“Монголын жүдо академи”-ийн гүйцэтгэх захирал, ахлах дасгалжуулагч, Гэндэнгийн Бат-Эрдэнэ багш энэ өдөр мэндэлжээ. Тэрбээр жүдо бөхийн эх орон Япон Улсын дэг сургууль “япон школ”-оор Монгол хүүхэд, багачуудад чин сэтгэлээсээ жүдо бөхийн мөн чанарыг зааж буй багш, жүдо бөхийн зүтгэлтэн, дасгалжуулагч хүн билээ. Түүнийг япончууд “Гэндэн багш” хэмээн хүндэтгэн дууддаг. Г.Бат-Эрдэнэ багш японд жүдо бөхийн анхан шатны сургалт эхлүүлж, япон хүүхдүүдэд жүдо бөх зааж явсан анхны монгол дасгалжуулагч юм.

   Г.Бат-Эрдэнэ багш хүүхэд байх үедээ Дархан хотын МУГД  Н.Батлав багшийн удирдлага дор жүдо, самбо бөхөөр барилдаж эхэлсэн юм билээ. 2002 онд Япон Улсын “Токай” их сургуульд суралцахдаа японы жүдо бөхийн уламжлалаас чадах чинээгээрээ суралцаж, судалсан гэдэг. 2006 онд сургуулиа төгсөөд 2015 он хүртэл Япон Улсад жүдогийн клубд ажиллаж, япон хүүхдүүдэд жүдог анхан шатнаас нь эхлэн зааж байлаа. 2015 онд Монголдоо ирж “Жүдо академи”-д ажиллаж байна.