Цар тахлын улмаас үүссэн хүндрэлтэй нөхцөл байдлыг богино хугацаанд даван туулах, эдийн засгийг сэргээх хүндхэн үүрэг төр засаг ба хувийн хэвшлийн аль алинд нь ноогдож буй хариуцлагатай цаг үед Засгийн газраас эрүүл мэндийг хамгаалахын зэрэгцээ халдвар хамгааллын дэглэмээ баримтлан, эдийн засгаа аврахад онцгой анхаарч, бизнесийг аль болох хааж зогсоохгүй байх, дэмжлэг үзүүлэх бодлого барьж байгаа талаараа хэвлэл мэдээллийн хэрэгслээр илэрхийлсэн. Гэвч сүүлийн өдрүүдэд Улаанбаатар хотод өдөрт гарах халдварын тоо эрс нэмэгдэж, аймгуудад халдвар тархаж эхэлсэн нь халдварын тархалтын улаан түвшинд шилжин хатуу хөл хориог тогтоох эрсдэлийг бий болголоо.

Иймд байгууллага, аж ахуй нэгж бүр өөрийн ажиллагсад, үйлчлүүлэгчдийг халдвараас сэргийлэх, халдварыг тархаахгүй байх нөхцөлийг бүрдүүлэн тогтоосон дэг журмыг чанд сахих замаар бизнесийн үйл ажиллагааг хэвийн явуулахад, цаашилбал эдийн засгаа хамгаалахад хувь нэмрээ оруулахыг нийт бизнес эрхлэгчдэд хандан уриалж байна.   

Бизнесийнхэн бид  өндөр хариуцлагатай байснаар бизнесээ хамгаалж, эдийн засгаа аврах болно.

Монголын үндэсний худалдаа аж үйлдвэрийн танхим