Монголбанкны Мөнгөний бодлогын хороо хуралдлаа. Хурлаар мөнгөний бодлогын хүүг зургаан хувьд хэвээр нь үлдээх шийдвэр гаргалаа. Энэ шийдвэрийн талаар Монголбанкны тэргүүн дэд ерөнхийлөгч Г.Дөлгөөн танилцуулав. Тэрбээр “Монголбанкны Мөнгөний бодлогын хорооны 2021 оны гуравдугаар сарын 24-ний хуралдаанаар эдийн засаг, банк санхүүгийн зах зээлийн өнөөгийн байдал, ирээдүйн төлөв болон гадаад, дотоод орчны төлөв байдал, эрсэдлийг харгалзан үзээд санхүүгийн нөхцөлийг үргэлжлүүлэн зөөлрүүлэх зорилгоор дараах хоёр шийдвэрийг гаргалаа.

Үүнд:

Нэгдүгээрт: Мөнгөний бодлогын хүүг зургаан хувьд хэвээр хадгалах

Хоёрдугаарт: Урт хугацаат дахин санхүүжилтын хэрэгслээр 2021 оны хоёрдугаар улиралд 350 хүртэлх тэрбум төгрөгийг  олгох шийдвэр гаргасан. Уг санхүүжилтыг боловсруулах, үйлчилгээ болон 200-аас дээш ажилтантай худалдааны салбар, аж ахуйн нэгжүүдийг хамруулахаар өргөтгөсөн.

Жилийн инфляц 2021 оны хоёрдугаар сард улсын хэмжээнд 2.6 хувь байна. Харин Улаанбаатар хотын хэмжээнд хоёр хувьтай байгаа бөгөөд эрэлтийн хүчин зүйлсийн инфляцид үзүүлэх нөлөө ирэх улирлуудад эдийн засгийн идэвхжлийг даган аажмаар нэмэгдэх бол шатахуун мөн сайжруулах түлшний үнийн нөлөөгөөр нийлүүлэтийн шалтгаантай инфляц цаашид өсөхөөр байна. Суурь төсөөллөөр 2021 онд инфляц дунд хугацааны зорилтын орчимд хадгалагдах хүлээлттэй байга хэдий ч корхонавирусийн тархалт, вакцинжуулалттай холбоотойгоор өөрчлөгдөж болзошгүй байна.

Вакцинжуулалт амжилттай үргэлжлэх тохиолдолд эдийн засгийн идэвхжил нэмэгдэж, аж ахуйн нэгж байгууллагуудын үйл ажиллагаа хэвийн түвшинд хүрэх хүлээлттэй байгаа бөгөөд 2021 оны эхний хоёр сард экспорт 73, боловсруулах салбар 1-2 дугаар саруудад 66  хувь болон 37 хувиар тус тус өссөнийг онцолж хэлмээр байна. Түүнчлэн Олон улсын зээлжих зэрэглэлийн Moody’s агентлаг Монгол Улсын зээлжих зэрэглэлийн төлөвийг сөргөөс тогтвортой болгон сайжруулахад гадаад валютын албан нөөцийн хүрэлцээ нэмэгдэж, богино хугацаанд гадаад өрийн дарамт буурсны зэрэгцээ эдийн засгийн төлөв сайжрах хүлээлттэй байгаа нь нөлөөлсөн байна. Төвбанкний зүгээс Ковид-19 халдварын эдийн засагт үзүүлэх сөрөг нөлөөг бууруулах, шат дараатай авч хэрэгжүүлж буй мөнгөний болон макро түвшний арга хэмжээ, нэвтрүүлж буй санхүүжилтийн хэрэгслүүд нь эдийн засгийн сэргэлтийг дэмжиж, банкны салбарын тогтвортой байдлыг хадгалж байна. Инфляц зорилтоос давах нөхцөл үүссэн тохиолдолд Мөнгөний бодлогын хороо бодлогын тохируулга хийх болно” гэв.