Улсын их баяр наадмын нээлтийн найруулагчаар ажиллаж байсан Төрийн соёрхолт, гавьяат жүжигчин Д.Сосорбарам энэ жилийн наадмыг эсэргүүцэж буйгаа цахим хуудастаа илэрхийлжээ.

Тэрбээр “Хэрэв би энэ жил наадмын найруулагчаар ажиллахаар тохоогдсон бол шууд ажил хаяж, уран бүтээлчдийнхээ эрүүл энх амьдралыг дээдлэх байсан.Уг нь найруулагч дүү Н.Наранбаатар, Г.Цоггэрэл хоёр руу залгаж, санал хүсэлтээ дуулгасан л юм сан. Хүн амьд байх чухал шүү. Хэзээ ч наадаж болно. Уран бүтээлчид өөрийгөө хамгаалах бүрэн эрхтэй шүү. Үндсэн хуулиар олгогдсон амьд байх, амьдрах эрхээ эдлээсэй л гэж уриалъя. Он удаан жил бүтээх туурвихын төлөө өөрийгөө бод, өөрийгөө хайрла уран бүтээлч дээ. Ингэж л зөвлөх байна даа. Бод. Тунгаа. Сайтар эргэцүүл. Нам төрөөс өмнө урлаг байсан юм шүү. Сайн чадвартай бүтээлч сэтгэгчид л төрийн мунхаглалыг сөрж чаддаг юм даа. Би ийм л хүн. Төрийн зарц, боол болсон найруулагч нараа орхи, биеэ гамна, хайрла гэж бүх уран бүтээлчдийг өмөөрчихье. Цаг бүх талаар цөвүүн байна. Урт удаан жил туурвихаа л бод. Аав ээж, амраг хань, алагхан үрсээ хайрла. Бас ахиад хэлье өөрийгөө хайрла” хэмээн бичжээ.