“Гацуурт” ХХК-ийн Ерөнхий захирал Л.Чинбаттай холбоотой бичлэг өнгөрсөн оны зургадугаар сард цахим орчинд цацагдсан.

     Тодруулбал, Л.Чинбат зөвшөөрөлгүй, хууль бусаар 300 гаруй адууг Сэлэнгэ аймгийн Цагааннуур сумын нутагт оруулж ирснийг төрийн албан хаагчид болон нутгийн иргэд эсэргүүцсэн байдаг. Адууг нь албадан гаргахыг шаардаж, эсэргүүцсэн малчдыг Л.Чинбат машинаараа хөөж байгаа бичлэгийг олон нийтийн сүлжээнд тавьсан Цагааннуур сумын багийн дарга Б.Ганзоригийг яллагдагчаар татсан.

    Ингэхдээ түүнийг “Гацуурт" ХХК-ийн ажилтны хурууг хугалсан, "Гацуурт" ХХК-ийн захирлын нэр төрд халдаж, мөргөөгүй байхад мөргөсөн гэдэг худлаа мэдээллийг цахим орчинд тараасан гэх хоёр зүйл ангиар  яллагдагчаар татсан байсан билээ.

       Уг хэрэг хэрхсэн талаар Цагааннуур сумын багийн дарга Б.Ганзоригоос тодрууллаа.

         Тэрбээр “Намайг гэрч, хохирогчид нөлөөлсөн гэж Эрүүгийн хуулийн 21.5.1 зүйлээр яллагдагчаар татаж, шалгаж байсан.  Үүнийг Улсын ерөнхий прокурор үндэслэлгүй гэж үзсэн. Энэ шийдвэр арваннэгдүгаэр сард гарсан ч өчигдөр надад танилцуулсан. Одоо Л.Чинбатын хэрэг шүүхэд шилжсэн. Гэхдээ хэрэг сунжрах тусам үнэн зөвөөр шийдэгдэхгүй байх гэсэн хардлага байна.

  Мөн намайг “Гацуурт" ХХК-ийн ажилтны хурууг хугалсан гэх хэрэгт шалгаж байгаа. Уг хэргийн шүүх хурал товлогдоогүй, хянан шалгах шатандаа яваа” гэлээ.