Засгийн газрын ээлжит хуралдаанаар хүнс, хөдөө аж ахуйн багц асуудлыг шийдвэрлэлээ. Улсын аварга малчин, хошой малчин, аварга саальчин, фермер, тариаланч гэх  шагналын асуудлыг хэлэлцлээ. Мөн хүнсний хангамж, аюулгүй байдалд авах арга хэмжээний талаар тогтоолын төсөл болон 2023 оны ноолуур бэлтгэлд зориулан олгох зээлийн талаар тогтоолын төслийг баталсан. Монголын Хөрөнгийн биржээр нүүрсний борлуулалт хийх талаар шийдвэр гарсан.  Энэ талаар Хүнс, хөдөө аж ахуй, хөнгөн үйлдвэрийн сайд Х.Болорчулуун мэдээлэл хийлээ.

            Тэрбээр “Хөдөө, аж ахуйн чиглэлээр бизнес эрхлэгч аж ахуй нэгжүүдэд зээлийн хүүгийн татаас олгоно. Монголбанкны бодлогын хүү хоёр хувиар өссөн учир 10.65-аас 13 хувь болгосон. ААН-үүд банкаас 17-18 хувийн хүүтэй зээл авсан тохиолдолд Засгийн газраас 13 хувийг даана. Мөн хаврын тариалалтын үрийн үнийг 30 хувь, ногооны үнийг  80 хувиар хөнгөлөх шийдвэр гаргалаа. Ер нь үрийн буудайн үнийг олон жил хөнгөлж ирсэн. Тариаланчдаа дэмжээд байвал тэд урамшина. Хоёр жилийн хугацаанд зоорийн асуудлыг шийдэж чадвал хүнсний ногоог 100 хувь дотоодоосоо хангах боломж бүрдэнэ. Мөн нийт үхэр сүргээ ээмэгжүүлж, цахим бүртгэлд оруулна. Үүний дараа малын гарал үүсэл тодорхой болохоос гадна малын хулгай буурна. Мөн улсын аварга малчин 140, тариаланч 12, тариалан эрхлэгч 21 тодорлоо" гэв.