УИХ-ын чуулганы нэгдсэн хуралдаанаар  Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийж байна.

Энэ үеэр УИХ-ын гишүүн С.Одонтуяа "Энэ хууль чинь Үндсэн хууль зөрчөөд байгаа. Цаашдаа ингээд явж болохгүй. Гол нь манай намынхан энэ хуулийг яагаад эсэргүүцсэн бэ гэвэл нэгдүгээрт, энэ хуулийнхаа талаар тайлан тавих байсан. Мөн хариуцлага халдсан хүмүүст яаж хариуцлага тооцсон бэ. Ажлаа мэддэг хүмүүсийг энэ хуулиар далимдуулж, халсан шүү. Хандив тусламжийн талаар мэдээлэл алга. Бусад орнууд вакцин гараагүй байхад халдвар авч, нас барсан. Гэтэл манайд вакцин гарсан хойно халдвар тархаж байна." гэлээ.

Энэ талаар УИХ-ын гишүүн Б.Баттөмөр "Хуулийн төслийг хэлэлцэх явцад хууль зөрчиж байгаа талаар санал гарсан. Бид ажлын хэсэг дээр яриад Эрүүл мэндийн даатгалын сангийн хөрөнгийг Засгийн газар дангаар зарцуулах эрх авах нь боломжгүй гэж үзсэн. Ингээд Засгийн газраас төсвийн тодотгол хийж байгаа учраас энэ хүрээнд асуудлаа зохицуулах нь зүйтэй гэж үзсэн" гэлээ.