Монгол Улсын Засгийн газар 15 хоногийн турш гамшгийн үеийн улаан түвшинд шилжих шийдвэр гаргаж, улс даяараа хатуу хөл хорионы дэглэмд шилжээд байгаа билээ. Үүнтэй холбоотойгоор Эргэлт.мн мэдээллийн сайтаас халдвар хамгааллын дэглэмээ барьж, гэрээсээ гарахгүй байхыг уриалахын сацуу, дэлхийн хамгийн шилдэг музейнуудээр онлайнаар “аялах” боломжийг олгож байна. Уншигч та ердөө ганцхан товшилтоор уран зураг, түүх соёл, амьд байгалийн шилдэг бүтээлүүдийн дэргэд “очих” боломжтой юм.

1.Луврын музей

Франц Улсын нийслэл Парис хотод байрлах Луврын музей “Ковид-19” цар тахлын үед олон нэр төрлийн үзмэрүүдээ үнэ төлбөргүй болгож, виртуал хэлбэрт шилжжээ. Леонардо Да Винчи, Донателло, Микеланжело зэрэг сэргэн мандалтын үеийн нэрт зураачдын ховор бүтээлүүдээс гадна Дюрер, Рембрандт зэрэг 40 орчим зохиолчдын шилдэг уран зохиолын бүтээлүүдийг хөл хорионд орсон үзэгчдэд виртуал хэлбэрээр толилуулж байгаа юм.

Луврын музейгээр зочлох бол ЭНД дараарай.

2.Дэлхийн музей

АНУ-ын Нью-Йорк хотын Итакад байрлах Палеонтологийн судалгааны байгууллагын Дэлхийн музей байгалийн түүх, интерактив шинжлэх ухааны шинж чанар, уран зургийн үзэсгэлэнгүүдийг хослуулан өнгөрсөн болон өнөө цаг үе юугаараа холбогдож байгаа, хүн төрөлхтний оршин тогтнол нь байгаль ертөнцөд хэрхэн нөлөөлж байгааг харуулж байгаа юм. Дэлхийн музей нь 4.5  тэрбум жилийн өмнөх үзмэрээс эхлүүлэн маш олон үед холбогдох түүхэн олдворуудыг үзэгчдийн хүртээл болгожээ.

Дэлхийн музейгээр зочлох бол ЭНД дараарай.

3.Британийн музей

Байгаль орчин, дэлхий, ертөнцийн өөрчлөлтийг ажиглах дуртай бол Их Британи Улсын нийслэл Лондон хотын Британийн музейн виртуал хувилбарыг санал болгож байна. Цаг хугацаа, орон зай, тив, дэлхий, гариг, эрхэс, соёл иргэншлийн өндөр иммерсив ашиглан бүтээсэн маш томоохон параллель түүхийн олдворууд эл музейд хадгалагдаж буй.

Британийн музейд зочлох бол ЭНД дараарай.

4.Гудамжны урлагийн бүтээлүүд

Сүүлийн 20 жилийн хугацаанд гудамжны урлагийн төрөл асар хурдацтай өсөн дэвжиж байгаа билээ. Үүнтэй холбоотойгоор дэлхийн хамгийн алдартай платформыг үндэслэгч “Google” компаниас АНУ-ын уран бүтээлч Кит Харинг, Бразилын граффитти зураач Эдуардо Кобра нартай хамтарч АНУ-ын Нью-Йорк хотын шилдэг гудамжны урлагийн бүтээлүүдийн цуглуулгыг виртуал хэлбэрт шилжүүлсэн байна.

Гудамжны урлагийн шилдэг бүтээлүүдтэй танилцах бол ЭНД дараарай.

5.Арлан музей

Германаар “Staatliche Museen zu Berlin” Берлиний Төрийн музей нь олон улсын урлаг сонирхогчдод Арлан музей гэдгээрээ илүү танигджээ. Уг музей нь Герман Улсын нийслэл Берлин хотын Шприй голын дунд хэсэгт байрладаг бөгөөд дэлхийн маш ховор уран зураг, уран баримлуудыг хадгалдаг гэнэ. Улмаар “Ковид-19” цар тахлын нөхцөл байдалтай холбоотойгоор тус музейгээс 5000 орчим бүтээл, 40 үзэсгэлэн, 37 богино объектоо тоон хэлбэрт шилжүүлж үзэгчдийн хүртээл болгож байна.

Арлан музей Берлинээр зочлох бол ЭНД дараарай.

6.Ван Гогийн музей

Нидерланд Улсын нийслэл Амстердам хотод Голландын нэрт зураач Ван Гогийн музей байдаг. Харин цар тахал, хөл хорионы үеэр тус музейгээс зураач Ван Гогт хамаарах бүх бүтээлийг онлайн хэлбэрт шилжүүлсэн юм. Ван Гогийн музейн төлөөлөгч энэ тухай нэгэн ярилцлагадаа “Онлайнаар зөвхөн нэрт зураачийн бүтээлүүд бус түүний амьдралын намтар, хүмүүсийн тэр бүр мэддэггүй түүхүүдийн тухай дүрс бичлэгүүдийг “Youtube” сувгаараа дамжуулан олон нийтэд хүргэх болно” хэмээжээ.

Ван Гогийн музейгээр ЭНД дарж зочлоорой.