Энэ удаагийн “Оюунт Монгол” буланд Япон Улсад арт менежмент мэргэжлээр суралцсан, “Кракко” арт галерейн куратор Д.Төмөрсүх онцлох 10 контемпорари уран бүтээлчийг нэрлэлээ.

1.Жефф Кунс ( 1955-)

        Хамгийн түрүүнд Америкийн контемпорари артист Жефф Кунсийн онцолж байна. Тэрбээр Поп урлагийн томоохон төлөөлөгч бөгөөд “Balloon” баримлуудаараа ихээхэн алдаршсан билээ. Түүний материалын сонголт нь баримлын тогтсон ойлголтыг ихээхэн өөрчилсөн гэж үздэг. Түүний хамгийн алдартай бүтээлүүдээс нэрлэвэл

• Michael Jackson and Bubbles ( 1988 )
• Made in Heaven ( 1990-1991 )
• Puppy (1992 )
• Rabbit
• Balloon dog гэх мэт олон бүтээл бий.

2019 онд түүний “Rabbit” бүтээл нь “Кристис”-ийн дуудлага худалдаагаар 91,1 сая доллароор зарагдаж байсан түүхтэй. Тэрбээр мөн дэлхийн олон нэр хүнд бүхий брендүүдтэй хамтран ажилладаг билээ.

2. Такаши Мураками ( 1962-)

       Такаши Мураками нь Японы алдартай контемпорари уран бүтээлч билээ. Тэрбээр япон уламжлалт соёл дээр суурилан орчин цагийн поп соёлыг хөгжүүлж байгаа уран бүтээлч юм. Уламжлалт болон коммершель урлагийн хослолын гайхалтай олж харж чаддагаараа алдартай. Түүний хувьд Япон гэхээс илүүтэйгээр Нью-Йорк-д илүүтэй олон үзэсгэлэнгээ гаргасан байдаг.

Түүний хамгийн алдартай бүтээлүүдээс нэрлэвэл

• Chaos (1999)
• Flower Ball (2002)
• Flower matango (2006)
• 3-Meter Girl (2011)
• The 500 arhats (2015) гэх мэт олон бүтээл нэрлэж болох бөгөөд түүний нэрийн хуудас болсон солонгорсон наран цэцгийн дүрслэл л маш алдартай.

Одоогоор эх хувиараа хамгийн үнэтэй зарагдсан бүтээл нь "My lonesome cowboy, (1998)” юм. Тухайн үеийн үнэлгээгээр дуудлага худалдаагаар 15,161,000 ам.доллар хүрсэн.

3.Ай Вей Вей ( 1957-)

        Хятадын контемпорари артист, удам дамжсан тэрс үзэлтэн хэмээн алдаршсан энэ уран бүтээлчийн түүх намтар өөрөө урлаг юм. Соёлын хувьсгалын сүүлийн жилүүдэд Америкийн нэгдсэн улсад амьдарч, урлагийн боловсрол олж авсан гэдэг. Тэрбээр Хятадын Засгийн газрын бодлого үйл ажиллагаанд үргэлж шүүмжлэлтэй ханддаг төдийгүй түүнийгээ өөрийн уран бүтээлээр илэрхийлдэг билээ. Түүний бүтээлүүдийн гол зорилго нийгэмд “шүгэл үлээх” үүрэг гүйцэтгэхэд оршино. Харин үүнийг нь Хятадын Засгийн газар үргэлж шахаж хавчиж, 2011 онд Ай Вей Вейг 81 өдрийн хорих ял өгч шоронд хүртэл хорьж байлаа. Өдгөө Герман Улсад улс төрийн орогнолоор амьдарч уран бүтээлээ хийж байна.

Түүний хамгийн алдартай бүтээлүүдээс:

• Sunflower seeds (2008)
• Dropping a Han Dynasty Urn (1995)
• Forever (2008)
• Coca-cola
• Remembering гэх мэтээр олон бүтээлийг нь нэрлэж болно.

4.Дэвид Хокни ( 1937-)

       Тэрбээр XX зууны Британи нөлөө бүхий зураачдын нэг билээ. Түүний “serial painting of swimming pools” болон “Portraits of friends” бүтээлүүд нь олон нийтэд маш ихээр танигдсан. Бүтээлүүдэд нь Пабло Пикассо, Анри Матиссе нарын нөлөөлөл их орсон гэж үздэг. Мөн амьдралын хэв маяг, нарны хурц гэрлийг өөрийн бүтээлдээ шингээдэг уран бүтээлч билээ...

Түүний маш олон бүтээлийг энд нэрлэж болох боловч хэт нуршуу болох учир хамгийн үнэтэй нэгэн бүтээлийг нэрлэе.

“Portrait of an Artist ( pool with Two Figures 1972)” бүтээл нь 90,312,496 ам.доллароор зарагдсан.

5.Кусама Яёи ( 1929-)

         Японы “супер” уран бүтээлчдийн нэг тэрбээр өдгөө 90 насыг давж яваа ч уран бүтээлээ хийсээр, гайхалтай үзэсгэлэнгүүд гаргасаар байгаа билээ. “Усан бөмбөлгийн хатан хаан” хочтой тэрбээр уран зураг, баримал, филм, инстоляц зэрэг олон төрлөөр бүтээлүүдээ хийдэг.  Орчлон ертөнцийн философийг урлагаар илэрхийлэхийг хичээдэг гэдэг. Учир нь түүний бүтээлүүд маш олон цэгэн бөмбөлгүүд дүрслэгддэг ба энэ нь орчлон ертөнц одод эрхсийг илэрхийлдэг байна. 1993 онд Венецийн “Биенналь”-д оролцсоноос хойш алдар нэр нь түгсэн байна.

