-Би хэзээ ч хэн нэгний аманд багтаж, унахгүй гэж боддог доо-

         Ховд аймгийн харьяат сум, аймаг, цэргийн цолтой хүчит 128 бөхийн цол олгох барилдаан энэ сарын 6-нд болсон. Тус барилдаанд Булган сумын харьяат сумын заан Г.Ганхуяг түрүүлж, аймгийн арслан цол хүртсэн билээ. Цол хүртээд удаагүй байгаа ОУХМ, аймгийн арслан Г.Ганхуягийн сэтгэгдлийг хуваалцаж, ярилцлаа. 

-Сайхан наадаж байна уу. Аймгийн арслан цол хүрсэнд баяр хүргэе?

          -Ардын хувьсгалын 100 жилийн ойгоор аймгийн арслан цол хүртсэндээ маш их баяртай байна.

-Аймгийн арслан цол авахын тулд ямар мэхээр, яаж түрүүлсэн бэ?

         -Ховд аймгийн наадамд тавын даваанд тунаж, Л.Сосорбурам харцагыг давхар хамж тав давсан. Зургаагийн даваанд залуу бөх Дэнзэнсамбууг хутгаж давсан. Үзүүр түрүүнд аймгийн заан Б.Уртнасаны баруун хөлийг нь хонгодож түрүүлсэн. Би ихэвчлэн хөл авч, давхар хамж барилдсан .

-Таны гарамгай сайн мэх юу вэ?

          -Би намхан учраас ихэвчлэн хөл авсан барилдаан хийдэг. Сул талаа давуу тал болгож барилдахыг үргэлж хичээдэг дээ.

-Аймгийн арслан цол хүртэх барилдааныг нь аав, ээж нь үзэж, баярлаж суусан байх?

        -Аймгийн арслан цол хүртэх барилдааныг ээж маань үзсэн. Харин аав хадланд яваад, эзгүй байсан. Аав, ээж, хамаатан садан маань маш их баярлаж, надад эрч хүч, урам зориг, итгэл найдвар өгч, “Цаашид илүү сайн барилдаж, амжилт гаргаарай” гэж хэлсэн.

-Та багаасаа барилдах дуртай хүүхэд байв уу?

        -Би Ховд аймгийн Булган суманд төрж, өссөн. 2014 онд Аварга дээд сургуулийг төгссөн. Оюутан болсон цагаасаа хойш эрчимтэй барилдаж эхэлсэн. 2018 онд дэлхийн аварга шалгаруулах залуучуудын тэмцээнээс хүрэл медаль хүртэж, ОУХМ цол авсан. Б.Баяраа багшийн удирдлага дор чөлөөт бөхөөр хичээллэж байгаа. Багадаа хажуу айлын хүүхдүүд болон ангийнхантайгаа барилддаг байлаа. Арван жилийн сургуульд байхдаа аймгийн аварга шалгаруулах тэмцээнд оролцож, медаль авдаг байсан. Тэр цагаас хойш бөхөд сонирхолтой болсон.

-Танд бөхийн удам бий юү?

       -Миний аавыг Р.Ганбаатар гэдэг. Ховд аймгийн Булган сумын дөрөвдүгээр багийн малчин. Харин ээжийг Г.Атарбаяр гэдэг. Надад ойр бөхийн удам байхгүй. Маам Батбаяр гэж бөх ээжийн  төрсөн ахын хүүхэд. Аймгийн арслан Д.Бадамгарав аавын төрөл дөө. Тэднээс өөр хүн мэдэхгүй. Манай аав тариаланч хүн байсан. Би  аав, ээжээс дөрвүүлээ, айлын бага хүүхэд. Миний ах сургуульд байхдаа барилддаг байсан. Одоо Ховд аймгийн Засаг даргын тамгын газар ажилладаг.

-Бөхөөр хичээллэж эхлэхэд гэр бүлийнхэн нь хэрхэн хүлээж авсан бэ?

