• Өнөөдөр 2022-09-29

ШӨНИЙН СУРВАЛЖИЛГА: Согтуу залуус зодолдож, бүсгүйчүүд нь агсамнасан баасан гарагийн шөнө

2022-09-19,   573

    Хичээлийн шинэ жил эхэлсэнтэй холбогдуулан Улаанбаатар хотод оюутан залуусын хөл хөдөлгөөн нэмэгдсэн. Үүнтэй холбоотойгоор залуусын шоу цэнгээн хэрээс хэтэрч байгаа талаар цахим орчинд яригдаж байна. Шөнийн цагаар шуугиан дэгдээж байгаа гэх залуусын нэг шөнийг сурвалжлахаар залуусын ихээр шоуддаг 3,4 дүгээр хорооллыг зорилоо.Улаанбаатар хотод 00:00 цаг болоход зам дагуу автобусны буудлуудаар байрлах ТҮЦ-нүүд мода болж эхэлнэ. Бидний сурвалжилга шөнийн турш ажиллах энэхүү цагаас эхэлсэн юм. Шөнөжин ажиллах ТҮЦ-д согтууруулах ундааны зүйлсээс бусдыг нь борлуулах эрхтэй юм байна. Гэм нь бараа бүтээгдэхийнх нь ханш өндөр, зах зээлийн ханшин дээр дуртай тоогоо нэмдэг бололтой. 3,4 дүгээр хороололд хүний хөл хөдөлгөөн, чимээ шуугиан тасрах шинж алга.  Хөлчүүрэхсэн залуус нэгнээсээ зууралдан алхахдаа “Одоо жаахан бүжиглэе, хаашаа орох вэ” гэх мэтээр элдвийг  орилцгооно.  

 

     00:30 минут Москва рестораны автобусны буудал дээр эгнэн байрласан ТҮЦ-нүүд  нээлттэй байлаа. Хажууханд нь шөнийн клуб үйл ажиллагаа явуулдаг учраас үйлчлүүлэгчдийн цуваа тасрахгүй. Тус ТҮЦ-д дөрөв дэх жилдээ үйл ажиллагаа явуулж байгаа Ө.Ариунсанаа зайгүй болтол өрсөн бараан дундаа суужээ. Хоёроос дээш хүн багтахгүй шахам зайнд худалдаа эрхлэх тэрбээр “Шөнөжин ажиллаад  заримдаа ядарч нойрмоглоно. Гэхдээ хажууд байнга чанга хөгжим дуугараад байхаар нойр сэргээд байгаа ч юм ишг санагддаг. Согтуу охид, хөвгүүд их орж ирнэ. Түргэн хоол, ширхгийн тамхи, гаазтай ундаа их гүйлгээ сайтай байдаг. Тэгээд нойтон, хуурай сальфетки ч их зарагдана. Зарим залуучууд "Чук кик" чихэр ихээр авна. Яагаад гэдгийг нь мэдэхгүй юм. Өдөр бүрийн орлого харилцан адилгүй” гэв. Биднийг үг солих хэдэн минутын хугацаанд ТҮЦ-нээс худалдан авалт хийх залуус мөнгөө ч бүрэн тоолж чадахгүй халамцуу байлаа. Хэд хэдэн удаа хаалга нээгдэж хаагдахад  ТҮЦ дотор сэрүүн болж худалдагч эмэгтэй гадуур хүрмээ өмсөв. “Өвөл ТҮЦ халаалтгүй учраас хэцүү. Хаалгаа дулаалж, ноосон хувцас өмсөөд, жижиг халаагуур тавьдаг. Гэхдээ л дулаалаагүй байшин учраас дулаанаа хадгалахгүй дороо хөрчихдөг” гэсээр дутуу хаагдсан хаалгаа нэг сайн хааж аваад өөртөө кофе найруулан сандал дээрээ суув.

     ТҮЦ-ний гадаах орчин олон хүн бужигнасан дуу шуу ихтэй газар. Саяхан ТҮЦ-нээс тамхи авсан залуу  найзуудтайгаа нийлэн клубийн урд тамхилах зуураа шүлсээ ойр ойрхон харсан зүг рүүгээ үсчүүлэн хаяна. Найзууд нь ч ялгаа байсангүй. Тамхи нь дуусаж сүүлийн удаа сороод ишээ газар хаян клуб рүү гүйхээрээ орно. Бүрэн унтраагүй тамхины иш утаа суунаглуулсаар газарт үлдлээ.

    Ерөөс энд бүгд адилхан үйлдэл гаргацгаана. Клубээс гарна, булан бараадаж тамхи татаад ишийг нь газар шидэж, энэ тэндгүй шүлсээ хаяна. Охид, бүсгүйчүүд нь хэрэлдэж, эсвэл чанга чанга хөхрөлдөх  бол эрчүүд нь хэзээ л бол хэзээ барьцалдаад авч мэдэхээр нэгэн лүгээ үсчинэ.  

