• Өнөөдөр 2024-03-29

Хятад тансаг зэрэглэлийн зах зээлийн төв болж байна

2020-09-22,   702

Дундаж орлого, худалдан авах чадвар нь жилээс жилд дээшилж буй Хятад тансаг зэрэглэлийн бараа бүтээгдэхүүн, үйлчилгээний асар том тоглогч болж байгааг  “Бэйн-энд-Компани”-гаас (Bain&Company) хийсэн судалгаанаас харж болох нь. Өнгөрсөн 2018 оны байдлаар, Дундад улсын тансаг зэрэглэлийн барааны арилжаа  2017 оныхтой харьцуулахад  20 хувиар нэмэгдсэн байна. Тус судалгааны тайланд онцолсноор, энэ төрлийн бизнесийн хөгжил Хятадын хувьд өөрийн гэсэн онцлогтой байгаа юм. Европ, АНУ-ын зах зээлтэй харьцуулахад БНХАУ-д тансаг бүтээгдэхүүний чамгүй хувийг онлайнаар худалдан авч буй.

Онлайн худалдааны хамгийн том зах зээл болоод буй Хятадын хувьд энэ нь тийм ч хачирхмаар үзэгдэл биш. Нөгөө талаас,импортын барааны татвар, зарим нэр төрлийн барааны дотоодын үнийн зохицуулалтаас үүдэн  энэ төрлийн олон брэнд, компаниэх газарт бууриа засахаас аргагүйд хүрч байна. Бруно Ланнсын ахалсан дээрх судалгаанаас үзэхэд тансаг бараа, бүтээгдэхүүний худалдан авагчид Хятадын хувьд их залуу байгаа юм. Миллениалууд буюу шинэ мянганыхан, тодруулбал, 25-38 насны залуусын энэ зах зээлийн хэрэглэгчид. Өргөн хэрэглээний ч, тансаг зэрэглэлийн ч барааны зар сурталчилгаа голчлон залууст хандсан байдаг нь ч үүний нэг илрэл ажээ. Хятад залуусын чамгүй хувь нь эцэг эх, өвөө эмээгээс өвлөсөн тодорхой хэмжээний хөрөнгөтэй, байр сууцтайн зэрэгцээ тогтмол орлоготой учир тансаг, чамин эдлэл, хэрэглээнд гар татдаггүй хандлага бий болж байгааг судлаачид онцолж байна. 

Шинэ мянганы эхээс тансаг зэрэглэлийн брэндүүд Хятад руу хандаж, албан ёсоор дэлгүүрээ нээж, маркетингаа боловсруулж, зөвхөн хятадуудад зориулсан тусгай бүтээгдэхүүн гаргаж эхэлсэн билээ. Харин өдгөө  дэлхийн зах зээл дэх тансаг бараа, бүтээгдэхүүний 33 хувийг хятадууд худалдан авч байгаа бөгөөд одоогоос гурван жилийн өмнө эл үзүүлэлт 30 орчим хувьтай, 18 жилийн өмнө дөнгөж нэг хувьтай байсан юм. Эдийн засаг нь хөгжиж, иргэдийн хэрэглээ болоод сэтгэхүй өөрчлөгдөж, БНХАУ яг л Япон шиг тав тухтай, энгийн, минимал барааг сонгох нь түлхүү болно гэсэн таамгийг зарим судлаачид дэвшүүлж буй. Гэхдээ энэ нь тансаг зэрэглэлийн зах зээлд хамаарах эсэх нь одоогоор тодорхойгүй байна. 


Хятад тансаг зэрэглэлийн зах зээлийн төв болж байна
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188