Монголын жүдо бөхийн холбоо 2022-2024 он буюу Токиогоос Парис хүртэлх зуны олимпын циклийн тайлангийн хурлаа зохион байгууллаа. Тус холбооны үйл ажиллагаа, шигшээ баг хамт олон дасгалжуулагч, тамирчдын амжилт ялалт, алдаа оноон дээр дүгнэлт хийв.

       Уг хуралд МЖБХ-ны ерөнхийлөгч Х.Баттулга, ХөдөлмөрийнБаатар, МУГД, Ардын багш, зөвлөх дасгалжуулагч Ч.Насантогтох, дэд ерөнхийлөгч Д.Цогтбаатар, Ерөнхий нарийн бичгийн дарга Б.Батгэрэл, Жүдо бөхийн холбооны ажилчид, Үндэсний шигшээ багийн ахлах дасгалжуулагч, МУГТ, МУГД  Х.Болдбаатар тэргүүтэй дасгалжуулагчид, Үндэсний шигшээ багийн тамирчид оролцов.

         2022-2024 онуудад ДАШТ-дэд оролцсон дасгалжуулагч, тамирчид тус бүрийн дүгнэлт тайлан, 2024 оны зуны олимпын наадамд оролцсон багийн дасгалжуулагчид, тамирчдын дүгнэлтийн талаар дэлгэрэнгүй ярилцав. Уг хурлын үеээр “Токио-2020”, “Парис-2024” хоёр зуны олимп дараалан “Үндэсний шигшээ баг”-ийг ахлан ажилласан Х.Болдбаатар амласан зорилт болох олимпын аваргыг дахин төрүүлэх, олимпын наадмын алтан медаль Монгол Улсдаа авчрах зорилго, ажлын үр дүнгээ хангалтгүй хэмээн үзэж албан ёсоор ахлах дасгалжуулагчийн ажлаас чөлөөлөгдөх хүсэлтээ холбооны ерөнхийлөгчид хүргүүллээ.

        Мөн 2024-2028 онуудад өсвөр, залуучуудын ангилалд олон улсын тэмцээнийг зохион байгуулах, залгамж тамирчид дээр анхаарахаа цохон тэмдэглэв. Албан ёсоор Лос Анжелесын олимпын цикл өнөөдрөөс эхэллээ гэдгийг цохон тэмдэглэв.