Энэ удаагийн “Оюунт Монгол” буланд кино зураглаач, зурагчин Э.Санчир сүүлийн жилүүдэд уран бүтээлээ туурвисан онцлох 10 эмэгтэй найруулагчийн бүтээлийг нэрлэлээ.

1.Нүүдэлчний нутаг (2020) – Найруулагч Клое Жао (БНХАУ)

“Нүүдэлчний нутаг” бүтээл энэ жилийн  Оскарын наадмын дээд шагнал, шилдэг найруулагч, шилдэг эмэгтэй гол дүрийн шагналыг хүртлээ. Хятадын залуу найруулагч Клое Жао шилдэг найруулагчийн шагнал хүртсэн анхны ази эмэгтэй болжээ.

Уг бүтээл нь ижил нэрт номоос сэдэвлэсэн бөгөөд уугуул Америкчуудыг бодит төрхийг гаргаж ирсэн билээ.

2. Хар сүү (2020) – Найруулагч Б.Үйзэнмаа (Монгол-ХБНГУ)

ХБНГУ-д уран бүтээлээ туурвиж буй найруулагч Б.Үйзэнмаа өнгөрсөн онд шинэхэн уран бүтээлээ туурвисан билээ. Тэрбээр Мюнхений кино урлагийн сургуулийг төгссөн жилдээ Баварийн шилдэг залуу найруулагчийн шагналыг “Над руу битгий ингэж хар” бүтээлээрээ гардсан юм. Түүний шинэ бүтээл Монголд зураг авалтаа хийсэн төдийгүй уламжлал хийгээд шинэчлэлийн асуудлыг хөндсөн юм.

3. Үдэхүй (2019) – Лулу Ванг (Хятад- АНУ)

Уг бүтээл Хятадын уламжлалт ойлголт хийгээд хүний дотоод шинжийн талаар хөндсөн бүтээл билээ. АНУ- д амьдардаг Билли эмээгийнх нь бие муу байгаа гэдгийг сонсоод Хятад руу эмээгээ бараадан ирнэ. Тийм хэдий ч гэр бүлийнхэн нь эмээд нь хэдхэн өдрийн нас үлдсэнийг нь хэлэхгүй гэж шийднэ. Харин Билли эмээгээ нас бартлаа хийхийг хүссэн зүйлээ хийж магадгүй учир хэлсэн нь дээр гэж бодсоноор зөрчил үүсэх аж.

4. Үхсэн гахай (2018) – Кети Яанг (Хятад-АНУ)

Хятадын найруулагч Кети Яанг уг киноны тухай “Би Шанхайд төрж, яг л энэ кинон дээрх шиг зүйлийг мэдэрсэн болохоор хэлэхийг хүссэн” хэмээн анхны бүтээлийнхээ талаар хэлж байв. Тус киног 2013 онд голд16 мянга гаруй гахай үхсэн хэргээс сэдэвлэн бүтээсэн юм.

5. Эрээн далт бяцхан шувуухайн үүр (2018) – Ким Бора (БНСУ)

Эл бүтээл нь найруулагчийн анхны бүрэн хэмжээний кино бөгөөд гарсан жилдээ Бусаны кино наадам болон олон улсын кино наадмуудад амжилттай оролцож байлаа.

1994 оны Сөүл хотод үйл явдал өрнөх бөгөөд Сэүнсүгийн гүүр нурдаг жил 14 настай охин хайр дурлалаа хайна.

6. Капернаум (2018) - Надин Лабаки (Ливан)

Ядуусын хороололд амьдардаг 12 настай Зейн хүү хүчирхийллийн хэргээр шоронд хоригдоно. Төрсний гэрчилгээ хэзээ ч авч байгаагүй учир түүний төрсөн өдрийг хэн ч мэдэхгүй. Хүү хоригдож буй хугацаандаа аав ээжийгээ шүүхэд өгөх аж. Тус хүчтэй бүтээлийг үзэхийг санал болгож байна.

7. Галд дүрэлзэж буй бүсгүйн хөрөг (2019) - Селин Сьямма (Франц)

Хэзээ ч харж байгаагүй нэгэнтэйгээ гэрлэхээр болсон авхайн хөргийг зурахаар холоос зураач ирэв. Ийнхүү тэдний дунд ер бусын хайрын түүх үргэлжилнэ. Кино найруулагч Селин Сьямма нь уг бүтээлээрээ кино сонирхогч, шүүмжлэгчдээс өндөр үнэлгээ авсан бүтээл билээ.

8. Систем сүйтгэгч (2019) - Нора Фингшайдт (ХБНГУ)

Эцэг, эхийн хайраар дутсан есөн настай охины гаргах үйлдэл Германы тогтсон системд тохирохгүй. Түүнийг ээж нь ч асран халамжлахаас татгалзана. Залуу найруулагч Нора Фингшайдтын уг бүтээл олон улсын кино наадамд амжилттай оролцсон төдийгүй нэрийн хуудас болсон бүтээл билээ. Найруулагч зохиолынхоо санааг бодит охиноос сэдэвлэн бичсэн байна.

9. Сувинер (2019) - Жоанна Хогг (Их Британи)

1980-аад оны кино урлагийн оюутны тухай хүүрнэнэ. Найруулагч Жоанна Хоггын кино зохиолоо бичиж, найруулж, Тильда Свинтон дүр бүтээсэн тус киног санал болгож байна.

10. Жинхэнэ эхчүүд (2020) – Наоми Кавасэ (Япон)

Үр тогтоолгох удаан хугацааны, үр дүнгүй эмчилгээний дараа Сатоко бүсгүй хань Киёказутайгаа хамт хүүхэд үрчлэхээр шийддэг. Асато хүүг үрчлэн аваад нөхөр хүүдээ бүрэн анхаарахын тулд Сатоко ажлаасаа гарах ч нэг л өглөө хүүгийн ээж гэх бүсгүй залгана.