Түүний алдартай бүтээлүүдээс дурдвал:

• Infinity Mirror Room 1965
• Pumpkin Soft Sculpture
• Hi, Konnichiwa, Mikita-Chan 2004 зэрэг олон бүтээл нэрлэгдэнэ

Хамгийн үнэтэй зарагдсан бүтээл нь “INTERMINABLE NET #4” ( 1959 )

7,953,654 ам.доллароор зарагдсан.

6. Бэнкси

         Бэнски нь Их Британийн урбан ( urban ) артист бөгөөд нийгэм, улс төрийг онилсон шүүмжлэлээ урлагаар, тэр тусмаа граффитаар илэрхийлэн гаргадгаараа алдартай билээ. Түүний бүтэн нэр, нас гэх мэт хувийн мэдээлэл одоог хүртэл тодорхой бус. Тэрээр урлаг дахь уламжлалт ойлголтыг тун чадварлагаар үгүйсгэн шүүмжилж чаддаг төдийгүй гоо зүйн тухай уламжлалт ойлголтод нөлөөлж чадсан байна. Түүний бүтээлүүд ихэнхдээ гудамжинд төрдөг гэдэг. Мөн “харх” шиг нууцлаг амьдралтай бөгөөд үүнийгээ илэрхийлж буй мэт хархыг өөрийн бүтээлийн гол дүрээр сонгох нь олонтаа.

       2018 онд түүний бүтээл 1.4 сая ам.доллароор зарагдсан явдал дуудлага худалдааны сегментэд цоо шинэ концепцыг бий болгосон гэдэг.

7. Kaws ( 1974-)

     Тэрбээр Америкийн граффит артист, тоглоомын дизайнер бөгөөд хүүхэлдэйн киноны дүрүүдэд суурилсан өөрийн бүтээлээрээ поп соёлыг бүтээж буй уран бүтээлч юм. Сүүлийн арав гаруй жилд алдар нэр нь цуурайтаж байгаа энэхүү уран бүтээлч дүрүүдийнхээ нүдэнд үргэлж "х" тэмдэглэгээ дүрсэлдгээрээ олон нийтэд танигдаж, үүгээрээ ч олон үзэсгэлэн хийж амжсан байна.

Түүний хамгийн үнэтэй бүтээл нь "The Kaws Album (2005)”, 14,773,492 ам.доллароор зарагдсан байна.

8. Дэмьен Херст ( 1965 )

          Их Британийн консептуал уран бүтээлч тэрбээр 1990 оны эхээр нэр алдар нь түгж эхэлсэн бөгөөд “Британийн залуу артистууд” хөдөлгөөний нэгэн хэсэг болж байв. 1995 онд Британийн контемпорари урлагийн томоохон шагнал болох “Turner Prize” -аас шагнал хүртэж байлаа. Тэрбээр "Өөрийн бүтээлээр дамжуулж бусдыг сонсох хэрэгтэй. Учир нь, үзэл бодол өөрчлөгдөж болно" хэмээн үздэг уран бүтээлч. Дэмьен Херст гайхалтай бүтээлүүдээрээ асар богино хугацаанд нэр гарсантайгаа адил томоохон уналтад гэнэт орсон байдаг.

Түүний онцлох уран бүтээлүүд:

• The Physical Impossibility of death in the mind of someone living (1991)
• Mother and child (1993)
• The Cow (2009)
• For the love of God (2007) зэрэг бүтээлүүдийг нэрлэж байна.

Хамгийн үнэтэй зарагдсан бүтээл нь "Lullaby springs (2002)" 19,230,922 ам.доллароор зарагдсан.

9. Жан Мишель Баския ( 1960-1988 )

        Мэргэжлийн сургууль төгсөлгүй ч маш богино цаг хугацаанд гайхамшигтай бүтээлүүдийг өөрийн оюунаас ургуулж чадсан уран бүтээлч бол яах аргагүй Брүүклин хотоос гаралтай “SAMO” хэмээх нууц нэрээр уран бүтээлээ хүргэдэг Жан Мишель Баския юм. Тэрээр Брүүклин хотын нийгмийн амьдралыг толь мэт өөрийн бүтээлдээ тусгадаг ба маш олон хэллэгийг нэг дор ашигладаг байв. Түүний бүтээлүүд өдгөө маш өндөр үнээр үнэлэгддэг бөгөөд 2017 онд "Untitled (1982)” бүтээлийг нь Японы тэрбумтан Маезава Яасүки 110.7 сая ам.доллароор худалдаж авсан явдал XX зууны сүүлийн хагаст зурагдсан бүтээлүүдээс хамгийн үнэтэй зарагдсан амжилтыг тогтоогоод байгаа билээ.

10. Энди Уорхол ( 1928-1987 )

      Энди Уорхол нь XX зууны гайхамшигтай уран бүтээлчдийн нэгд зүй ёсоор нэрлэгддэг бөгөөд контемпорари урлагийн хөгжилд маш том хувь нэмэр оруулсан уран бүтээлч юм. Тэрээр “Поп арт” хөдөлгөөн үүсэхэд голлох лидер байсан төдийгүй өдгөө нэр алдарт хүрээд байгаа маш олон уран бүтээлчид дэмжлэг үзүүлдэг байлаа. Тэрээр XX зууны түүхэн дэх алдартнуудын хөрөг зургийг поп артын хэллэгээр, барлах технологи ашиглан бүтээсэн юм. Мөн видео арт, саун арт хийж байсан уран бүтээлч билээ.