ӨӨРТЭЙГЭЭ "ТУЛАЛДАГЧ"

2024-08-30, 311

Түүнийг өөртэйгээ л илүүтэй "тулалдаж", өнөөдрийн олон амжилтыг гаргасан байх гэж боддог юм. Сүхбаатар аймгийн Эрдэнэцагаан сумын уугуул тэрбээр багадаа сэтгэлээр унасан үедээ гүүрэн дээр суугаад хөлөө унжуулчихдаг байсан гэдэг. Тэгээд өөрт тавгүй санагдсан бүхнийг голын урсгалд нэг нэгээр нь урсгаж, салхи салхилаад л босоод явахад сэтгэл нь сэргэчихдэг тухай ярьсан байдаг. Ингэж өөрийгөө тайвшруулж, анагааж сурсан болохоор сэтгэлзүйн хувьд хэдийнэ өөрийгөө бэлдчихдэг тамирчин тэр аж.

"Тулаан эхлээд нэг хоёр цохилт өнгөрсний дараа тайвширч, тулаандаа, тэр цаг мөчдөө очдог" гэсэн. Энэ бол Монголын UFC-ийн анхны тамирчин Д.Батгэрэл. Аав, ээж хоёр нь хилчин хүмүүс учир Эрдэнэцагаан сумынхаа Чоно голын хил дээр өссөн байна. Сумандаа наймдугаар ангиа төгсөөд, аймгийн төвийн Нэгдүгээр арван жилийн сургуульд нэг улирал хичээллэж, дараа нь нийслэлийн Хоёрдугаар сургуульд шилжин ирж, төгсжээ. Арван жилээ төгссөний дараахан Тагнуулын сургуульд орох гэж хоёр жил хүлээсэн боловч элсэлт аваагүй тул Шихихутаг хууль зүйн их сургуульд Бизнесийн эрх зүйч мэргэжлийг эзэмшсэн байдаг. Тэрбээр холимог тулаанчийн замналаа 2011 онд эхлүүлсэн бөгөөд Хятадын “Legend Fighting Championship” Монголын “MGL-1 Fighting Championship” Ranik ‘Ultimate Fighting Federation’ зэрэг холбоонд тулалдаж байжээ. Монголын тулааны шилдэг тамирчдын холбоо / MGL-1 Fighting Championship”-д таван тулаан хийж 66 кг болон кик боксын 65 кг жинд аварга цолыг хүртсэн билээ.

Анх UFC дэвжээнд гарах зорилгоо даган 2015 онд анх Америкийг зорьсон байдаг. Тэр UFC дэх эхний тулаандаа ялагдаж, түүнээс хойших гурван тулаандаа ялалт байгуулж чадсан юм. Багадаа хичээлийнхээ хажуугаар цагаа зөв зохицуулж сурах үүднээс спортоор хичээллэж эхэлсэн ч хэдийнэ амтанд нь орж, тэгээд бүр хамгийн амаргүй холимог тулаанаар амжилттай явна. Дараалан хожиж, нэг дэвжээнээ гарахаараа ширүүхэн дайрдаг болохоор ч тэр үү түүний хоч "талын шуурга".

Өөрийнхөө амжилтад ханахаас илүү өөрийгөө эрж хайж яваа тухай нэг ярьсан нь бий. "Би өөрийгөө олсон гэхгүй. Зорьж яваа зүйлийнхээ захаас нь барьсан төдий. Цааш амжилт гаргах гээд л явж буй хүн. Амжилтын хувьд ч өөрийнхөө хүссэн газар орж, чадах зүйлээ хийж яваа. Гэхдээ бүрэн чадахын тулд хичээж байна” гэжээ. Харин том уналт, ялагдал улам их хүчийг өгч, дараагийн тэмцээндээ илүүтэй бэлтгэгддэг гэсэн. Багаасаа өөрийгөө юунд зориулахаа мэддэг, хүсэл мөрөөдөл хаана байна, тийш тууштай зүтгэж, заавал амжилт гаргаж, түүний дараа амжилтаа ахиулах гэж дахин өөрийгөө бэлдэх зарчмаар өөрөө өөртэйгээ "тулалдаж", хамгийн хүчтэй өрсөлдөгч өөртэйгээ үзсээр, бусад олон тамирчдыг ялж, өдгөө нэрээ дуудуулж, амжилтаа гайхуулж яваа байх.

ӨӨРТЭЙГЭЭ "ТУЛАЛДАГЧ"

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.