Монголын Үндэсний бөхийн холбооноос Улсын заан Б.Серикийн барилдах эрхийг нэг жилээр хассан. Учир нь, өнгөрсөн арванхоёрдугаар сарын 7-нд “Ургацын баяр-2023” улс, аймгийн алдар цолтой хүчит 128 бөхийн барилдаан болсон. Тус барилдааны хоёрын даваанд улсын заан Б.Серик, сумын заан А.Тодмагнайтай барилдаж, давсныхаа дараа түүний шанаан дээр дарж боссон нь олны шүүмжлэлд өртөөд байсан. Тэрбээр өнгөрсөн бямба гарагийн барилдаанаар зургаа дахь удаагаа хөлийн цэцээр ажиллаж, шийтгэл нь дууссан аж. Монголын Үндэсний бөхийн холбооноос түүнд барилдах эрхийг нь албан ёсоор өгсөн эсэх талаар тодрууллаа. Тэрбээр “Би зургаан удаа хөлийн цэцээр ажиллаж, шийтгэлээ дуусгасан. Энэ талаарх өргөдлөө бөхийн холбоонд өгчихсөн байгаа. Одоогоор хариу ирээгүй байна. Хариу ирэх юм бол хэзээ ч барилдахад бэлэн бэлтгэлээ хийж байна” гэв.