-ШОРЛОГНЫ НАЙМААЧИН: СОГТУУ ЗАЛУУС ТЭРЭГ ЭВДЛЭХ ДӨХӨХ НЬ ЭНҮҮХЭНД-

01:00 ЦАГ    

Москва ресторанаас цаашаа хэсэг алхаад дахин нэг клуб байх бөгөөд гадаа нь бөөгнөрсөн олон дундаас “Чи намайг мөрлөдөг хэн юм бэ. Алив хүрээд ир. Чи чадахгүй л дээ” гэсээр  халамцуу хоёр залуу нэгэн рүүгээ дайрч, хамт яваа залуус нь салгах гэж дундуур нь орцгооно.  Харин холгүйхэн “Уусан юмаа шингээж чадахгүй байж яах гэж ингэж их уудаг юм. Харьцгаая, бос л доо”  хэмээн өөрийгөө хянах чадваргүй болтолоо архи уусан охиныг найз нь  дагуулж явах гэж чангаах аж. Бараг ухаангүй шахам суух охин “Би согтоогүй, одоохон бослоо” гэж агсамнана. Хажуугаар явах залуус гартаа тус бүр нэг пивотой. Барьсан пиво нь дуусвал базаад газар шиднэ. Ингэж цувуулж хаясан пивоны лааз зам дагуу хэдэнтээ харагдана. Клубийн наана шорлог зарах эмэгтэй галд гараа ээсээр  хэд хэд үрэн дулаацан. Баарнаас гарах согтуу залууст хамаг юмаа шидүүлэхгүй гэсэндээ шорлог худалдан авах хүмүүстэйгээ ихэд эвтэйхэн харицаж байлаа. “Баарны хажууд зогсвол худалдан авагч олонтой байдаг юм. Гэхдээ согтуу хүн хэцүү шүү дээ. Нэг агсам зан нь хөдөлчихвөл хамаг юмыг минь авч шидээд сүйд хийнэ. Ялангуяа энэ залуусын уур омог гэж жигтэйхэн их. Өнгөрсөн долоо хоногт нэг залуу миний шорлог амтгүй байна гээд найзуудтай нийлж бэлэн байсан шорлогыг минь хэдэн тийш цацаж, тэрэг эвдлэх шахсан. Азаар хажуугаар зөрж явсан хүмүүс тус болсон. Шөнийн цагаар эрүүл хүн бараг л явахгүй дээ” гэв. Тэрбээр шорлогоо ширхгийг нь  5000 төгрөгөөр зарж байгаа гэнэ.

-СОГТУУ ЗОРЧИГЧ, ХУРД ХЭТРҮҮЛСЭН ЖОЛООЧ-

    Цагийн зүү 02:00 заахад  согтуу иргэдийн хөдөлгөөн нэмэгдсэн үү гэхээс багассангүй. ТҮЦ-тэй адилхан шөнөжин ажиллах худалдааны газар бол CU, GS25 билээ. Хүйтэнд даарсан, өлссөн бүхэн энд тухтай суухыг эрмэлзэх бөгөөд худалдагч, ажилчид нь эвшээлгэсээр ажлаа хийнэ. “Чи яахаараа миний үгийг сонсдоггүй юм” гэх чанга дуу гарав. Дуу гарсан зүг рүү анхаарлаа хандуулбал хүйтэнд дан подволктой дунд эргэм насны хоёр эр замын хажууханд барьцалдаж хэзээ мөдгүй зодоон эхлүүлэхээр зогсож байлаа. Ноцолдож байгаа учир үе үе зам руу орж гарна. Хажуугаар нь өнгөрөх автомашин дуут дохиогоо чарлуулсаар зарим нь цонхоороо “Аминаасаа уйдаа юу хоёр .... минь” гэсээр өнгөрнө.

02:30 ЦАГ    

    Өдөржин ачаалалтай байдаг автомашины хөдөлгөөн багасаж, замаар явах хэдэн автомашин нь гэрлэн дохиог ч тоолгүй уралдаанд оролцож байгаа юм шиг хурдалцгаана. Тэдний урдуур халамцуу охид , залуус гүйхээрээ гарахад жолооч нар огцом тоормос дарахад  аниргүй хотод дугуйны хяхтнасан чимээ, чанга сигналтай хамт дуулдана. Зам дагуу алхах охид, бүсгүйчүүд рүү “Суучих, дөхүүлээд өгье” гэж өдөж, хороож байгаа жолооч нар ч цөөнгүй. Автобусны буудал  дагуу автомашин эгнэн зогсжээ. “Зүүн салаа”, “Долоон буудал явлаа” ,“Нэг хүн аваад гарлаа” гэж хоолой мэдэн хашхирах нь хуучны микроны кондуктор шиг сонсогдоно. Ингэж чиглэлээр явахад нэг хүний 3000-4000 төгрөгийн үнэтэй бөгөөд хойно дөрөв, урд нэг гээд нийт таван хүнтэйгээр хөдөлнө. Харин бусад нь нэг километр нь 2000 төгрөгөөр тооцож явна. “Би өөрөө машинаа бариад явна, би согтоогүй ээ” гэсээр зогсоол дээр байгаа машиныхаа хажууд зогсоод түлхүүрээ хайх залуу, хөл дээрээ ч тогтож чадалгүй болтлоо согтжээ. Найзууд дунд нь “Тэг тэг ойрхон юм чинь” гэх нэгэн байх бол “Би битгий балай юм яриад бай, дуудлагын жолооч дууд” гэх нэгэн ч байлаа.

Баасан гарагийн үдэш хөлчүүрэхсэн залуус нэгэн рүүгээ агсамнаж, хаясан хогыг нь маргааш  хүн цэвэрлэхийг бодолцолгүй тамхины иш, уусан пивоныхоо лаазыг хаяна. Шөнөжин шоудаж энэ тэндгүй хог хаясан тэд  маргааш өглөө хотын цэвэр цэмцгэр, соёлтой залуус болж хувирцгаах байх даа.

 


ШӨНИЙН СУРВАЛЖИЛГА: Согтуу залуус зодолдож, бүсгүйчүүд нь агсамнасан баасан гарагийн шөнө
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2022-09-19 13:52:25
    Иргэн: Хөдөөнийхөн,эцэг эхийнхээ хэдэн малыг архинаас өгч байгаа нь энэ.хөлдүү толгойтой оюутнууд,
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188