Рио Тинто компани 2020 онд үйл ажиллагаа явуулдаг 35 улсад нийт 8.4 тэрбум ам.доллар төлжээ. Энэ өнгөрсөн оныхоос 10 хувиар нэмэгдсэн үзүүлэлт аж. Тус группийн орлогын 90 орчим хувийг бүрдүүлдэг Австрали Улсад 6.8 тэрбум ам.долларын татвар төлсөн бол манай улсад 2020 онд 277 сая ам.долларын татвар төлжээ. Энэ нь үйл ажиллагаа явуулдаг 35 улсаас гуравдугаарт орох үзүүлэлт гэнэ.

Тус компани албан ёсны цахи хуудаснаа “Бид 2010 оноос хойш өссөн дүнгээр нийт 2.8 тэрбум ам.долларын татварыг Засгийн газарт төвлөрүүлж, Оюу толгой төсөлд 11.6 тэрбум ам.долларын хөрөнгө оруулалт хийн, Монгол Улс болон аймаг орон нутгийн эдийн засагт хувь нэмрээ оруулсаар байна. Бид үйл ажиллагаа явуулдаг улс орнуудынхаа хуулийн дагуу татвараа цаг хугацаанд нь тогтмол төлдөг. Оюу толгойн гүний уурхай ашиглалтад орж бүрэн хүчин чадлаараа ажиллах үед Монгол Улсад төлөх татвар, АМНАТ-ийн хэмжээ нэмэгдэх төлөвтэй байна” хэмээн мэдээлжээ.

Рио Тинто нь уул уурхайн салбартаа татвараа ил тодоор тайлагнах, олон нийтэд мэдээлэх санаачилгыг анхлан гаргасан компаниудын нэг бөгөөд арван жилийн өмнөөс засгийн газруудад төлж буй татвар, төлбөрөө ил тод нээлттэй тайлагнасаар ирсэн билээ.