Эрүүл мэндийн яамны ээлжит мэдээллийн үеэр сэтгүүлчид ХӨСҮТ-ийн тандалт, судалгааны албаны дарга Ж.Байгалмаагаас сэтгүүлчид тодруулга, мэдээлэл авлаа.

-Коронавирусийн халдвартай ойрын хавьтал болсон иргэдэд эмнэлгийн ямар тусламж үзүүлж байна вэ?

-Коронавирусийн халдвар авсан иргэнтэй холбогдож хэдүүлээ амьдардаг талаар тандалт, судалгааны багийнхан тодруулдаг. Түүнээс гадна ажлын хамт олон болон ойрын хугацаанд уулзсан иргэдийг бүртгэдэг. Тэдгээр иргэдийн эмнэл зүйн оношоос хамаарч  гэрт тусгаарлах уу, эмнэлэгт шилжүүлэх үү гэдгийг зөвлөж байна. Халдвартай иргэнийг эмнэлэг рүү шилжүүлэхдээ гэр бүлийнхэнээс шинжилгээ авдаг. Албан байгууллага болон найз нөхдийн ойрын хавьтлыг Нийслэлийн эрүүл мэндийн газар болон дүүрэг, өрхийн эмнэлэг шинжилгээ авч байгаа. Тийм учраас ойрын хавьтал болсон ч ямар нэгэн шинж тэмдэг илрээгүй бол гэртээ өөрийгөө тусгаарлах ёстой. Бид халдварын ойрын хавьтлыг шинж тэмдэг илэрэхээс өмнөх хоёр хоног эсвэл лаборатороор батлагдсанаас хоёр хоногийн өмнө 15 минут хамт байж ярилцсан хүнийг ойрын хавьтал гэж үздэг. Харин коронавирусийн халдвартай иргэнтэй зөрж өнгөрөх, нэг байгууллагад ажилласан гэдгээр ойрын хавтал гэж үзэж болохгүй.

-Ойрын хугацаанд эмнэлэг, эмч нарын ачаалал нэмэгдэж байна уу?

-Эмнэлэг болон шуурхай хариу арга хэмжээний багийнханы ачаалал нэмэгдсэн. Улаанбаатар хотод хоногт бүртгэгдэж буй халдвар 731 болсон. Халдварын тоо нэмэгдэх тусам эмч, эмнэлгийн орны ачаалал нэмэгдэж байна. Бидний тооцож байгаагаар өдөрт бүртгэгдэх халдварын тоо нэмэгдэх хандлагатай байна. Өнөөдрийн байдлаар нийслэлийн хэмжээнд 48 хариу арга хэмжээний баг ажиллаж байна.

-Халдвар нэмэгдэх тусам ямар арга хэмжээ авч ажиллах вэ?

-Дэлхий нийтэд халдварын тархалтыг дөрвөн үед хувааж үздэг. Эхний шат нь халдвар огт бүртгэгдээгүй улс орон хамаардаг. Хоёрдугаар шат нь гаднын улс орон, аймаг, нийслэлээс халдвар зөөвөрлөгдсөн тохиолдол багтана.  Гуравдугаарт, халдвар голомтод бүртгэгдсэн байна. Дөрөвдүгээрт, хүн амын дунд өргөн тархсан гэж ангилдаг. Нийслэлийн хэмжээнд хүн амын дунд өргөн тархсан гэж үзэж байна. Тиймээс энэ шатанд нэн түрүүнд авах арга хэмжээ бол хөл хорио буюу бүх нийтийн бэлэн байдалд шилжих юм.

-Өнөөдрийн байдлаар хичнээн эмч, эмнэлгийн ажилтан коронавирусийн халдвар авсан бэ?

-Өнгөрсөн долоо хоногийн байдлаар 354 эмч, эрүүл мэндийн ажилтан халдвар авсан байна. Энэ нь нийт халдварын 3.6 хувийг эзлэж байгаа юм. Халдвар авсан эмч, ажилчдын 70 хувь нь ажил үүргээ гүйцэтгэж байхдаа халдварт өртсөн байна. Үлдсэн 30 хувь нь нийт хүн амын дундаас халдвар авсан байна.

-Вакцины нэгдүгээр тун хийлгэсэн хичнээн хүнээс халдвар илэрсэн бэ?

-Энэ сарын 4-ны байдлаар 732 хүн буюу вакцинд хамрагдсан иргэдийн 0.23 хувь нь вакцин хийлгэсний дараа халдвар авсан байна. Тийм учраас эхний вакциныг хийлгэсэн бол халдвар авахгүй гэх бодож болохгүй.Хоёрдугаар тун хийлгэснээс хойш 14-21 хоногийн дараа дархлаа тогтдог.  Тиймээс халдвараас өөрийгөө байнга хамгаалах хэрэгтэй.