Зургаа дахь Ерөнхийлөгч У.Хүрэлсүхийн тангараг өргөх, тамгаа гардаж авах ёслол төсөөлснөөс зохион байгуулалтгүй болж өндөрлөлөө. Тэр тусмаа тангараг өргөх ёслолын гол “хөтлөгч”-өөр ажилласан УИХ-ын дарга Г.Занданшатар хоёр ч удаа ноцтой “фактлав”. Уг нь “Ерөнхийлөгчийн тангараг өргөх ёслолын журам”-ыг УИХ-ын дарга Г.Занданшатар өнгөрсөн долоо хоногт өөрөө даргалж баталсан. Энэ утгаараа шинэ Ерөнхийлөгчийн тангараг өргөх ёслолын дарааллыг хамгийн сайн мэдэж байх ёстой хүн байв. Гэтэл тангараг өргөх, тамга гардуулах ёслолын дарааллыг мартаж, У.Хүрэлсүх болон Ж.Гүррагчаагийн үг хэлэх дарааллыг мөн л урд хойно нь оруулж шинэ Ерөнхийлөгчөө хоёр ч удаа босгож, суулгав.
Тухайлбал,
1.Х.Баттулга, У.Хүрэлсүх нар ёслолын танхимд орж ирсний дараа УИХ-ын дарга Г.Занданшатар “Монгол Улсын тав дахь Ерөнхийлөгч Х.Баттулга шинэ Ерөнхийлөгч У.Хүрэлсүхэд Ерөнхийлөгчийн тамгыг гүн хүндэтгэлтэйгээр гардуулна” хэмээн зарлав. Танхим даяар чимээгүй болж, ёслолыг хүлээв. Гэтэл ёслол зохион байгуулагч залуу Г.Занданшатарын дэргэд гүйх шахам очиж, чихэнд нь ямар нэг зүйл “шивнэв”. Тэр даруйд Г.Занданшатар үл мэдэг хоолой засаж, “Үндсэн хуулийн дагуу Монгол Улсын Ерөнхийлөгчөөр сонгогдсон Ухнаагийн Хүрэлсүх тангараг өргөнө” хэмээн залруулав зарлав. Зүй нь У.Хүрэлсүх эхлээд Үндсэн хуулийн эх хувь дээр гараа тавьж, Ерөнхийлөгчийн тангараг өргөөд дараа нь Х.Баттулга У.Хүрэлсүхэд Ерөнхийлөгчийн тамгыг хүлээлгэн өгөх дараалалтай байж л дээ. Гэтэл Г.Занданшатар энэ дарааллыг мартаж, тангараг өргөхөөс нь өмнө тамгыг нь өгүүлэх гээд байж.
2. У.Хүрэлсүх Х.Баттулгаас Ерөнхийлөгчийн тамгаа гардаж аваад суудалдаа суусны дараа УИХ-ын дарга Г.Занданшатар “Монгол Улсын Ерөнхийлөгч Ухнаагийн Хүрэлсүх ард түмэнд хандаж үг хэлнэ үү” хэмээн зарлав. Шинэ Ерөнхийлөгч У.Хүрэлсүх суудлаасаа босоод зогсох мөчид өнөөх ёслол зохион байгуулагч залуу мөн л УИХ-ын дарга Г.Занданшатарын өмнө гүйх шахам очиж, нэг зүйл “шивнэв”. Тэр даруйд Г.Занданшатар “Шинэ Ерөнхийлөгч Ухнаагийн Хүрэлсүхэд зориулж, ард түмнийг төлөөлөн БНМАУ болон ЗХУ-ын Баатар, хошууч генерал Ж.Гүррагчаа үг хэлнэ” хэмээн дахин залруулга хийлээ. Үг хэлэхээр сандлаасаа босоод зогсчихсон байсан Ерөнхийлөгч У.Хүрэлсүх Г.Занданшатар руу нэг хяламхийж харснаа буцаж суув.
Ичгүүртэй ч юм боллоо доо. Бүх ард түмний өмнө, УИХ, Засгийн газрын гишүүд, гадаадын элчин сайдуудын нүдэн дээр хатуу дэг, журмаар явах ёстой тангараг өргөх ёслолын дарааллыг урд хойно нь оруулан, шинэ Ерөнхийлөгчөө дахин дахин өндөлзүүлсэн нь зүгээр өнгөрөх үйлдэл биш л байх.
Эрх баригч МАН түүхт 100 жилийн ой дээрээ Ерөнхийлөгчтэй болсондоо туйлын баярлаж, У.Хүрэлсүхийн тангараг өргөх ёслолд ихээхэн ач холбогдол өгч, чухалчлан бэлдэж байгаа гэх мэдээллүүд гарч байсан. Гэтэл бодит байдал дээрээ ийм л зүйл боллоо.
УИХ-ын дарга Г.Занданшатар Ерөнхийлөгч У.Хүрэлсүхийн тангараг өргөх ёслолыг ингэж "САМАРСАН" |
|