зургадугаар сарын 1-4-ний өдөр Монгол Улсад төрийн айлчлал хийсэн. Тус айлчлал нь хоёр улсын хооронд дипломат харилцаа тогтоосноос хойш Бүгд Найрамдах Беларусь Улсын төрийн тэргүүний түвшинд манай улсад хийж буй анхны айлчлал болсон билээ. Айлчлалын үеэр Монгол Улсын Ерөнхийлөгч У.Хүрэлсүх, БНБУ-ын Ерөнхийлөгч А.Г.Лукашенко нар албан ёсны хэлэлцээ хийж, харилцаа, хамтын ажиллагааг нийгэм, эдийн засгийн олон салбарт өргөжүүлэх талаар  ярилцсан. Түүнчлэн төрийн айлчлалын үеэр талууд “Найрсаг харилцаа, хамтын ажиллагааны тухай Монгол Улс, Бүгд Найрамдах Беларусь Улс хоорондын гэрээ” болон Засгийн газар, байгууллага хоорондын 10 гаруй баримт бичигт гарын үсэг зурсан юм.

Бүгд Найрамдах Казахстан Улсын Ерөнхийлөгчийн айлчлал:

Монгол Улсын Ерөнхийлөгч У.Хүрэлсүхийн урилгаар Бүгд Найрамдах Казахстан Улсын Ерөнхийлөгч Касым-Жомарт Кемелевич Токаев өнгөрсөн аравдугаар сарын 28-29-ний өдөр Монгол Улсад төрийн айлчлал хийсэн. Энэхүү төрийн айлчлал нь Бүгд Найрамдах Казахстан Улсын төрийн тэргүүний түвшинд 2008 онд хийсэн айлчлалаас хойш 16 жилийн дараа хэрэгжиж буй  айлчлал болсон. Харин айлчлалын хүрээнд Ерөнхийлөгч У.Хүрэлсүх Казахстан Улсын Ерөнхийлөгч Касым-Жомарт Токаев нар албан ёсны хэлэлцээ хийж, хоёр улсын өнгөрсөн 30 гаруй жилийн харилцааны ололт, амжилтыг дүгнэн хэлэлцэж, уламжлалт найрсаг харилцааг шинэ шатанд гаргах, хамтын ажиллагааг эдийн засгийн агуулгаар баяжуулан хөгжүүлэх болон олон улс, бүс нутгийн тавцан дахь хамтын ажиллагааг гүнзгийрүүлэн хөгжүүлэх зэрэг өргөн хүрээний асуудлаар санал солилцсон юм. Мөн уг айлчлалаар хоёр улсын харилцааны эрх зүйн үндсийг бэхжүүлж, тээвэр, логистик, хөдөө аж ахуй, мал эмнэлэг, мэдээллийн технологи, соёл, аялал жуулчлал зэрэг салбарын хамтын ажиллагааг өргөжүүлэн хөгжүүлэхэд жинтэй хувь нэмэр оруулах Засгийн газар болон байгууллага хоорондын баримт бичгүүдийг байгуулсан билээ.