-АМИА АЛДСАН ХҮМҮҮСИЙН ТОО 15 МЯНГАД ХҮРЭВ-

Турк, Сирийн хилийн бүс нутагт 7.8 магнитудын хүчтэй газар хөдөлж, гамшгийн хэмжээнд хүрсэн. Хоёр орны Онцгой байдлын алба, холбогдох албан тушаалтны мэдээлснээр гамшгийн улмаас амиа алдсан хүмүүсийн тоо 15 мянгад хүрлээ. Мөн газар хөдлөлтөд бэртэж, гэмтсэн хүний тоо 50 мянга орчим байна. Байгалийн давагдашгүй хүчин зүйлтэй нүүр тулж буй энэ үед олон улс Турк, Сири руу хүмүүнлэгийн тусламж, аврах баг, аврагчдаа явуулж байгаа бөгөөд зарим шүүмжлэгч газар хөдлөлтөд нэрвэгдсэн хоёр орны Засгийн газар бэлтгэл муу, хариу арга хэмжээ удаан авч байгааг шүүмжилж байгаа юм.

                                            Газар хөдлөлтийн голом Турк, Сирийн хилийн орчимд орших Газиантеп хотоос 33 км зайд байгааг холбогдох байгууллагаас тогтоожээ. Хилийн бүсэд анхны чичирхийлэл орон нутгийн цагаар хоёрдугаар сарын 6-ны 04:00 цаг орчимд болж түүнээс хойш давтан 14 удаа чичирхийлсэн аж. Гамшгийн томоохон голомт болсон Газиантеп хотын иргэд, оршин суугчид хотоосоо дайжиж, өөр хот, орон руу явах хүсэж байгаа талаар албаныхан мэдэгдэж байгаа бөгөөд хотоос орох, гарах олон зам хаагдаж, сүйдсэн учир аврах баг, эмнэлгийн тусламж ороход ч хүндрэлтэй байгаа гэнэ.

-ДЭЛХИЙН ОРНУУДЫН ХҮМҮҮНЛЭГИЙН ТУСЛАМЖ БА ГАМШГИЙН ҮЕИЙН УЛС ТӨРИЙН ЭВЛЭРЭЛ-

Байгалийн давагдашгүй хүчин зүйлтэй тулсан Турк, Сирид дэлхийн орнууд гараа сунгаж, хүмүүнлэгийн тусламжаа илгээгээд байна. Тухайлбал, газар хөдөлснөөс хойш 24 цагийн дотор АНУ, Япон, БНСУ-ын эрэн хайх, аврах хүчин Турк, Сирид очсон. Одоогоор газар хөдлөлтийн гамшигт нэрвэгдсэн хоёр оронд хүмүүнлэгийн тусламж үзүүлэхээ зарлаад байгаа орнуудаас Австрали, Хойд Солонгосын мэдэгдэл олны анхаарлыг татаад байна. Австрали Улс Турк, Сирид 10 сая ам.долларын хүмүүнлэгийн тусламж үзүүлж, бүхэл аврах хүчин илгээхээ мэдэгдсэн. Харин Хойд Солонгосын удирдагч Ким Жон Ун өчигдөр газар хөдлөлт болсон хоёр оронд таван сая ам.долларын хүмүүнлэгийн тусламж үзүүлж, 110 аврагч илгээхээ мэдэгдээд байна.

Газар хөдлөлтийн голомт болж, их хэмжээний хохирол амссан нь Турк Улс. Цаг үеийн нөхцөл байдалтай холбоотойгоор тус улсын Ерөнхийлөгч Режеп Тайип Эрдоган газар хөдлөлтийн бүсэд өөрийн биеэр очиж ажиллахаа мэдэгдээд байв. Олон улсын шүүмжлэгчдийн бэлтгэл муу, хариу арга хэмжээ удаан авч байгааг буруушааж, Ерөнхийлөгч Эрдоганыг хариуцлага хүлээх ёстойг зарласан. Харин дээрх шүүмжлэгчдийн саналтай Туркийн гол сөрөг хүчний намын дарга Кемал Киличдароглу санал нийлээгүй бөгөөд “Гамшгийн үед улс төрийн ашиг сонирхлын үүднээс сөрөг кампанит ажил явуулахыг тэвчихгүй” хэмээжээ. Тэрбээр Ерөнхийлөгч Эрдоганд туслан ажиллахаа мэдэгдээд байна.

