Японы зүүн хэсэгт орсон аадар борооны улмаас Чиба мужид тогтоосон гамшгийн хамгийн өндөр буюу тавдугаар түвшний түгшүүрийг наймдугаар сарын 14-ний өглөө бууруулжээ. Гэсэн хэдий ч үер, хөрсний нуралтын аюул өндөр хэвээр байгааг орон нутгийн эрх баригчид анхааруулсан байна.Японы Цаг уурын агентлаг Чиба мужийн 22 захиргааны нэгжид зарласан тавдугаар түвшний түгшүүрийн 11-ийг гурав, дөрөвдүгээр түвшинд шилжүүлж, үлдсэн 11-ийнхийг цуцалжээ. Мөн зургаан хотод мөрдөж байсан хөрсний нуралтын онцгой анхааруулгыг бууруулсан байна.Наймдугаар сарын 13-ны оройноос эхэлсэн аадар борооны улмаас Чиба хотын Чуо дүүрэгт баасан гарагийн 09:40 цаг хүртэлх 12 цагийн хугацаанд 367 мм тунадас оржээ. Харин Кашива, Абико, Сакура зэрэг хотод нэг цагийн хугацаанд 100 мм-ээс давсан хур тунадас бүртгэгдсэн байна.

   Үер, хөрсний нуралтын улмаас Ичикава, Сакура, Ячиё хотод нийт найман хүн амиа алджээ. Мөн Чиба болон хөрш Ибараки мужийн 400 мянга гаруй иргэнийг нүүлгэн шилжүүлэх шийдвэр гаргасан байна.Чиба мужийн захирагчийн хүсэлтээр Өөрийгөө хамгаалах хүчнийг дайчилж, “JR Soga” өртөөнд гацсан 4,000 орчим зорчигчийг түр хоргодох байранд хүргэжээ. Түүнчлэн Токио чиглэлийн галт тэрэг, автобусны хөдөлгөөн саатсаны улмаас Нарита олон улсын нисэх онгоцны буудалд 7,000 орчим зорчигч хоножээ.Шуурганы үеэр 68 мянга орчим өрх цахилгаангүй болсон бөгөөд баасан гарагийн өглөөний байдлаар 25,270 өрх цахилгаангүй хэвээр байжээ. “JR East” компани мөн хэд хэдэн чиглэлийн галт тэрэгний хөдөлгөөнийг цуцалж, хязгаарлалт хийжээ.

   Түгшүүрийн түвшнийг бууруулсан хэдий ч Канто бүс нутаг болон Нагано, Яманаши мужид наймдугаар сарын 15-ны өглөө хүртэл цаг агаар тогтворгүй байхыг Цаг уурын байгууллагаас анхааруулжээ. Хөрсний чийгшил өндөр байгаа тул нам дор болон уулархаг бүсийн оршин суугчдыг хөрсний нуралт, гэнэтийн үер, гол мөрний усны түвшин нэмэгдэх эрсдэлээс сэрэмжтэй байхыг уриалсан байна.