Нийслэлийн дарга нар жил бүр бродюр сольдог. Эвдэрсэн, эвдрээгүй хамаагүй солиод л байна. Хуучныг шинээр солилоо гээд явган хүний зам сайжирсан зүйл ер үгүй. Бөөнөөрөө  хэлхэлдээд алхчих боломжгүй нарийхан гудамжаар нэгнийгээ дайрчих шахсан хэвээр. Хичээлийн шинэ жил эхлэх гэж байхад замын ажлаа дуусаагүй, тоос, шорооноосоо салаагүй байна. Сүүлийн жилүүдэд зам засварын ажлыг дагаад бродюрын асуудал нэлээд газар авах боллоо. Өөрөөр хэлбэл, жил бүр бродюртай холбоотой гомдол санал олон нийтийн сүлжээгээр цацагдаж, олны анхааралд орох болсон. Тиймээс энэ жил нийслэлийн хэмжээнд хэчнээн авто зам засаж, хэчнээн бродюр сольсон талаар сурвалжилсан юм. Хамгийн сонирхолтой нь, автозамынхан өнгөрсөн жил зассан бродюраа энэ жил дахиад л сольдог гэнэ. Учир нь Нийслэлийн Замын хөгжлийн газрынхны  хамаарал бүхий этгээдүүдийн компани ямар ч өрсөлдөгчгүй тендер авч, "Амташсан хэрээ 13 дахина" гэдэг шиг жил бүр автозамын бродюр солих нэрээр мөнгө “идээд” сурчихсан  гэх яриа ч цөөнгүй бий. Тэдний энэхүү мөнгө угаах аргыг хэн ч анзаардаггүй иргэд жил бүр автозам засаж, бродюр сольж байвал сайн гэж боддог. Гэтэл улсын мөнгийг чимээгүй иддэг хамгийн том мафи бол "Бродюр солино" гэх хоёрхон үгний цаана нуугддаг гэх. 

ЗАМЫН ХӨГЖЛИЙН ГАЗРЫН МЭРГЭЖИЛТЭН Б.ГАНБАТ: ЭНЭ ЖИЛ ЗАМ ЗАСВАРЫН АЖИЛД 37.8 ТЭРБУМ ТӨГРӨГ ТӨСӨВЛӨСӨН

Нийслэлийн Замын хөгжлийн газрын ахлах мэргэжилтэн Б.Ганбатаас тодрууллаа. 

-Энэ жил Замын хөгжлийн сангийн хөрөнгөөр хэчнээн байршилд зам засварын ажил хийх төлөвлөгөөтэй байгаа вэ?

-Зам засварын ажилд зөвхөн бродюр солих ажил байдаггүй. Эхлээд бродюраа засаж, тэгшлээд, солихыг нь солиод замынхаа хучилтыг хийдэг. Зам засварын хамгийн эхний ажил бол хашлагаа хуулж, өндөрлөөд хучилтынхаа түвшинд тааруулж хийдэг. Нийслэлийн замын сангийн хөрөнгөөр болон бусад санхүүгийн эх үүсвэрээр зөвхөн бродюр солих ажил төлөвлөгддөггүй. Зам засварын ажилтай уялдаж, хамт хийгддэг. Тэгэхээр олон нийтийн сүлжээгээр иргэдийн бичиж, шүүмжилж буй шиг эвдэрч, хуучираагүй бродюр сольсон асуудал байхгүй. 

-Замын хучилт буюу өндөрт тохируулж, бродюур сольдог гэлээ. Үндсэн стандарт нь ямар байдаг вэ?

-Өнөөдрийн байдлаар Монгол Улсад хашлагийн  8422006 гэсэн стандарт мөрдөгддөг. Үүний дагуу хашлага суурилуулах ажил үргэлжилдэг. Автозамын салбарт 317 төрлийн стандарт мөрдөгдөж байгаа. Үүний 200 гаруй нь олон улсын стандарт үлдсэн нь үндэсний стандарт байдаг. 

