Монгол Улсаас Бүгд Найрамдах Сингапур Улсад суугаа Онц бөгөөд Бүрэн эрхт Элчин сайд Г.Уянга Сингапурын Эрүүл мэндийн сайд Онг Е Кунтай уулзаж, хоёр улсын эрүүл мэндийн салбарын хамтын ажиллагааг өргөжүүлэн хөгжүүлэх боломжийн талаар санал солилцсон байна. Элчин сайд Г.Уянга “Темасек сан”-гийн дэмжлэгээр Монголын сувилагч, эрүүл мэндийн мэргэжилтнүүдийг Сингапурт сургалтад хамруулсан нь үр өгөөжтэй болсныг тэмдэглэн, талархал илэрхийжээ. Тэрбээр энэхүү туршлагад тулгуурлан нийгмийн эрүүл мэнд, халдварт өвчний хяналт, сэргийлэлт болон эрүүл мэндийн байгууллагын чадавхыг бэхжүүлэх чиглэлээр хамтын ажиллагааг үргэлжлүүлэх сонирхолтой байгааг илэрхийлсэн байна.

    Сайд Онг Е Кун Сингапур Улс Халдварт өвчний агентлагийг (Communicable Diseases Agency — CDA) шинээр байгуулсан талаар танилцуулж, эрүүл мэндийн мэргэжилтнүүдийг бэлтгэх, туршлага солилцох боломжийг судалж үзэхэд бэлэн байгаагаа илэрхийлэв. Талууд мөн “COVID-19” цар тахлын үеийн сургамж болон ирээдүйд үүсэж болзошгүй эрүүл мэндийн онцгой нөхцөл байдалд бэлтгэлтэй байх шаардлагын талаар ярилцжээ. Уулзалтын үеэр хоёр улсын иргэдийн харилцаа, шууд нислэг, аялал жуулчлалыг хөгжүүлэх боломжийн талаар санал солилцож, Элчин сайд Г.Уянга Сайд Онг Е Куныг Монгол Улсад зочлохыг урьжээ.