Иргэдийн эсэргүүцлийн жагсаал тав дахь өдрөө үргэлжилж байна. Жагсагчид эрх баригчдыг “Төрийн ордны гадаа гарч ир. Нүүрсний хулгайчдыг зарла” хэмээн шаардаж байгаа. Тэгвэл УИХ-ын гишүүд иргэдийн жагсаалаас зугтаж, Төрийн ордон эзгүй байгаа талаар зарим хэвлэл мэдээлж байна. Тэр бүү хэл УИХ-ын гишүүд өрөөнийхөө үүдний хаягийг өөрчилж, нэр бичсэн хаягаа шошгоо арилгаж, өрөө нь эзгүй байгаа гэх мэдээлэл бий.

Бид “Түр түлээ, ганц хором” буландаа УИХ-ын гишүүд өнөөдөр хэдэн цагт Төрийн ордноос гарсан талаар заримаас нь тодрууллаа. 

УИХ-ЫН ГИШҮҮН Г.ГАНБОЛД: Ордноос гаръя гэж бодохгүй байна

1. УИХ-ЫН ГИШҮҮН Г.ГАНБОЛД:

-Би одоогийн байдлаар (20:30 цаг) Төрийн ордонд байна. Одоогоор гарах цаг тодорхойгүй учраас байж л байна даа. Мөн иргэдийн жагсаал одоо харьцангуй гайгүй болж байх шиг байна. УИХ-ын гишүүд түр хорооны хуралтай, ажил ихтэй байлаа, өнөөдөр. Ер нь байнга шөнө хүртэл сууж ажиллаж байгаа шүү дээ. Би одоохондоо гаръя гэж бодохгүй байна.

УИХ-ЫН ГИШҮҮН Н.НАРАНБААТАР: Төрийн ордноос 18:00 цагт гарсан

2. УИХ-ЫН ГИШҮҮН Н.НАРАНБААТАР:

       -Би өнөөдөр 18:00 цаг хүртэл ажилтай байлаа. Тэгэхээр тэр цагийн хавьцаа Төрийн ордноос гарсан гэсэн үг. Ер нь өмнөх өдрүүдэд ч 18:00 цагт ажлаасаа гардаг.

УИХ-ЫН ГИШҮҮН Б.БЕЙСЕН: ОРДНЫ ХОЁР ТАЛЫН ХААЛГА ХААЛТТАЙ УЧРААС ОДОО ХҮРТЭЛ ГАРЧ ЧАДАХГҮЙ БАЙНА

3. УИХ-ЫН ГИШҮҮН Б.БЕЙСЕН:

       -Чуулган хуралдаж дуусаад, би өрөөндөө ажилтай байлаа. 19:00 цаг хүртэл ганц, хоёр юм бичиж, сууж байгаад гараад иртэл Төрийн ордны хоёр талын хаалга хаалттай байсан. Хаалга хаалттай учраас одоо хүртэл гарч чадахгүй байна.

САНГИЙН САЙД Б.ЖАВХЛАН: ЦАГАА БҮРТГҮҮЛЭХ ШААРДЛАГАГҮЙ

4. УИХ-ЫН ГИШҮҮН Б.ЖАВХЛАН:

-Миний Төрийн ордноос хэдэн цагт гарсан хэнд хамаатай вэ. Бид чинь ажлын цагаар ажлын байран дээрээ байж байдаг шүү дээ. Цагаа бүртгүүлэх шаардлагагүй

УИХ-ЫН ГИШҮҮН Б.ЭНХ-АМГАЛАН: ТӨР УЛС ИЙМ БАЙХАД ГАРААД ЗУГТАЖ БОЛОХГҮЙ

5. УИХ-ЫН ГИШҮҮН Б.ЭНХ-АМГАЛАН:

     -Би одоо хүртэл Төрийн ордноос гараагүй байна. Бид ажил ихтэй өрөөндөө сууцгааж байна шүү дээ. Хэдэн цагт ордноос гарахаа мэдэхгүй. Төр улс ийм нөхцөл байдалтай учраас гараад зугтаж болохгүй шүү дээ.

УИХ-ЫН ГИШҮҮН Г.ТЭМҮҮЛЭН: ОРДНООС ГАРААГҮЙ БАЙНА

6. УИХ-ЫН ГИШҮҮН Г.ТЭМҮҮЛЭН:

-Одоогоор ордноос гараагүй байна. Хэзээ гарахаа ч мэдэхгүй байна. Жагсагчдаас айсандаа гарахгүй байгаа юм биш шүү. Бид ажлаа хийгээд л байж байна.

УИХ-ЫН ГИШҮҮН Ц.СЭРГЭЛЭН: Чуулган тарахаас 20 минутын өмнө гарсан

7. УИХ-ЫН ГИШҮҮН Ц.СЭРГЭЛЭН:

     -Би өнөөдөр 18:00 цагийн үед Төрийн ордноос гарлаа. УИХ-ын чуулган өглөөнөөс хойш хуралдсан. Чуулган дуусахаас 20-30 минутын өмнө би гарсан. Гадаа чухал ажилтай байсан учраас чуулганы хурлыг бүрэн дуусгаж амжилгүй, саналаа өгчихөөд гарлаа. Сүүлийн асуудал хэлэлцэж байхад нь гарсан гэсэн үг дээ. Өдөр бүр харьцангуй учраас Төрийн ордноос гарах цаг тодорхойгүй байдаг.

Б.ЖАРГАЛМАА ГИШҮҮНИЙ ТУСЛАХ: ГИШҮҮН 20:00 ЦАГТ ГЭРТЭЭ ХАРЬСАН

8. УИХ-ЫН ГИШҮҮН Б.ЖАРГАЛМААГИЙН ТУСЛАХ:

     -Гишүүн өнөөдөр 16:00 цаг гээд Төрийн ордноос гарсан. Тэгээд дүүрэг, тойрогтоо ажиллаж, 20:00 цагийн үед гэртээ харьсан. Тодруулбал, Сонгинохайрхан дүүрэг, Эмээлт, Тахилтад цахилгааны ажлын асуудлаар хөөцөлдөж, ажилласан.

УИХ-ЫН ГИШҮҮН Ж.БАТСУУРЬ: ЭРҮҮЛ МЭНДИЙН ШАЛТГААНААС БОЛООД АЖИЛДАА ОЧООГҮЙ

9. УИХ-ЫН ГИШҮҮН Ж.БАТСУУРЬ:

-Би энэ долоо хоногт эрүүл мэндийн шалтгааны улмаас ажилдаа очиж чадаагүй. Мэс засалд орж, эмнэлэгт хэвтэж байна.