-Энэ жил нийслэлийн Замын хөгжлийн газраас 17 байршилд зам засварын ажил хийх төлөвлөгөөтэй байсан. Одоогийн байдлаар хэчнээн байршлын зам засварын ажил үргэлжилж байна вэ?

-15 байршилд хийх ёстой байсан зам засварын ажил бүрэн дууссан. Нэг ажил нь зураг төслийн шатандаа, нөгөөх нь Дүнжингарав худалдааны төвийн урд талын замын хучилтын ажил үргэлжилж байгаа. Нийслэлийн Замын сангийн хөрөнгөөр хийхээр төлөвлөгдсөн ажил 90 гаруй хувьтай байна. Наадмын үеэр зам засврын ажил эрчимтэй хийгдсэн. Замын сангийн хөрөнгөөр хийгдэх ажлаас гадна нэмэлт ажлууд бий. Тэдний засварын ажил эхэлчихсэн байгаа. 

-Замын хөгжлийн сангийн хөрөнгөөр засварлах 17 байршилд хэчнээн төгрөг төсөвлөсөн бэ?

-37.8 тэрбум төгрөгөөр 19.5 километр замын засварын ажлыг хийсэн. 

-Эвдрээгүй хашлагуудыг чулуун хашлагаар сольж байна гэх яриа олны дунд гарсан. Үүнд та ямар тайлбар өгөх вэ?

-Бага тойруугийн чулуун хашлагатай замынн 2011 онд хийж байсан. Энэ жил тухайн байршлын замыг засахдаа хашлагийг нь сугалж, стандартын дагуу өндөрлөөд буцааж суурилиулсан. Тэмдэг, тэмдэглэгээний ажлыг хийж гүйцэтгэсэн. Чулуун хашлага нь бетонон хашлагын бодоход олон жил болдог. 

Энэ жил хэчнээн байршилд чулуун хашлага хийж, замыг шинэчилсэн бэ?

-Тухайн замын хийц, бүтэц, хөдөлгөөний эрчимээс шалтгаалж, зураг төсөл гаргахдаа ямар хучилттай, ямар хашлагатай зам  засварын ажил хийх вэ гэдэг нь батлагдсан зураг төслийн дагуу засварын ажил хийдэг. Энэ жилийн зам засварын ажилд чулуун болон бетонон хашлага ашигласан. 

-Энэ жил зам засвартаа ямар үйлдвэрийн хашлага ихэвчлэн хэрэглэсэн бэ?

-Дотоодын үйлдвэрлэгчид бетонон хашлага үйлдвэрлээд, эрэлт нийлүүлэлтээ хангаж ажиллаж байна. Тэгэхээр дотоодын болон импортоод орж ирсэн аль алиныг нь ашиглаж байгаа. Монголын чулуун бүтээгдэхүүн үйлдвэрлэгчдийн холбоо бий. Тэр холбоо Нийслэлийн авто замын хашлага болон хавтан нийлүүлэх санал гаргаж, тодорхой хэмжээнд хамтран ажиллаж байгаа” гэсэн юм. 

       16:30 ЦАГ: Зам засварын ажил нь өнөөдрөөс эхлэх 32-ын тойргоос 17 дугаар сургууль хүртэлх замаар явлаа. Зам хааж, завсарын ажил эрчимтэй эхлэхээс өмнө засварынхан замын хажуугийн энхэл донхол, нүхийг бөглөж, хог шороог нь цэвэрлэж, хучилт тавихад бэлтгэж байв. Тухайн хэсгийн замыг “Квадровей” ХХК-ийнхан засварлаж байгаа аж. Зам засварын ажлыг хэдий хугацаанд хэрхэн гүйцэтгэх талаар “Квадровей” ХХК-ийн зам засварын ажилтан Н.Аззаяаас зарим зүйлийг тодрууллаа.

-Танай компанийнхан энэ жил зам засварын хэд дэх ажлаа гүйцэтгэж байна вэ?