      -Аав, ээж минь чадахаараа тусалж, дэмждэг. Намайг бөхөөр хичээллэж эхлэхэд дуртай хүлээж авсан.

-Таны сэтгэлд хамгийн тод үлдсэн наадам хэзээ вэ. Улсын наадамд барилдаж үзэв үү?

      -2017 онд Ховд аймгийн наадамд барилдаж, гурвын даваанд унаж байсан. Тэр наадам санаас гардаггүй, их харамсалтай, амархан унасан санагддаг. Улсын наадамд барилдаж үзээгүй. Чөлөөт бөхийн шигшээ багт байдаг болохоор тэр чиглэлээр ихэвчлэн тэмцээнд оролцдог. Зун аймаг, сумын наадамд барилддаг.

-Таны үлгэр жишээ авч, харж баясдаг ямар бөх байдаг вэ?

      -Улсын харцага Н.Батзаяа, С.Мөнхбат аваргаас үлгэр жишээ авдаг. Тэдний барилдааныг үзэх дуртай.

-Та бэлтгэлээ яаж хангадаг вэ. Бэлтгэлийн үед юунд илүү анхаардаг вэ?

      -Бэлтгэлээ МУБИС-ын Биеийн тамирын дээд сургуульд Б.Баяраа багшийн  удирдлага дор хичээллэдэг.Шигшээ багийнхан байнга бэлтгэл хийдэг болохоор шантрахгүй, өөрийгөө хуурахгүй байхад их анхаардаг.

-Та аймгийн арслан цол хүртэхээсээ өмнө түрүүлнэ гэдэгтээ итгэлтэй байсан уу?

     -Энэ наадамд түрүүлнэ гэсэн бодол байсан. Барилдахаасаа өмнө сэтгэлзүйгээ тайван байлгаж, өөрийгөө бэлдсэн. Тийм учраас маш тайван, санасандаа хүртэл барилдаж чадсан.  

-Наадамчин олны өмнө уран мэхийг уралдуулан барилдахад танд ямар мэдрэмж төрдөг вэ?

       -Бөх хүн дэвжээн дээр гараад бэлтгэлийн үед хийж байсан чадах бүхнээ үзүүлэх ёстой. Мөн “Яах гэж дэвжээн дээр гарч ирсэн бэ” гэдгээ ухамсарлаж, шийдэмгий, зоригтой, ухамсартай зөв барилдах ёстой гэж боддог.

-Таныг барилдахаар явахад нь аав, ээж нь юу гэж захидаг вэ?

       -“Миний хүү сайн барилдаарай” гээд цай, сүүнийхээ дээжийг хангай дэлхийдээ өргөдөг. Би барилдах өдрөө хүмүүстэй юм ярихгүй байхыг хичээдэг юм. Яагаад гэвэл өөрийгөө бэлдэж, барилдаандаа анхаарлаа төвлөрүүлдэг.

-Сүүлийн үед бөхчүүд тохиролцоонд амархан унаж, давдаг болжээ. Энэ талаар та ямар бодолтой байдаг вэ?

       -Би бөхийн тохиролцоонд их дургүй. Бөхчүүд зөвхөн хүч чадал, уран мэхээрээ үзэгч олны өмнө барилдах ёстой гэж боддог. Би хэзээ ч хэн нэгний аманд багтаж, унахгүй гэж боддог доо.

-Та ямар цолонд хүрч, аав, ээж, нутгийн зон олноо баярлуулах юм сан гэж боддог вэ?

     -Чөлөөт бөхийн олимп, дэлхийн медальтай, үндэсний бөхөөр барилдаж, улсын заан цолонд хүрэх юм сан гэж хүсдэг дээ.

-Та монголчууддаа хандаж юу хэлэх вэ?

      -Монголчууддаа эрүүл энх сайн сайхан бүхнийг хүсье. Энх цаг хурдан ирж, дэлгэр сайхан наадаасай гэж хүсэж байна.