Монголын Зохиолчдын эвлэлийн шагналт яруу найрагч Б.Төгсжаргалын “Кофетой шүлгүүд”  номыг танилцуулж байна. Тэрбээр өмнө нь  “Сарны өвөрт хонолоо”, “Бүсгүй хүн шүлэг л байдаг”, “Нутаг ертөнц”, “Бясалгагч охины зүүд” номуудаа уншигчдадаа хүргэж байсан билээ.

“...Аяга кофе уусны дараах амсхийлтээс шүүрч шүлэглэсэн минь энэ. Шал дэмий ч байж мэднэ. Гэхдээ тэр амсхийлт бүхэн эргээд ирэхгүй. Шүлэг болгон дэвтэрт минь үлдэж гэж бодохоор энэ амьдрал бас үнсмээр санагддаг шүү...”

Кофетой зурвасаас...

Ингээд уншигч танд кофетой шүлгүүдээс хүргэе.

                              ***

ЗАЛБИРЧ БАЙГАА ИЖИЙ МИНЬ ДЭЭ

Ургаж байгаа нарны сацраг шиг хацартай

Урсаж байгаа дөлгөөн мөрөн шиг аальтай

Хайрлаж байгаа бүхний нүд шиг бодолтой

Халширч суудаггүй түмнээс гэгээн тавилантай

 Залбирч байгаа ижий минь дээ...

                           ***

ТАЖ МАХАЛААС БУЦАХАД

 Алсын алсад сүндэрлэх цав цагаахан гуниг

Алдарт Таж Махалыг зорин зорин очлоо

Ариун хайрын титэм гэж ертөнц даяар цуурайтавч

Амьдрал үхэл хоёрыг адилхан гэж сануулах мэт

Таж Махалын гуниг хаврын салхи шиг шуугиж

Таж Махалын уй тасарч үлдэлгүй үргэлжилнэ...

                                ***             

                  АЙ ХАНДМАА

Ай, Хандмаа гэж хэлэхэд

Ардын дууны эхлэл ч юм шиг

Алтана харгана үйслэх мэт

Ямархан гэгэлгэн гээч

Аглагхан талын өвс бүхэн бөхөлзөөд

Аравдугаар сарын сүүлээр

Бороо орох мэт

Ямархан уйтай гээч...

                      ***

БОДЬ МОДНЫ НАВЧИС

...Цаг хугацааны галт тэрэг өртөө болгон дээр зогсовч

Цаглашгүй энэ орчлонгоос буцах эцсийн зогсоол хаана юм бэ

Цаанаа л нэг уйтай бодь модны навчаа тэврэн байхуйяа

Цамцаа дэрвүүлэн омголон явсан ахтайгаа дахиад нэг уулзах мэт боллоо.

                               ***            

ХЭН Ч НАДАД ДУРЛААГҮЙ БАЙХАД...

 Хэн ч надад дурлаагүй байхад

Би хэн байсан юм бол?

Хэлбэр, агуулга, тусгал

Ер бусын тунгалаг горхины чимээ шиг

Инээмсэглэл минь ямархан байсан юм бол?

Эхний цас унаагүй өдрүүд шиг

Эрх цэнхэр нүдэн муураа “Ангир” гэж нэрлээд

Хэн ч надад дурлаагүй байхад

Хээ хуаргүй даашинзны минь

Хормой дэрвэх шиг гоо үзэсгэлэн

Хэнийх байсан юм бол оо?...

                          ***

Бороонд  нор...

Эргээд л 13 настай

Эрх охин болоод

Эрээн даашинзныхаа

Хормойг дэрвүүлэн

Энэ хорвоог мөнх мэт сэтгэн

Бороонд нор

Бороонд нор...

Зуун жилийн өмнө байсан хүмүүс

Зулзаган хус болоод ургах мэт

Тэр хусны дор

Тэргэл сартай ярьж

Тэвэрхэд чинь

Дулаацдаг байсан