Аж үйлдвэр, эрдэс баялгийн сайд Г.Дамдинням цаг үеийн асуудлаар мэдээлэл хийлээ. 

  Тэрбээр "Үе үеийн Засгийн газар 3-6 сарын хэрэглээний нөөцөө хангах мөрийн хөтөлбөр гаргадаг ч хэрэгжүүлээгүй 30 жил явсан. Манай Засгийн газар тусгайлсан шатахууны хууль баталж, хууль эрх зүйн зохицуулалттай болгосны үр дүнд зургадугаар сард 22 ширхэг  шатахуун нөөцлөх сав, агуулах барих ажил эхлүүлсэн. 2026 он гэхэд 15 хоног илүү нөөцлөх савтай болно. 2027 он гэхэд нэмж нэг сар нөөцлөх савтай болно. 2028 он гэхэд нэмж гурван сар нөөцлөх савтай болно. Үр дүнд нь дор хаяж зургаан сар нөөцөлдөг болно. Гадаад хүчин зүйлээс хамаарсан ямар ч үед шатахуун, түлшний нийлүүлэлт тасрахгүй. Өнөө шөнийн 00:00 цагаас эхлэн Улаанбаатар хотод тэгш, сондгой машины дугаарын хязгаарлалттай  шатахууныг олгоно. Нэг удаа 50000 мянган төгрөгөд олгоно. Саванд өгөхгүй. Энэ зохицуулалт бол нөөцийг зөв хуваарилах.Орон нутгийн ард иргэддээ боломж олгох. Иргэдээ зам дээр тодорхойгүй байдлаар цагийг нь үрэхгүй байх зохицуулалт хийж байна. Энэ бол Монгол Улс дан ганцаараа хийж байгаа зохицуулат биш. БНСУ, ОХУ мөн ийм зохицуулалттай байгаа. Бидний зорилго бол хангамжийг таслахгүй байх юм. Үнийн асуудал бол 75 хувь нь чөлөөтэй байдаг. Харин 25 хувь нь цаанаасаа гэрээтэй байдаг. Үнийн асуудлыг аж ахуйн нэгжүүдтэй ярилцаж тохиролцоорой гэж хүсье" гэлээ.