БНХАУ-ын Төрийн зөвлөлийн Ерөнхий сайд Ли Көчян Монгол Улсын Ерөнхий сайд Л.Оюун-Эрдэнэтэй мягмар гарагт цахимаар уулзах үеэрээ хоёр орны хоорондын нүүрсний худалдааг нэмэгдүүлэхэд баяртай байгаагаа илэрхийллээ гэж “Xinhua” агентлаг мэдээлсэн байна.

   Ли Көчян эрчим хүчний аюулгүй байдал нь эдийн засаг, ард иргэдийн амьжиргаатай холбоотой болохыг цохон тэмдэглэснийг тус агентлаг уламжилжээ. Мөн Хятад Улс нүүрсний арвин нөөцтэй ч Монгол Улстай эрчим хүчний өргөн хүрээний хамтын ажиллагааг хөгжүүлэх хүсэлтэй байгааг илэрхийлжээ. БНХАУ-д эрчим хүчний нүүрсний үнэ бараг түүхэн дээд үзүүлэлтэд хүрч, цахилгаан эрчим хүчний хомсдол үүсээд буй нь орон даяар эрчим хүчний хязгаарлалт тогтооход хүргэж, үйлдвэрийн гарцад нөлөөлөөд буй юм. Энэ нь цаашлаад эдийн засгийн өсөлтөд сөрөг үр дагавар учруулж болзошгүй байгаа аж.