Эрдэмтэд саяхан Хятадын Ниншягийн Иньчуань хотын Хэланьшаний хадны зургийг дахин шалгах үеэр “дөрвөн морь хөлгөлсөн тэрэг”-ийг дүрсэлсэн ховор зургийг илрүүлжээ. Ийм дүрслэл Хэланьшаний хадны зургаас анх удаа олдож байгаа юм байна. Шинээр илрүүлсэн хадны зураг нь 24х20 сантиметр хэмжээтэй, цохиж сийлэх аргаар бүтээгдсэн бөгөөд сийлбэрийн мөрний гүн 1.5 миллиметр байна.

     Морь хөлгөлсөн тэрэг дүрсэлсэн хадны зураг тус бүс нутагт 20 хүрэхгүй байдаг бөгөөд өмнө нь илрүүлсэн зургууд бүгд хоёр морь хөлгөлсөн тэргийг дүрсэлсэн байжээ. Харин дөрвөн морь хөлгөлсөн тэрэгний хадны зураг өмнө нь Төв Ази, Монгол Улс, Өмнөд Сибирь болон Хятадын Шиньжян, Өвөр Монгол зэрэг газраас л илэрч байсан аж.

     Хэланьшань уулсын зүүн бэлийн төв хэсэгт орших хадны зургийн хамгаалалтын бүс нь тус уулсын хадны зураг хамгийн олноор төвлөрсөн нутаг юм. Энд 6000 орчим хадны зураг байдгаас 700 гаруй нь хүний нүүрний дүрслэлтэй. Хүний нүүр, амьтан, ургамал, огторгуйн биет, төрөл бүрийн тэмдэг дүрс зэрэг өргөн сэдвийг хамарсан эдгээр зурагт эртний хүмүүсийн ан агнуур, мал маллагаа, тахилга шүтлэг зэрэг амьдралын дүр төрхийг тэмдэглэн үлдээжээ.

Эх сурвалж: “Анд” студи.