-Цэцэг төвийн уулзвараас ШУТИС-ийн уулзвар хүртэлх зам засварын ажлыг хийж дуусгасан. Энэ зам манай компанийн хоёр дахь ажил. Энэ зам нэг талдаа 1.5 километр урттай.

-Замын хучилтаас өмнө бродюр сольсон байна?

-Зам засварын ажлаас өмнө орчны цэвэрлэгээ хийж, бродюр солихоос эхэлдэг. Бид замын хучилт хийхэд бэлэн болгоод бродюраа сольчихсон байгаа.

-Чулуун бродюраар зам засварын ажлыг хийсэн байна. Өмнө нь ямар бродюр байсан бэ?

-Бетонон бродюртай зам байсан. Бродюр нь усанд элэгдээд ашиглах боломжгүй байсан тул чулуун бродюраар сольсон. Энэ жил төлийн замуудыг бетонон хашлагыг чулуун хашлагаар сольж байгаа. Одоо бид замын нөхөөс хийж байна гэв. Тэд тухайн замыг засварлахаар  20-уулаа ажиллаж байна. 

АВТОЗАМЫН БРОДЮР ГУРВАН МЯНГАН ТӨГРӨГӨӨР НЭМЭГДЖЭЭ

17:30 ЦАГ:  Өнгөрсөн жилүүдэд хил, гааль хаагдсантай холбоотойгоор барилгын материалын үнэ нэмэгдэж, орон сууцны үнэ тэнгэрт хадсан. Харин бродюрын үнэ хэчнээн төгрөгөөр нэмэгдсэн болохыг  Дарь-Эхийн станцын буудалд байрлах бродюрын үйлдвэр “Сод хараа” ХХК дээр очсон юм. Үйлдвэрийн ажилчид бродюраа цэгцэлж, өрөх ёстой газар руугаа зөөнө. Тэднийх өдөрт захиалга багатай энгийн үед 200 бродюр үйлдвэрлэх боломжтой аж. Тус үйлдвэрийн эзэн "Автозамын бродюр НӨАТ-тай  17500 төгрөгөөр гарна.  Өнгөрсөн жил 14500 төгрөгийн үнэтэй байсан. Энэ жил цемент, гаалийн үнэ нэмэгдсэн. Харин манайх хамгийн боломжийн үнэтэй газар нь шүү дээ. Цементийн үнэ нэмэгдсэнтэй холбоотойгоор үйлдвэр бүр янз бүрийн үнэтэй зарж байна лээ.  Манайх стандартын дагуу боловсруулж МАК-ын цементээр хийдэг. Хөтөлийн цемент цайраад, амархан хагараад байдаг. Харин явган хүний бродюр 2700 , эко хавтан 2800 төгрөгийн үнэтэй” гэв.

ЗАМЫН ХӨГЖЛИЙН ГАЗРЫН МЭРГЭЖИЛТЭН Д.ГЭРЭЛТОГТОХ: ӨВӨЛ ЦАЦДАГ ДАВС, БОДИСУУД БРОДЮРЫГ ЭЛЭЭЖ, ХАМУУРУУЛДАГ УЧРААС СОЛЬДОГ

     Мөн бид Нийслэлийн Замын хөгжлийн газрын Хэвлэл мэдээллийн ажилтан Д.Гэрэлтогтохоос зарим зүйлийг тодрууллаа. “Манайд бродюр солино гэсэн тусдаа ажил байдаггүй. Тухайн замын шинэчлэлтийн явцад хамуурсан буюу элэгдсэн хашлагыг л сольдог. Цас хайлуулахад цацдаг бодис бетонон хашлагыг эвдэж, элэгдүүлдэг. Тийм болсныг нь л сольдог бөгөөд солих шаардлагагүйг нь сольдоггүй. Манай улс ихэнхдээ бетонон бродюр хэрэглэдэг. Тэр нь цас хайлуулах бодис давс цацсантай холбоотойгоор ашиглах хугацаа нь богиносох тохиолдол гардаг" гэв.