Нүүдлийн соёл иргэншлийг судлах олон улсын хүрээлэнгийн Эрдмийн зөвлөлийн гишүүн, ИБУИНХУ-ын иргэн, “Кембриж”-ийн их сургуулийн профессор Дэвид Андрюс Снийт Монгол Улсын төрийн дээд шагнал “Алтан гадас” одонгоор шагнагдлаа. Монгол Улсын Ерөнхийлөгч Ухнаагийн Хүрэлсүх зарлиг гарган, Монгол судлалыг олон улсад хөгжүүлэх, түгээн дэлгэрүүлэх, Монголын түүх, хэл, соёл, өв уламжлалыг дэлхий нийтэд сурталчлан таниулах үйлсэд онцгой хувь нэмэр оруулж буй эрдэмтэн, судлаачдыг төрийн дээд цол, одон, медалиар шагнасан юм.

     Профессор Дэвид Андрюс Снийт нь Монголын нийгэм, түүх, нүүдлийн соёл, мал аж ахуйн талаарх олон жилийн судалгаагаараа Монгол судлалын хөгжилд үнэтэй хувь нэмэр оруулж ирсэн нэр хүндтэй эрдэмтэн билээ. Нүүдлийн соёл иргэншлийг судлах олон улсын хүрээлэнгийн хамт олон болон Монгол судлалын салбарын эрдэмтэн, судлаачдын нэрийн өмнөөс профессор Дэвид Андрюс Снийтэд энэхүү нэр хүндтэй шагнал хүртсэнд нь халуун баяр хүргэж, цаашдын эрдэм шинжилгээ, судалгааны ажилд нь өндөр амжилт, бүтээл арвин байхыг хүсэн ерөөе.