Хэрэглээний Сэтгэл Судлалын Хүрээлэнгийн сэтгэл зүйч А.Тайванжаргалаас өсвөр насны хүүхдийн сэтгэл зүйн өөрчлөлт болон тэдний сэтгэл зүйг хэрхэн засах боломжтой талаар тодрууллаа.

-Өсвөр насны хүүхдүүд нэгнийгээ зүй бус үг хэллэгээр доромжилж, зодох нь түгээмэл болжээ. Тэдний  сэтгэл зүй юунаас болж өөрчлөгдөж байна вэ?

         -Нэгдүгээрт, өсвөр насны хүүхдүүдэд сэтгэл зүй болон бие махбодын эрчимтэй өөрчлөлт, хөгжил явагдах үе бий. Иймээс зарим тохиолдолд тохиромжгүй үг үйлдэл гаргах, өөрийгөө хэрхэн зөвөөр илэрхийлэхээ мэдэхгүй байх, харилцааны зөрчлийг шийдвэрлэж чадахгүй байх зэрэг асуудал тулгамдах магадлалтай. Нэг талаараа сөрөг зан байдал их байгаа юм шиг харагдаж байгаа ч нөгөө талаараа хүүхэд харилцааны ур чадварт суралцаж, болох болохгүй зүйлд суралцаж байдаг.

Хоёрдугаарт, нийгмийн орчин болон мэдээллийн хэрэгслийн нөлөө бий. Эргэн тойрон дахь хүмүүс болон мэдээллийн хэрэгслээр харсан, сонссон зүйлээ хүүхэд даган дуурайх хандлагатай. Тийм учраас сөрөг зан байдал, түрэмгийлэлд хүүхэд суралцсан байж болно.

Гуравдугаарт, сэтгэл зүйн хямрал, гэр бүл болон үе тэнгийнхэнтэйгээ харилцах харилцааны асуудлууд нөлөөлсөн байж болно. Хүн бүрд сэтгэл зүйн асуудал харилцан адилгүй тохиолдох ба тэрхүү сэтгэл зүйн асуудлаа хэрхэн шийдвэрлэх, даван туулахаа мэдэхгүй байгаатай холбоотой ийм төрлийн асуудлууд үүсэх магадлалтай.

-Сургуулийн насны хүүхдүүдийн зүй зохисгүй харилцааг  хэрхэн, яаж засах боломжтой вэ. Холбогдох байгууллага, эцэг эхчүүд  хэрхэн ажиллаж, анхаарах ёстой вэ?

           -Хүүхдэд сэтгэл зүйн боловсрол олгох, өөрийнх нь насанд гарах хямрал өөрчлөлт түүнийг хэрхэн даван туулахтай холбоотой мэдээллийг өгөх нь хамгийн үр дүнтэй. Асуудлыг хэрхэн шийдвэрлэхээ мэдэхгүй байгаа үед өөртөө болон бусдад хохиролтой арга хэлбэрийг хүүхэд сонгох нь түгээмэл. Тиймээс харилцааны ур чадвар, өөрийн сэтгэл хөдлөл мэдрэмжээ хэрхэн илэрхийлэх, бусдыг хэрхэн ойлгож мэдрэх тухай гэр бүлийн хүрээнд сургуулийн орчны хүрээнд мэдлэг, мэдээллээр хангах нь илүү үр дүнтэй.

-Сургуулийн насны хүүхдүүдийн зүй зохисгүй харилцаатай холбоотой ямар жишээ байна вэ?

          -Сургуулийн насны хүүхдүүдэд үе тэнгийнхэнтэйгээ харилцааны зөрчил гарах нь түгээмэл байдаг. Нэгэнтэй ойлголцохгүй байх, өөрийгөө илэрхийлж чаддаггүй. Үүнээс болж  өөртөө итгэлгүй, өөрийн үнэлэмж доогуур байх зэрэг асуудлууд үүсэх магадлалтай байдаг.