Тарж бутарсан Ардчилсан намыг эв зүйгээ олчихоосой гэж хүсэгчид олон байна. Тэр тусмаа Ардчилсан намыг олон жил итгэл үнэмшлээрээ дагаж, дэмжиж ирсэн гишүүд дэмжигчид нь хүлээлт ихтэй байгаа нь илт. Дан ганц тус намын дэмжигчид төдийгүй монголын ард түмэн нийтээрээ чих тавин хүлээж байлаа. Нэг ёсондоо монголын улс төрд сөрөг хүчний орон зай алхам дутамдаа үгүйлэгдэж байгаа нь эндээс харагдаж байна. Энэ нь ч өчигдрийн ҮБХ-ны хурлаас тодорхой л харагдаж байна. Өөрөөр хэлбэл гурван жилийн хугацаанд даргагүй, толгойгүй явсан тэд хэдхэн сарын өмнө Л.Гантөмөрөөр даргалуулснаар хэдэн тийш харсан толгой нь нэг чигтэй болсон. Харин өчигдөр Л.Гантөмөр ирэх сонгуульд хүчин зүтгэх багаа хэрхэн бүрдүүлэх вэ гэдгийг нь чих тавин анхааралтай ажиглаж харагдана лээ. Ардчилсан нам өнгөрсөн 30 жилийн хугацаанд ямар замналаар хөгжиж ирсэн яг түүнийхээ гороор өнөөдөр хоёрдогч хүчний байр сууриа алдахад хүрээд буй. Өөрөөр хэлбэл, олон намын нэгдэл дээр тогтож байгаа АН-д чанга гар л хэрэгтэй гэдэг нь тодорхой боллоо.

       Нөгөө талаараа олон фракцын эрх ашгийг хангахгүй бол намын үйл ажилгаагааг нөгөө нь эсэргүүцэж, хойш суусаар тарамдуулж орхиж байгаа нь тодорхой харагдаж байна. Өчигдөрийн ҮБХ-ны хуралдаанаас харахад АН-ын байр байдал алган дээр тавьсан өндөг шиг л байна. Ухаандаа буруу хазгай гишгэж, илүү үйлдэл хийвэл хэзээ ч хагарч магадгүй тийм эмзэг байна. Тиймдээ ч өчигдрийн ҮБХ-ны хурал дуулиан шуугиантай эхэлж, өнгөөрсөн хугацаанд зүй орох зайгүй нөхөрлөж ирсэн залуу боловсон хүчнүүд фракцуудын үзэл хандлагаасаа болж нэгнээ үзэж чадахаа байтлаа түнжин хагарсан явдал ч харагдаж байна лээ, АН-ын дотоод уур амьсгалаас. Харин өчигдөр ҮБХ-ны хурлаар гишүүд нь нэгдэж, дүрмээ тогтож, намын дарга дэд болон тэргүүн дэд дарга нараа томиллоо.

      Л.Гантөмөр дарга ёстой л эхийг нь эцээж, тугалыг тураахгүй гэсэн шиг алтан дундаж шийдвэр гаргав. Тодруулбал өчигдөрийн ҮБХ-ны хуралдаанаар дотоод бүтэц бүрэлдэхүүнээ тодорхойлж, нийт 15 дэд дарга, нэг Тэргүүн дэд дарга томилсноор АН-ын хагарал хэсэгтэй намжих нь. Ингэж хэлсэн нь учиртай. Тэд өчигдөр энэ хэмжээний олон дарга томилсон нь өнгөрсөн удаад намаа туйлдуулсан бүх фракцуудын эрх ашгийг хангаж, дэд даргаар Ерөнхий сайд асан Р.Амаржаргал, намын Ерөнхий нарийн бичгийн дарга асан Ч.Өнөрбаяр, Мэдээлэл, шуудан, харилцаа холбоо, технологийн газрын дарга асан Ц.Жадамба, АН-ын ҮБХ-ны гишүүн Ж.Баярмаа, НДЕГ-ын дарга асан Ц.Уртнасан, АН-ын дэд дарга асан Р.Эрдэнэбүрэн, СХД-ийн ИТХ дахь АН-ын бүлгийн дарга асан П.Галиндэв, УИХ-ын гишүүн асан Ш.Түвдэндорж, хуульч О.Алтангэрэл, АН-ын  Ерөнхий нарийн бичгийн дарга  асан И.Мөнхжаргал, Ш.Жандос, н.Бүрэнжаргал, Т.Пүрэвхатан, П.Батчимэг, н.Буяндэлгэр, АН-ын ажлын албаны дарга Э.Одбаяр нарыг томилов. Харин эцэст нь Сангийн сайд С.Баярцогтыг хажуудаа авснаар өөрийнхөө орон зайг ч тодорхойлоод авав.

