Улсын дээд шүүхийн нийт шүүгчдийн хуралдаан өнөөдөр боллоо. Хуралдаанаар Ардчилсан намын даргыг бүртгэх эсэх асуудлыг хэлэлцсэн юм. Тэгвэл энэ хуралдаанаар Ардчилсан намын даргаар Лу.Гантөмөрийг бүртгэсэн. Энэ талаар Ардчилсан намын гишүүд мэдээлэл хийлээ.

    АН-ын намын бүлгийн дарга С.Эрдэнэболд: Монгол Улсын Дээд Шүүхийн цахим хуудсанд Ардчилсан намын даргатай холбоотой албан ёсны мэдээ гарлаа. АН-ын УИХ дахь бүлэг эв нэгдлийн ажлын хэсэг санаачилж, УИХ-ын гишүүн Ж.Батсуурь ахалж, намын даргын сонгуулийг явуулсан. Үүнтэй холбогдуулж УДШ-ээс албан ёсны шийдвэр гарлаа. Эв нэгдлийнхээ төлөө зохион байгуулалттай ажилласан ажлын хэсэгтээ баярлалаа. Зарим талаар тодорхойгүй үйл явдал эцэс болж байна. Энэ мөчөөс эхлэн Ардчилсан нам эргэлзээгүй УДШ-ээр баталгаажсан нэг даргатай боллоо. Зөвхөн Ардчилсан намын дотоод намын зөрчлийг дуусгаж байгаа ажил биш Монгол Улсад сөрөг хүчин эргэн ирлээ. Цаашлаад АН үндэснийхээ эв нэгдлийг илэрхийлэх бодлогын хүчирхэг байгууллага болж, ард түмнийхээ өмнө тулгамдаж байгаа  асуудлыг шийдэж чаддаг. Ачааны хүндийг үүрч чаддаг, эрх, эрх чөлөөнийхөө төлөө зогсдог улс төрийн хүчин болох гараа эхэлж байна.