Өнгөрсөн 30 жилийн хугацаад МАН-ын үе үеийн удирдагч нар нэг л замаар, нэгдсэн технологиор ажиллаж, парламентад олонх болж, Засгийн газрыг тэргүүлж ирсэн. Харин энэ жил Үндсэн хуульд өөрчлөлт оруулж, сонгуулийн холимог системийг сонгосон Л.Оюун-Эрдэнийн Засгийн газар намын бүтцээ ч, сонгуулийн төлөвлөгөөгөө ч шинээр зурж эхэллээ.

   2012 онд МАН сонуулийн холимог системийг сонгож, сонгуульд оролцож, АН-д ялагдаж, эвслийн Засгийн газар байгуулж байсан түүхтэй. Харин энэ удаад түүхээ давтахгүй үнэмлэхүй ялалт байгуулна гэсэн төлөвлөгөөг МАН-ын 80-аад оныхон гаргачихсан сонгуулийн хар зургаа зурж суугаа сурагтай.

     Өнгөрсөн хугацаанд улс төрд өрнөсөн дуулиантай асуудал бүхэн ирэх сонгуулийн бэлтгэл ажил байв. Өөрөөр хэлбэл, Л.Оюун-Эрдэнэ Ерөнхий сайд болмогцоо л Үндсэн хуульд гар хүрч, өөрийн хүчээр, шинэ арга барилаар сонгуульд оролцох хүсэлтээ явсан нв тодорхой. Харин хоёр жил орчим хугацаанд энэ хүслээ ил далдаар хэдэнтэй илэрхийлж байсан бол цаг хугацааны тохироо нь өдийд бүрдэж, байна гэсэн үг.

     Хэдийгээр Л.Оюун-Эрдэнэ Засгийн газрыг тэргүүлж, гол намын бодлогыг гартаа авсан мэтээр харагдаж ирсэн ч ах нарынхаа удирдлага, бодлогоос хазайж чадахгүй, яг л тэдний гарсан жимээр урагшилж байв. Засгийн газрын танхимаа бүрдүүлэхдээ ч тэр ах нарынхаа шантаажид орж, бүлэглэлийн гишүүдээс багтаахгүй бол дөнгөж, тогтворжсон суудал нь цагийн аясаар ганхаж, хүчгүйдэж, өөрийнхөө хүссэнээр Засгийн газрын бодлогоо тодорхойлж чадахгүй явсаар ирсэн нь нууц биш.

     Харин байр сууриа баттгахын хэрээр тэрбээр ах нарынхаа гаргасан “зам”-ыг эвдэж, шинэ технологиор ажиллаж эхэлсэн гээд хэлчихэд болно. Өөрөөр хэлбэл, өнгөрсөн 30 жилийн хугацаанд ах нарынхаа эхлүүлсэн намаа ялалтад хүргэхэд гол санхүүжилтээ босгодог байсан хэргүүдийг өөрөө задлаад ард түмнээр алга ташуулах ажил руу орсон гэсэн үг. Хөгжлийн банк, нүүрсний хулгай, сангуудыг тоносон хэргүүдийг тэр бүгдийг илчилж, 30 жилийн хугацаанд төрийн эрхийг атгаж байсан ах нараа тэрчигт нь улс төрөөс явуулах бодлого барьж, өнөөдөр санасандаа хүрэхэд нэг алхамын ард ирчихээд сууж байна.

       Өөрөөр хэлбэл, Хөгжлийн банк, нүүрсний хулгай, сангуудыг тоносон, газрын наймаа хийсэн улстөрчдийг ард түмний өмнө нээлттэй зарласнаар тэдний улс төрд дахин нэр дэвших эрхийг нь бүр мөсөн хассанаас ялгаагүй болов. Ингэж тойргуудоо сулалсан тэрбээр багийнхаа гишүүдийг хуваарилах ажилд орчихсон завгүй суугаа гэх нь ч бий.

     Ерөнхий сайд болсноосоо хойших хугацаанд Л.Оюун-Эрдэнэ багаа бүрдүүлэх ажлаа аажим аажмаар алсын бодлогоор явуулж эхэлсэн гээд хэлчихэд хол зөрөхгүй. Өөрөөр хэлбэл, тэр Засгийн газрын танхимаа бүрдүүлэхдээ шууд өөрийн багийн гишүүдээ хажуудаа аваад ажиллах боломжгүй байв. Өөрийнхөө санасан хэмжээнд хүртэл эрх мэдэлд хүрч чадаагүй тэрбээр багийнхаа гишүүдийг хажуудаа авчихвал багаараа унаж, дахин улс төрд хөл тавих тэнхэлгүй болтлоо уруудах байв. Тиймээс бага, дунд шатнаас нь өөрийн хүмүүсээ ажиллуулж, олонд танилцуулах ажлыг аажим аажмаар явуулсаар ирсэн. Ингэхдээ аймгийн Засаг даргын суудлаас эхлээд л дэд сайдын албанд залуу улстөрчдийг татан оруулж, барууны боловсролтой гэгдэх зөвлөхүүдээ төрийн албаны бичиг цаастай танилцуулах ажилд мэр сэр бэлдэж эхэлсэн.

    Өөрөөр хэлбэл, аймаг, дүүргийн Засаг даргын албанд дугаарлаад хүлээж байдаг ахмад гишүүдийнхээ урдуур хэд хэдэн залуу гишүүн томилсны нэг нь яах аргагүй Ховд аймгийн Засаг дарга Х.Болормаа юм. Түүнчлэн ХХААХҮ-ийн дэд сайдад 90-ээд оны цэл залуухан сайд томилсон удаатай. Хөдөө аж ахуйн салбарын бодлого тодорхойлох хариуцлагатай албанд М.Ганхүлэгийг суга крандаж, томчуудынхаа өмнүүр оруулж том албанд томилсон нь хэсэгтээ дуулиан дагуулж байлаа.

    Дараагийн сонгуульд Ерөнхий сайдын багтаа заавал багтааж, нэр дэвшүүлэх хүнээр  Соёлын сайд Ч.Номин, дэд сайд М.Батбаяр нар багтаад буй. Мөн Хууль зүй дотоод хэргийн дэд сайд Б.Солонгоо, Уул уурхай хүнд үйлдвэрийн дэд сайд О.Батнайрамдал, Цахим харилцаа холбооны дэд сайд Ж.Эрхэмбаатар нарын улстөрчид Л.Оюун-Эрдэнийн багт багтахаар жагсаж байна. Мөн Эрдэнэс Тавантолгой ХХК-ийн БЭТ Ж.Ганбат, Хууль зүй, дотоод хэргийн яамны Төрийн нарийн бичгийн дарга П.Сайнзориг нар тэдний араас жагсаж байна.

    Ерөнхий сайд Л.Оюун-Эрдэнэ шинэ 30 жилийн түүхийг эхлүүлнэ гэж Үндсэн хуульд өөрчлөлт оруулж, бодлогоо боловсруулж эхэлсэн. Ирэх сонгуулиар МАН залуу гишүүдээр “хүч” сэлбэж, Л.Оюун-эрдэнэ багаа бүрдүүлэх нь тодорхой боллоо.