Хөл бөмбөгчин Г.Төгөлдөр "Арвис" клубийн хамтаар Монголын өсвөр үеийн цөөнгүй тэмцээнд амжилттай оролцож байсан билээ. Тэрбээр гэр бүлийн хамт Чех Улсыг зорьсон юм. Одоо Гантогтохын Төгөлдөр Чехийн "Ческе Будеёвице" клубт харьяалагдаж байна. Тэрбээр 20 настай. Түүнтэй "Ческе Будеёвице" клуб анхны мэргэжлийн гэрээг байгуулсан талаар мэдээллээ. Г.Төгөлдөр анх 2020 онд Чехэд хөл тавьж, орон нутгийн "Табор" клубт тоглож эхэлсэн бөгөөд 2022 онд "Ческе Будеёвице" түүний авьяас чадварыг анзаарч, өөрсдийн академид авсан байна.

      Шинэ орчин, хэлний бэрхшээл гээд багагүй саад тулгарсан ч Г.Төгөлдөр Чехийн 19 насны лигт анхны улиралдаа гурван гоол оруулсан. Харин дараагийн улиралд нь 14 гоол оруулж, мэргэн буучдын жагсаалтад гуравт бичигдэн, баг нь 5-р байрт бичигдсэн билээ. 2023 оны арваннэгдүгээр сард Чехийн дээд лигт ("Спарта Прага", "Славиа Прага", "Виктори Плзень" зэрэг томчууд тоглодог) анхны тоглолтдоо оролцсон.

       2024 оны хавар Монгол улсын Үндэсний шигшээ багт анх удаа дуудагдаж, Танзани, Азербайжаны эсрэг тоглосон. Өнгөрсөн оны тавдугаар сараас хойш талбайд гараагүй байгаа.  Г.Төгөлдөр энэ улирлын эхэнд үндсэн багийн хамт бэлтгэл хийж байгаад гэмтсэн бөгөөд тун удахгүй дээд лигийн үлдсэн тоглолтуудад оролцох боломжтой.