Долдугаар сарын 17-ны өдөр голын усанд автомашинаа угааж байгаа эмэгтэйн зураг цахим орчинд тархаж, олон нийтийн зүгээс багагүй шүүмжлэл дагуулаад байгаа. Тодруулбал, 4181 УБЦ улсын дугаартай “Тоёото ланд-100” маркийн автомашины жолооч А машинаа голын усанд угааж, гол бохирдуулахгүй байх шаардлага тавьсан иргэнтэй ёс бус харьцсан хэмээн нэгэн иргэн цахим хуудастаа бичсэн юм.

            Бид үүнтэй холбоотойгоор тус автомашины жолоочтой холбогдож, тодруулахад “Эл машин нь миний эзэмшлийн машин. Би орон нутгийн харьяалалтай учраас эхнэрийнхээ эгч болох Б гэж хүний нэр дээр машинаа авч байсан юм. Харин сүүлд төрсөн эгч А-т өгөөд байгаа. Одоохондоо нэрийг нь шилжүүлж амжаагүй байгаа. Би цахим орчинд цацагдсан зургийг харж, эгчтэйгээ холбогдож, тодруулсан. Эгчдээ торгуулийг нь төлж, таны буруу учраас уучлалт гуй гэж хэлсэн. Бидний зүгээс буруу үйлдэл хийсэн тул уучлал хүсэж байгаа. Цагдаагийн байгууллагаас эгчтэй минь холбогдож, 200 мянган төгрөгийн торгууль ногдуулсан байна лээ. Гэхдээ та бүхэн хэт туйлширч болохгүй. Урсгал ус уу, тогтмол уу гэдгийг нь тогтоох хэрэгтэй. Нэг талыг баримталж болохгүй. Хүн шалбааган дээр машинаа угааж болохгүй юу. Бид зохих хэмжээний төлбөрөө төлсөн” гэлээ.