Яруу найрагч, орчуулагч А.Урантогос ээлжит орчуулгын номоо гаргажээ. Тодруулбал, тэрбээр  орчин үеийн хятад  уран зохиолын тэргүүн эгнээнд яригдах хүүрнэл зохиолчдын бүтээлээс орчуулан “С хот руу дөтлөн буй галт тэрэг” түүврийг гаргажээ.

   Тэрбээр өөрийн цахим хуудастаа шинэ орчуулгын номынхоо талаар “Орчуулга хийнэ гэдэг олон бэрх учиртай ч  давын түрүүнд эх зохиол, эх хэлний өмнө хариуцлага хүлээх явдал билээ. Хайр сэтгэлийн хиртэшгүй  ариун нандин, сохор хөгжимчний сод авьяас хийгээд  уй гансрал, гэр бүлийн хүчирхийллээс үүдсэн хүүхдийн сэтгэл санааны хямрал, айдас, тэжээвэр амьтан руу ойртсон зүй бус яргалал, эгэл жирийн ахуйг үлгэр домогтой сүлсэн бичиглэл, эмэгтэй зохиолч, эр хүний нүдээр хорвоог харж бичсэн зураглал, хүн оршуулахдаа хань мөнгөөр худалдан авч, нэг дор шороонд булдаг бурангуй ёс, ядуу цагаач ажилчдын талаар өгүүлсэн, бүтээлийг эндээс унших боломжтой” гэжээ. Тус бүтээлийн редактораар Т.Бямбасүрэн, хавтас шийдлээр Д.Жавхлан нар ажилласан байна.

    А.Урантогос нь өмнө нь “Гуравдугаар сарын байшин”, “Эрсийн зуун” зэрэг яруу найргийн ном, Мө Янийн “Мэлхий” романыг орчуулан уншигчдад хүргэсэн билээ.