-ГАЗАР ХӨДӨЛСӨН БҮСИЙН НӨХЦӨЛ БАЙДАЛ-

Туркт газар хөдлөлтийн эхний чичиргээ хоёрдугаар сарын 6-ны 04:17 цагт Кахраманмараш хотод мэдрэгдсэн. Энэ чичиргээ хилийн бүс орчмоор оршдог 10 орчим хотод мөн мэдрэгдсэн байна. Тэгвэл уншигч та бүхэнд газар хөдлөлт болсон бүсэд байсан гурван иргэний яриаг хөрвүүлэн хүргэе.

Кахраманмараш хотын Пазаржик дүүргийн дарга ВЕЙСЕЛ ШЕРВАН: Аврагчид үр дүнтэй ажиллагаа явуулаагүй

“Пазаржик дүүрэгт олон зуун барилга нурж, олон хүн амиа алдсан. Дүүргийн байдал маш муу. Эмч, эмнэлгийн байгууллага, аврагчдын хүн хүч багатайгаас шалтгаалан иргэд өөр өөрийнхөө амийг аварч байна. Миний гэр бүл нурангид дарагдсан. Газар хөдөлсний дараа гадаа гартал нурсан байшингийн нурангинаас нэг хүн гараа гарган аврал эрж байсан. Надтай хамт байсан найз минь танихгүй хүнийг аврах гэж очтол дээрээс нь барилга нурсан. Тэдний хэн нь ч амь гарч чадаагүй. Бид маш хүнд нөхцөл байдалд байна. Гадаа хүйтэн, бороо орж байна. Гамшгаас амьд үлдсэн иргэд орох майхан, асар ч үгүй, халаалтгүй, идэх хоол, уух усгүй. Үнэн хэрэгтээ үр дүнтэй эрэн хайх, аврах ажиллагаа явуулаагүй” хэмээжээ.

Адана хотын иргэн НИЛЮФЕР АСЛАН: Хүү маань “Ээж ээ, үхэх бол нэг газар, хамтдаа үхье” гэсэн

“Газар хөдлөлт болоход эхлээд минут орчим толгой эргэсэн. Би амьдралдаа тийм зүйл харж байгаагүй. Таван давхар барилгаас арай гэж гарсан. Гадаа гараад харахад гэрийн маань ойролцоох 12-14 давхар дөрвөн барилга нурчихсан байсан. Би энэ гамшгаас хамгийн эхэнд хүүгээ л аврахыг хүссэн. Гэтэл хүү маань үнэхээр цочирдчихоод “Ээж ээ, үхэх бол нэг газар, хамтдаа үхье” гэсэн. Хүүгээ тэврээд хаалганы хажууд удаан зогссон. Газар 5-10 минут орчим хөдөлж байгаад намжсан. Амьд үлдсэн иргэд Чукурова эмнэлгийн ойролцоо цугласан. Энд цугласан хүмүүсээс хэн ч юу ч авч ирээгүй. Бүгд л хүйтэнд углааштай байна. Бидний хэн нь гэрийнхээ нуранги руу дахин зүглэж зүрхлэхгүй”.

Эмнэлэгт хэвтэн эмчлүүлж байсан ГӨКЧЭ БЭЙ: Хүнд өвчтэй, тэргэнцэртэй хүмүүс эмнэлгээс гарч чадалгүй дарагдсан

“Би газар хөдлөлт болохоос өмнө Газиантеп хотын эмнэлэгт бөөрний мэс засалд ороод, хэвтэн эмчлүүлж байсан. Газар хөдлөлт эхлэхэд эмнэлгийн өвчтөнүүд анх юу болоод байгааг нь мэдээгүй ч нэгнээ өргөж, босгон зугтсан. Хүнд өвтэй, тэргэнцэртэй хүмүүс эмнэлгээс гарч чадалгүй дарагдсан. Гадагш гарсан бид мөн л өвчтэй ч хүйтэнд углааштайгаа л зогсож байна. Эмч, сувилагчид гарч чадсан хүмүүст чадахаараа л тусалж байгаа. Гэхдээ доргилт бага багаар мэдрэгдсэн хэвээр. Хүн бүр уйлж, хэн нь ч тайвширч чадахгүй л байна.