     Нэг үеэ бодвол АН ингээд ч болов шүүрэн шанага шиг болсон намынхаа хоосон орон зайг нөхөх цаг нь болжээ. За яах вэ намын дэд даргаар хэдэн хүнийг хэнийг томилох нь энэ удаагийн хурлын гол сэдэв биш. Харин  Ардчисан намын генсекээр хэнийг томилж, ирэх сонгуулийн өнгийг тодорхойлох вэ гэдэг хүлээлт олны дунд үүссэн байв. Өөрөөр хэлбэл, Л.Гантөмөр ирэх сонгуульд хэнтэй хоршиж, намын имижээ бүрдүүлэх вэ гэдэг нь олны анхааралд байсан. Харамсалтай нь, өчигдрийн хуралдаанаар намын ерөнхий нарийн бичгээ тодруулж амжсангүй. Нэг ёсондоо хурал эхлүүлэх гэж дуулиан тарьсны ццаад учир энэ болж мэдэхээр байна. Анхнаасаа ҮБХ-гоо хуралдуулахаар тов зарлахдаа Ардчилсан намынхан генсек тодруулах зорилгогүй байсан байж мэдэх нь. Өөрөөр хэлбэл, фракцын зодооноо дийлэхгүй байгаа тэд ерөнхий нарийн бичгийн даргаар хэн нэгнийг нэрлэх л юм бол арай хийж нэгтгэсэн намаа дахин тарааж мэдэх нөхцөл байдалд хүрээд буцсан байхыг үгүйсгэхээргүй байна.

    Ардчилсан нам ерөнхий нарийн бичгээ томиллоо гэхэд Ардын намтай энэ дүйцэхүйц  харьцуулагдах хэмжээний боловсон хүчин томилох нь юу юунаас илүү чухал байв. Харин фракцууддаа бойкотлуулсан АН-ын дарга эцэстээ генсекгүй сонгуульд орох охироонд хүрч, дэд дарга нартайгаа хамтарч ажиллахаас өөр аргагүйдэв бололтой.

    Эцсийн дүндээ АН учраа олж, даргатай болоход МАН-ын дэмжлэгийг авсан нь ч нууц биш. Харин хэсэг хугацаанд олны анхаарлаас холдоод байсан АН энэ намар амь орж, орохдоо МАН-д хариугаа барих даалгавараа биелүүлнэ. Ирэх сонгуульд Ардчилсан намын суудлын тоог хоёр дахин нэмэгдүүлэх амлалт МАН сөрөг хүчинд тавьж, Үндэн хуулийг дэмжүүлсэн. Хоёр дахин суудлын тоогоо нэмээд ч АН ирэх сонгуулийн дараа олонх болох нь битгий хэл сөрөг хүчний үүрэг гүйцэтгэх хэмжээнд ч хүрч чадахааргүй байгаа. Ардчилсан нам үндсэндээ ирэх сонгуульд МАН найруулсан улс төрийн тоглолтоор оролцох нь. Ардчилсан нам тэр чигтэй МАН-ын сонгуулийн штаб болох уу, үгүй юү гэдэг том босгон дээр тулаад ирчихлээ дээ.