МАН боловсон хүчингүй болчихсон юм шиг л аашилж байна. Гадаад харилцаа, дипломат албанд тэнцэх шижигнэсэн залуучуудад ажил олдохгүй үйлээ үзэж, эх орноосоо дайжиж байхад МАН-ын хэдэн хууччуул энд, тэндэхийн элчингийн зөвлөхийн суудалд суучихаад бааварлаж байна. Эсвэл “Унаач хүүхдүүдийг өвөл уралдуулахгүй, эрсдэлтэй” гэж дуугарсан мэргэжлийн боловсон хүчнээ халж хаяад, хүний эрхийн мэдрэмжгүй, хуучин гишүүн нь хүүхдийн байгууллагын хаалгыг цөм өшиглөөд ороод ирж байна. Монголчууд МАН-д өртэй, МАН хууччуулдаа өртэй юм шиг л өдөр, хоногууд өнгөрсөн сонгуулиас хойш үргэлжиллээ. Одоо ч болоогүй байна, томилгоо ч дуусаагүй байна.

            Тэгвэл МАН хууччуулдаа албан тушаал бэлэглэж амыг нь таглахын цаад учир  Ерөнхийлөгчийн сонгуультай холбоотой байж болзошгүй гэнэ. Хаяанд ирчихсэн байгаа Ерөнхийлөгчийн сонгуулиас айхдаа МАН-ын удирдлагууд гомдогсодоо эрхлүүлж, дэргэдээ аваад, амыг нь таглаж байгаа бололтой. Тэгээд бүүр болоогүй залуучуудаа буланд шахаад, шархлуулж байгаа сурагтай. Үнэндээ, Д.Сарангэрэлээс илүү Элчин сайдад зөвөлчих эрдэмтэй залуус, мэдлэгтэй боловсон хүчин Монголд байгаа шүү дээ. МАН-д байхгүй байж мэдэх юм.

            Одоогийн Ерөнхийлөгчийн аппарат ажиллаж байсан гишүүн асангууд буйдангийн хамгийн зөөлөнд нь суугаад, ар гэр, хүүхдүүдтэйгээ төрийн мөнгөөр өндөр хөгжилтэй оронд хөлөө жийхээр болсны учир нь мөн л Ерөнхийлөгчийн сонгуультай холбоотой аж. Ерөөсөө л Ерөнхийлөгчийн сонгуульд МАН бэлдэж, залуучууддаа биш, хууччуулдаа найр тавьж эхэллээ. Нэг үгээр бол өрөө төлж, амыг нь хамхиж эхэллээ гэсэн үг. МАН-ынхан хууччуулынхаа хөрөнгөөр өчнөөн жаалсан, одоо горыг нь монголчууд эдэлж байна.

         Саяхан ордын хонгилд МАН-ын хууччуул хэлхэлдэж, А.Ариунзаяа гишүүн сайд асан Д.Оюунхоролтой шивнэлдэж, гишүүн асан Б.Саранчимэг хурдаараа давхиж, Г.Мөнхцэцэг дөрвөн давхрын зүүн жигүүрт баруун солгойгүй давхиж яваа харагдсан. Үүний даруухан доор томилгоонууд эцэслэгдлээ. Тэд үнэндээ бялуугаа хувааж, албан тушаалдаа жинхлэгдэж байжээ. Өнгөрсөн сонгуулиар МАН-ын 30 гишүүн улс төрөөс “арчигдаж”, түүх болж үлдсэн. Улс төрөөс “явсан” МАН-ын 30 гишүүний зургаа нь гэмт хэрэгт холбогдож, хууль хяналтын байгууллагад шалгагдаж байсан тул тойрог авч чадаагүй. Тодруулбал, Ё.Баатарбилэг Хөгжлийн банкны хэргээр ачигдаж, Т.Аюурсайхан нүүрсний хулгайн хэргээр ял эдэлж, Ж.Мөнхбат АТГ-т шалгагдаж байхдаа БНСУ руу зугтааж, Б.Энх-Амгалан албан тушаалын хэргээр хоёр жилийн ял сонсож, Ж.Сүхбаатар ногоон автобусны хэргээр он дамжин шалгагдсан байдаг. Мөн Г.Амартүвшин гишүүн асан Хөгжлийн банкны хэрэгт яллагдагчаар татагдаж байсан тул тойроггүй үлдсэн байдаг.

УИХ-ын гиишүүн асан Б.Бат-Эрдэнэ, Сү.Батболд, Ц.Анандбазар, Б.Баттөмөр, Б.Жаргалмаа, Г.Мөнхцэцэг, Ц.Мөнхцэцэг, Ш.Раднаасэд, Ц.Сэргэлэн, Х.Болорчулуун, Н.Энхболд, Б.Саранчимэг нар тойроггүй үлдэж, намдаа хаягдсан. Сонгуулийн өмнө дээрх нэр дурдсан гишүүдийг аргалах гэж МАН-ынхан үйлээ үзсэн. Гэхдээ л үүнийхээ шанг эдгээр өдрүүдэд төлж байна.

Харин УИХ-ын гишүүн М.Оюунчимэг, Д.Өнөрболор, С.Чинзориг, Ц.Цэрэнпунцаг, Б.Баярсайхан, Ч.Хүрэлбаатар, Г.Ганболд, Г.Занданшатар, Д.Тогтохсүрэн нарт МАН боломж олгож, тойрог олгосон ч ард түмэн нясалчихсан. Ахиад сонгохгүй гээд хавсраад унагачихсан. Ард түмэн дургүйцлээ илэрхийлж, сонгоогүй ч МАН хууччуулдаа албан тушаал өглөө. Өөрөөр хэлбэл, МАН сонгуульд өвдөг шороодсон,  тойроггүй үлдсэн 14 хүндээ албан тушаал өгчээ. Тодруулбал,

-Д.Сарангэрэл- Монгол Улсаас Болгар Улсад суух Элчин сайдын зөвлөх

-Ц.Мөнхцэцэг- Монгол Улсаас Герман Улсад суух Элчин сайдын зөвлөх

-Б.Жаргалмаа- БНСУ дахь Хөдөлмөр, нийгмийн хамгааллын үйлчилгээний төвийн дарга

-Б.Энхболд- БНХАУ-д суух Элчин сайд

-Г.Амартүвшин- “Эрчист Монгол” ТӨХХК-ийн захирал

-Д.Тогтохсүрэн- “Монголросцветмет” ТӨҮГ-ийн захирал

-Б.Саранчимэг- “Хөшигийн хөндийн чөлөөт бүс”-ийн захирагч

-Б.Баярсайхан- Хүүхэд, гэр бүлийн хөгжил, хамгааллын ерөнхий газрын дарга

Г.Занданшатар- Ерөнхийлөгчийн Тамгын газрын дарга

            Г.Ганболд- Ерөнхийлөгчийн зөвлөх

            -Ц.Анандбазар-Хөлбөмбөгийн холбооны Ерөнхийлөгч

            -М.Оюунчимэг- “Монголросцветмет” ТӨҮГ-ын бүтээмж хариуцсан менежер зэрэг албан тушаалд томилогдоод байна.

Тэгвэл УИХ-ын гишүүний суудлаасаа бууж, тойрог ч үгүй үлдсэн Г.Мөнхцэцэг Элчин сайдын зөвлөхийн суудал эрж, сонгуульд нэр дэвшихээр албан тушаалаа өгсөн сайд асан Д.Оюунхорол албан тушаал хайж явна. Тун удахгүй томилогдох тохироотой биз ээ.