БНӨСУ-д энхийг дэмжих ажиллагаанд үүрэг гүйцэтгэж байсан Монгол Улсын энхийг сахиулагч амиа алдсан харамсалтай хэрэг гарсан. Тодруулбал, өнгөрсөн 2020 оны зургадугаар сарын 2-нд энхийг сахиулагч Г нь өөрийгөө буудаж, амиа егүүтгэсэн юм. Талийгаач 44 настай байсан бөгөөд Дотоодын цэргийн 805 дугаар ангийн алба хаагч байжээ. Түүний цогцсыг өнгөрсөн оны наймдугаар сарын сүүлчээр Монголд авчирч, оршуулсан байдаг.

Энхийг сахиулагч яагаад амиа хорлосон бэ

Тухайн үед энхийг сахиулагч Г-г гэр бүлийн маргааны улмаас өөрийгөө буудсан байж болзошгүй гэх мэдээлэл гарч байлаа. Тэгвэл эх сурвалжийн мэдээлснээр талийгаачийн гэр бүлийнхэн өнгөрсөн оны тавдугаар сард Зэвсэгт хүчний жанжин штабын удирдлагуудад “Энхийг сахиулагчдын гар утсыг олгохгүй байна” гэсэн шалтгаанаар хэл ам гаргаснаас болж Г амиа егүүтгэсэн байж болзошгүй гэнэ.

Тэрээр сэтгэл санааны хямралаас болж, харуулын үүрэг гүйцэтгэх гэж байхдаа өөрийгөө буудаж, амиа алджээ. Талийгаач хэрэг гардаг өдөр өглөөний хоолны цагаар хамт үүрэг гүйцэтгэхээр харуулын байр руу гарах гэж байсан алба хаагчдад  “Та нар түрүүлээд явж бай. Би хоолондоо орохгүй” гэж хэлээд үлджээ. Төд удалгүй тэрээр өөрийгөө эрүүн дороосоо буудаж, амиа алдсан байна. 

Энхийг сахиулагчийн үхэлд Зэвсэгт хүчний Жанжин штабын удирдлагууд буруутай юу

Гэр бүлийнхэн нь хэл ам гаргаснаас болж Зэвсэгт хүчний жанжин штабаас БНӨСУ-д үүрэг гүйцэтгэж байсан IX ээлжийн цэргийн багийн захирагчид “Энхийг сахиулагч Г-д сахилгын шийтгэл оноо” гэсэн үүрэг өгсөн гэнэ. Хэрэг гарахын өмнөх өдөр талийгаач болон түүнтэй хамт үүрэг гүйцэтгэж байсан тасгийнхныг шийтгэсэн аж. Мөн хэдэн зуун цэргийн алба хаагчын нүдэн дээр талийгаач Г-тэй ёс бусаар харьцаж, сахилгын шийтгэл оноосноос болж, тэрээр сэтгэл санааны хямралд орж, амиа хорлосон байж болзошгүй нөхцөл байдал үүсжээ.

Энхийг сахиулагч Г-ийн үхэлтэй холбоотойгоор хэд хэдэн алба хаагчдыг шалгаж байна

Цэргийн багийн удирдлагуудын шийтгэлээс болж энхийг сахиулагч Г амиа егүүтгэсэн байж болзошгүй тул холбогдох албан тушаалтнуудыг хууль хяналтын байгууллагынхан шалгаж байгаа гэнэ. Тасгийн дарга, салаан орлогч, салааны дарга, ротын дарга, багийн захирагч гээд бүхий л албан тушаалтнуудыг өнгөрсөн оны арваннэгдүгээр сараас байцааж, шалгаж байгаа талаар эх сурвалж мэдээллээ.

Талийгаачийн гэрийнхэн хэргийг олон улсын шүүхээр шийдүүлэх хүсэлт гаргасан гэв

Эл харамсалтай хэргийн талаар талийгаачийн дүү анх цахим хуудастаа бичсэнээр олон нийтэд ил болсон байдаг. Харин холбогдох албаныхан “Хэрэг болсон нь үнэн. Өөрөөр мэдээлэл өгөх боломжгүй” хэмээн хэргийг ихэд нууцалж байлаа. Талийгаачийн ойрын эх сурвалжийн мэдээлснээр талийгаачийн ар гэрийнхэн хэргийг олон улсын шүүхээр шийдүүлэх хүсэлтээ гаргаад байгаа гэнэ.

Удирдах албан тушаалтнуудынхаа буруутай үйл ажиллагаанаас болж амиа егүүтгэсэн байж болзошгүй энхийг сахиулагчийн хэргийг албаныхан одоо ч ихэд нууцалсан хэвээр байна.