Засгийн газрын хуралдаанаар бод малыг бүртгэлжүүлэх хүрээнд 5.5 сая үхрийг ээмэгжүүлэхээр болсон талаар ХХААХҮ-ийн сайд Х.Болорчулуун мэдээлэл хийсэн. Улмаар 13 тэрбум төгрөгийн төсвөөр уг ажлыг хийнэ гэдгээ албан ёсоор мэдэгдээд буй. Үүнтэй холбоотой ХХААХҮ-ийн сайд Х.Болорчулуун мэдээлэл өглөө.

      Тэрбээр "Малыг индэксжүүлэн бүртгэх асуудал манайхаас гадна дэлхийн улсад байдаг. Манай улс бол дэлхийн 140 орон нэгдсэн Дэлхийн мал эмнэлгийн байгууллагын гишүүн улс. Манайхаас бусад бүх орон малаа идэксжүүлсэн буюу ээмэгжүүлэн бүртгэсэн байдаг. Тиймээс энэ ажлын бид хийх ёстой. Манай улсад 2008 онд Малын удмын сангийн тухай хуулийг батлан гаргасан. Ингэснээр мал бүрийг давхардалгүйгээр ялган таних тухай хуульчилсан байдаг. Үүнийг ХХААХҮ-ийн яам хийхээр зорьж байна. Үхэр ээмэгжүүлэхэд улсын төсвөөс санхүүжүүлэхгүй. Дэлхийн банкнаас гаргана. Дэлхийн банкны санхүүжилттэй, мал амьтныг эдийн засгийн эргэлтийг нэмэгдүүлэх төслийн хүрээнд хийхээр төлөвлөөд буй. Үүнд 13 орчим тэрбум төгрөгөөр хийхээр төсөвлөөд байшаа. Нэг үхэрт ойролцоогоор 1800-2000 мянган төгрөг ногдоно гэж тооцоолсон. Гэхдээ үүнийг тендер зарлан сонгон шалгаруулна. Төрийн худалдан авах ажиллагааны дагуу сонгон шалгаруулалт явна. 

       Ээмэгжүүлснээр мал эрүүл бол хүн эрүүл болно. Малын гарал үүсэл тодорхой болох юм. Манай махыг гадагшаа экспорлох гэхээр эрүүжүүлээгүй гээд авахгүй байна. 2023 оны нэгдүгээр сарын 1-нээс үйлдвэрийн аргаар бэлтгэсэн махыг хүнсэнд хэрэглэнэ гэж байгаа. Урьд нь манайхан ээмэгжүүлэх ажлыг хийж байсан. Чанаргүй, унадаг гэдэг асуудал гарч байлаа. Энэ удаад тодорхой стандарт тавина. Гадуур шүүмжлэл байна. Ганган хүнд гархи нэмэр гэгчээр нэг ээмэг зүүлгэчих мэтээр ойлгоод байна гэхдээ малаа эрүүлжүүлж байгаа гэдгийг ойлгох хэрэгтэй" гэлээ.