Үндэсний статистикийн хорооноос 2021 оны эхний гурван сарын байдлаарх нийгэм, эдийн засгийн үзүүлэлтүүдийг танилцууллаа.

Mөнгөний нийлүүлэлт  2021 оны гуравдугаар сарын эцэст урьдчилсан гүйцэтгэлээр 25 их наяд төгрөг болж, өмнөх оны мөн үеэс 4.6 их наяд төгрөгөөр өсчээ. Өсөлтөд валютын хадгаламж 0.7 их наяд төгрөгөөр, төгрөгийн хадгаламж 3.4 их наяд төгрөгөөр өссөн нь нөлөөлсөн байна.

Төгрөгийн хадгаламж 2021 оны гуравдугаар сарын эцэст 14.1 их наяд төгрөг болж, өмнөх сараас 47.2 тэрбум төгрөгөөр, өмнөх оны мөн үеэс 31.5 хувиар өсчээ. Төгрөгийн хадгаламжийн 88.6 хувь буюу 12.5 их наяд төгрөг нь иргэдийн хадгаламж, 11.4 хувь буюу 1.6 их наяд төгрөг нь аж ахуйн нэгж, байгууллагын хадгаламж байна.

Хугацаа хэтэрсэн зээлийн өрийн үлдэгдэл 2021 оны гуравдугаар сарын эцэст 1.3 их наяд төгрөг болж, өмнөх сараас 69.7 тэрбум төгрөгөөр буурч, өмнөх оны мөн үеэс 11.5 хувиар өссөн байна. Хугацаа хэтэрсэн зээлийн өрийн үлдэгдэл нийт зээлийн өрийн үлдэгдлийн 7.3 хувийг эзэлж, өмнөх оноос 0.6 пунктээр өсчээ.

Банкны системийн хэмжээгээр чанаргүй зээл 2021 оны гуравдугаар сарын эцэст 2.0 их наяд төгрөг болж, өмнөх сараас 3.4 тэрбум төгрөгөөр, өмнөх оны мөн үеэс 187.8 тэрбум төгрөгөөр өссөн байна. Чанаргүй зээл нийт зээлийн өрийн үлдэгдлийн 11.5 хувийг эзэлж, өмнөх оноос 0.8 пунктээр өссөн байна.