Долоо хоногийн  хамгийн сайхан үе буюу их ажлаас өөрийгөө чөлөөлж гэр бүл,  хайртай дотны хүмүүстэйгээ амрах цаг эхлэлээ. Тэгвэл амралтын өдрийг хүүхдүүддээ зориулж хамт очиж, амарч зугаалан алжаалаа тайлах боломжтой газруудыг танилцуулж байна.

Catcafe-муур эрхлүүлэх, хамт цагийг өнгөрөөх газар

Амазон амьтны дэлгүүрийн Catcafe нь Монгол Улсад байхгүй, тэр бүр харагдаад байдаггүй ховор үйлдвэрийн муурыг харах, эрхлүүлэх кафег нээгээд удаагүй байгаа билээ. Та тус кафед орохын тулд  урьдчилан цаг захиалж 20000 төгрөгийн тасалбар авснаар 40 минутын турш бяцхан мууруудтай цагийг чөлөөтэй өнгөрүүлж болох юм. Бага насны хүүхдүүд насанд хүрсэн асран хамгаалагчтай хамт  төлбөр  төлж орох бөгөөд хоёр наснаас доош хүүхэд үнэ төлбөргүй.

Кино театр

Кино театрт одоо олон төрлийн хүүхэд үзэхэд тохиромжтой  кино гарч байгаа юм. Мөн үзвэрийн цагийг хүлээж байх үедээ автомат тоглоом дээр тоглож, гэр бүлээрэй хоол идэх боломжтой.  Гэхдээ бага насны хүүхдийн сонсголын кино театрын чанга дуу гэмтээх эрсдэлтэй гэдгийг битгий мартаарай.

Үндэсний соёл амралтын хүрээлэн

Хүүхдийн парк ажиллаж эхэлснийг мэдсэн үү? Тавдугаар сарын 1-нд албан ёсоор нээлтийн үйл ажиллагаа эхэлсэн бөгөөд хүүхэд бүрийн хамгийн хайртай газар билээ.

Өөрсдийн гараар зурсан уран зураг

ZoloArts студид цаг авах эсвэл хийж буй өдөрлөгт нь гэр бүлээрээ  мэргэжлийн техник хэрэгслээр багш нарын зааврын дагуу хүссэн зургаа зурах бүрэн боломжтой юм.

Агаарт гарах

Хотоос ойрхон аялж болох олон амралтын газар байгаа. Та хүүхэдтэйгээ хамт ууланд гарч, байгалийн өвөрмөц тогтоцтой газраар аялаарай. Ингэхдээ аяллын хоолыг гэр бүлээрэй хийвэл илүү амттай байх болно.

Музей үзэх

Хүүхэд бол үргэлж  юм бүхнийг сониучирхаж байдаг бяцхан эрдэмтэд. Тэдэнд мэдлэг олгож, цагийн хамт өнгөрүүлэх хамгийн тохиромжтой газар бол музей юм.

Үзэсгэлэн үзэх

Тархи амраах хамгийн тохиромжтой газар бол уран зураг, уран баримлын үзэсгэлэн.  Бүтээл бүр дахин давтагдашгүй бөгөөд хүүхэдтэйгээ ярилцах газар хайж байгаа бол хамгийн тохиромжтой газар билээ.