Хөвсгөл, Ховд, Архангай аймаг болон нийслэлийн Чингэлтэй дүүрэгт өчигдөр галын дуудлага бүртгэгдсэн байна. Тодруулбал, Хөвсгөл аймгийн Төмөрбулаг суманд иргэн А-гийн  өвөлжөө шатаж байна гэсэн дуудлага мэдээллийг тус сумын иргэд хүлээн авсан байна. Дуудлагын дагуу  иргэд газар дээр нь очиход, 6х6, 14х14 метрийн хэмжээтэй хоёр өвөлжөө, нэг тонн өвс шатаж байсныг  унтраажээ.

Мөн  Ховд аймгийн Жаргалант суманд гэр шатаж байна гэсэн дуудлага ирсэн байна. Дуудлагын дагуу тус сумын Онцгой байдлын газрын Гал түймэр унтраах, аврах 48 дугаар ангийн албан хаагчид нэг км замыг туулан тухайн газар очиход, иргэн С-ийн гэр шатаж байсныг унтраасан байна.

Архангай аймгийн Эрдэнэбулган сумын Цагаан даваа багийн автозамын зорчих хэсэгт суудлын автомашин шатаж байна гэсэн дуудлага мэдээлэл тус аймгийн Онцгой байдлын газарт ирсэн байна. Дуудлагын дагуу аймгийн Онцгой байдлын газрын Гал түймэр унтраах, аврах 51 дүгээр ангийн алба тухайн газар очиход иргэн Б-гийн “Приус-30” загварын суудлын автомашины моторын хэсэг шатаж байсныг унтраажээ.

Харин нийслэлийн Чингэлтэй дүүргийн ХIII хороонд гэр шатсан дуудлага тус дүүргийн Онцгой байдлын газарт иржээ. Дуудлагын дагуу Гал түймэр унтраах, аврах 10 дугаар ангийн албан хаагчид тухайн газар очиход, иргэн С-ийн таван ханатай гэр, 2х2 метрийн хэмжээтэй амбаар бүрэн шатаж байсныг унтраасан байна.