“Парис-2024” зуны 17 дугаар паралимпын наадам ес дэх өдрөө өнөөдөр үргэлжилнэ. Одоогийн байдлаар Монгол Улсын баг нэг алт, хоёр мөнгөн медальтайгаар 168 орноос 50 дугаар байрт бичигдэж байна.

        Өнөөдөр 16:00 цагт 12 дахь барилдаанд манай улсаас Үндэсний шигшээ багийн дасгалжуулагч Б.Нарантуяа, гавьяат тамирчин О.Ууганбаатар нарын удирдлага дор жүдо бөхийн эмэгтэйчүүдийн 70 кг-ын жинд Лхайжавын Туруунаа эхний тойрогт Шведийн бөх, Европын аварга, “Бээжин-2008”, “Лондон-2012”, “Рио-2016”, “Токио-2020” паралимпын наадмын оролцогч Дернхейм Гүдрич Николинатай барилдана.

       Энэ жингийн шигшээ барилдаан 22:00 цагт эхэлнэ. Л.Туруунаа нь 2022 оны ДАШТ-ээс мөнгө,  2023 оны Ази тивийн аварга шалгаруулах тэмцээнээс алт, “Ханжоу-2022” Азийн наадмаас хүрэл медаль хүртсэн тамирчин юм.