Энэ удаагийн "Оюунт Монгол” буландаа судлаач, эдийн засагч О.Гомбожавыг урьж оролцууллаа. Тэрбээр СЭЗИС, БНЧУ-ын Масарикийн их сургуулийг бизнес, санхүүгийн удирдлагаар төгссөн. 2010 оноос сонирхлоороо “Монсудар” компанитай хамтран уран зохиол, манлайлал, улс төр эдийн засгийн чиглэлээр “Twilight” цувралын “Үүрийн гэгээ”, “Галаар наадсан охин”, “Шок номлол”, “Үхэж өгдөггүй хачин Неолиберализм” зэрэг ном орчуулж, уншигчдын хүртээл болгоод байна. Манай зочин О.Гомбожав хүүхдэд зориулсан мэт боловч насанд хүрэгчид байнга уншиж, үзэж байвал зохих 10 контентыг нэрлэлээ.

1. Антуан де Сэнт-Экзюпери-Бяцхан хунтайж (1943)

Насанд хүрсэн хүн болгон жилдээ нэг удаа энэ номыг уншдаг бол энэ дэлхий ертөнц сайн сайхнаар бялхаж эхлэх байх даа гэж бодогддог юм.

2. М.Пришвин -Нарны сан (1945)

Самар түүхдээ модоо цохиж, гэмтээж байгаа тухай шуугиан дэгдэхэд хүүхэд байхдаа энэ номыг бүгдээрээ уншсан бол гэж бодогдож билээ.

3. С. Пүрэв “Чулуун хаалга”

Хүн бүр өөрийн адал явдлыг туулж, өөрийн гэсэн, гайхалтай нэгэн ертөнцийг бүтээж байдгийг сэтгэлд шингэтэл ойлгуулах сайхан бүтээл. Энэхүү бүтээлийг хүмүүс төдийлөн мэддэггүй. Өсвөр насны хүүхэдтэйгээ хамт уншаад, ярилцаад үзээрэй.

4. Араатны хаан арслан-Lion King (1994)

Бага байхдаа “Араатны хаан арслан” хүүхэлдэйг үзэхэд хөөрхөн нэг арслангийн түүх л гэж санагддаг байсан ч байгаль дэлхий, түүний хоорондын уялдаа, тэнцвэрийг гайхалтай сайхан харуулсан бүтээл байжээ. Бас Макиавеллигийн “Хунтайж” номыг уншсаныхаа дараа уг хүүхэлдэйг үзвэл улс төр гэж юу байдгийг ч ойлгож болохоор бүтээл аж.

5. Тал нутгийн азарга- Spirit: Stallion of the Cimarron (2002)

Хүн төрөлхтөн 1970 онтой харьцуулахад байгаль орчноо 64% доройтуулсан тухай Дэлхийн байгаль хамгаалах сангийн тайлан саяхан гарсан. Уг бүтээлд хүн төрөлхтөн, амьд байгаль хоёрын шүтэлцээг харуулсан билээ.

6. Төмөр аварга биет- The Iron Giant (1999)

Дэлхий дахинд энх тайван орших ямар чухал вэ гэдгийг бодож, хүүхэдтэйгээ ярилцаж үзэх кино юм. Магад бид уран зөгнөл, бүтээлч сэтгэлгээгээ хүүхэд насандаа гээгээд үлдээсэн юм биш биз.

7. Чин зоригтон- Valiant Hearts (видео тоглоом)

Орчин үед хүүхдүүд видео тоглоом тоглохгүйгээр өснө гэж байхгүй биз. Харин ямар тоглоом тоглохыг нь аав ээжүүд чиглүүлж өгч болно. Энэ тоглоомыг тоглосноороо танай хүүхэд түүх сонирхож эхэлж ч мэднэ.

8. Гэрлийн хүүхэд-Child of Light (видео тоглоом)

Уран зураг, сонгодог хөгжим, ном зохиол гэдэг шиг тоглоом ч гэсэн урлаг болж хөгжжээ. Харин энэ тоглоомын үйл явдал, хөгжим, зураглал гээд бүгд таны болон танай хүүхдийн гоо зүйн мэдрэмжийг хөгжүүлэх болно.

9. Ори ба сохор ой- Ori and the blind forest (видео тоглоом)

Тоглоомоос ухаарал авч, адал явдал бас хайрыг мэдэрч болох болов уу. Энэхүү тоглоомыг хүүхэдтэйгээ хамт тоглож, туршиж үзэхийг зөвлөж байна.

10. Наоми Клайн- Шок номлол (2007)

Шинийг эрэлхийлж, сурч чаддаг байх нь XXI зуунд эзэмших чухал чадвар юм. Та эдийн засагч биш, улс төр сонирхдоггүй байж болно. Гэхдээ өөрийгөө эвдээд миний орчуулж, "Монсудар" хэвлэлийн газраас гаргасан "Шок Номлол" номыг уншаад үзэхэд илүүдэхгүй шүү. Хүүхэд ч гэсэн шинийг эрэлхийлдэг учир хүүхэддээ үлгэр дуурайлал болох үүднээс энэ номыг зөвлөж байна. 

-Манай булан оролцогчоороо дараагийн зочноо нэрлүүлэх хүсэлт тавьдаг. Та аль чиглэлийн, хэн гэдэг хүнийг санал болгох вэ?

-Дараагийн зочноор сэтгэл зүйч Г.Наранбаатарыг нэрлэж байна.