Элчин сайд О.Лхагвасүрэн Турк Улсын Соёл, аялал жуулчлалын сайд Нури Эрсойтой танилцах уулзалт хийжээ. Монгол, Турк хоёр улсын соёл, аялал жуулчлалын салбарын хамтын ажиллагааны талаар санал солилцсон байна. Уулзалтын үеэр хамтарсан үзэсгэлэн, урлаг, соёлын арга хэмжээ зохион байгуулах, мөн хоёр улсын соёлын фестивалиудад харилцан оролцох зэргээр соёлын салбарын хамтын ажиллагааг өргөжүүлэх боломжтой талаар хэлэлцжээ. Түүнчлэн аялал жуулчлалын салбар нь хоёр талын худалдаа, эдийн засгийн харилцаанд чухал хувь нэмэр оруулж буйг онцлон тэмдэглэж, харилцан жуулчдын тоог нэмэгдүүлэх чиглэлд хамтын ажиллагааг эрчимжүүлэх нь зүйтэй гэсэн байр суурийг харилцан илэрхийлсэн байна.