“Амьдрахуй” жүжигтэй холбоотой сөрөг мэдээлэл сүүлийн үед олон нийтийн сүлжээгээр түгээмэл тарж, зарим үзэгч тус жүжигт ам муутай байгаа. Тэгвэл “Амьдрахуй” жүжгийн Ерөнхий продюсер Т.Ариунчимэг өөрийн цахим хуудастаа “Би тус жүжгийн Ерөнхий продюсерын хувьд зохиолын агуулга, философийн ач холбогдлыг бодож тухайн жүжгийг сонгон тайзнаа тавьж байна. Энэ зохиолд хятад, монгол, америк ялгаагүй бүх хүн, тэр дундаа хүн болж төрсөн хувь тавилан хэчнээн эрхэм болохыг өгүүлдэг. Чи хятад, би монгол гэсэн явцуу асуудал огт хөндөөгүй болно. Хоёрдугаарт, бид БНХАУ-аас нэг ч төгрөг авалгүйгээр энэ жүжгийг хийсэн. Хувийн болоод театрын зовлон, жаргалаа бид өөрсдөө үүрээд явж байгаа. Нийгэмд, хувь хүний хөгжилд эерэгээр нөлөөлөх агуулга, философи үзэл санааг хүргэх гээд энэхүү жүжигт оролцож буй уран бүтээлчид зүтгэж байна. Бид хөрш орнуудаа дайсан гэж хараад муулаад, үзэн ядаад байвал хэзээ ч амжилтад хүрэхгүй” гэжээ.