АНУ-ын Нью-Йорк хотод есдүгээр сарын 15-нд НҮБ-ын Ерөнхий ассамблейн 75-дугаар чуулган эхэллээ. НҮБ-ын 75 жилийн ойтой давхцаж буй энэхүү чуулганаар хүн төрөлхтөнд тулгамдаж буй цар тахал, байгаль орчны асуудал, боловсрол, эрүүл мэндийн салбарыг онцолж байгаа бөгөөд дээд хэмжээний хэд хэдэн уулзалтыг зохион байгуулахаар товлосныг Ерөнхий нарийн бичгийн дарга Антониу Гутерреш онцоллоо. Ерөнхий ассамблейн 75-дугаар чуулганыг Туркийн дипломатчВолкан Бозкыр тэргүүлж байна. Чуулганд  улс орнуудын удирдагчдын илгээсэн видео илтгэлүүдээс онцлох эшлэлүүдийг хүргэж байна. 

Антониу Гутерриш /НҮБ-ын Ерөнхий нарийн бичгийн дарга/

…Дэлхийн уур амьсгал өөрчлөгдөж, биологийн төрөл зүйлийн мөхөн, ядуурал, авлига, тэгш бус байдал гаарч, улс орнуудын дунд геополитикийн сөргөлдөөн нэмэгдэн, дэлхий нийтийг хамарсан цар тахал гарч буй нь хүн төрөлхтөн бидний нийтлэг, тулгамдсан асуудлууд болж байна. Хэдий ийм олон нийтлэг асуудал бий ч нийтлэг, хамтын шийдэл бидэнд цөөн. Дээр дурдсан асуудлуудыг шийдэхийн тулд  хамтын ажиллагаа, дэмжлэг, харилцан туршлага солилцох, нэгдэх шаардлага бидэнд зайлшгүй гарч ирж буй.  НҮБ дэлхий ертөнцийг сайн, сайхан болгон өөрчилнө гэж хүн төрөлхтөн итгэсээр байна. Тулгамдсан асуудлуудыг шийдэх, нэгдэх нь НҮБ-ын гишүүн ард түмнүүдийн өмнө хүлээсэн бидний үүрэг. Энхийг сахиулагчид, дипломатчид, хүмүүнлэгийн зүтгэлтнүүд, хүн төрөлхтний үнэт зүйлсийн төлөө амь насаа зориулсан бүхний өмнө бидний хүлээж буй үүрэг.

Дональд Трамп /АНУ-ын Ерөнхийлөгч/

... Хятадын эрх баригчид болон ерөнхий утгаараа Бээжингийн хяналтад байгаа ДЭМБ коронавирусийн халдвар хүнээс хүнд халдварлахгүй гэж мэдэгдсэн. Дараа нь шинж тэмдэггүй халдвар тээгчээс вирус халдахгүй гэж мөн л ташаа мэдээлэл гаргасан. Бээжингийн энэ үйлдэлд нь хариуцлага тооцох ёстой. Мөн Хятад Улс далай тэнгисийг хог хаягдлаар бохирдуулж, байгаль орчинд их хэмжээний хохирол учруулдаг.
НҮБ дэлхий нийтэд тулгамдаж буй терроризм, эмэгтэйчүүдийн эрх зөрчигдөж байгаа, хөдөлмөрийн мөлжлөг, мансууруулах бодисын хууль бус эргэлт зэрэг бодит асуудлуудыг шийдвэрлэхэд анхаарлаа хандуулах ёстой. 

Ангела Меркель /ХБНГУ-ын Канцлер/

... НҮБ хөгжихийн тулд өөрчлөгдөх ёстой. Тулгамдсан асуудлыг шийдэх үед НҮБ-ын Аюулгүйн зөвлөл дорвитой шийдвэр гаргаж чадахгүй үе цөөнгүй. Гишүүн орнуудын ашиг сонирхол тэнд үйлчлэх нь бий. Гишүүн орнууд нь нэгдэж, хамтран ажиллаж байж НҮБ-ын үнэт зүйл оршин тогтнож, үйл ажиллагаа нь хэвийн явах болно. XXI зуунд дэлхийг хамарсан асуудлыг шийдэхийн тулд НҮБ-д реформ хийх шаардлагатай.

Ши Жиньпин /БНХАУ-ын дарга/

...Хүн төрөлхтөн хамтдаа бүтээн байгуулж, хуваалцах зарчмаар тэгш боломжийг бий болгох, сорилтыг даван туулах, энх тайванчаар хөгжих нь зүй. Улс орнуудын хооронд зөрчил маргаан гарч болно. Гэхдээ зөрчлийг зүй зохистой шийдвэрлэх  хэрэгтэй. Улс орнууд хоорондоо  өрсөлдөж болно, гэхдээ энэ нь эерэг бөгөөд хор хөнөөлгүй байх ёстой. 

Владимир Путин /ОХУ-ын Ерөнхийлөгч/

... Коронавирусийн эсрэг вакциныг дэлхийн бүх улсын ард иргэдэд олгох боломжийг бий болгохын тулд эм үйлдвэрлэлийн салбарын бүх л хүчин чадлыг одоо ашиглах хэрэгтэй. ОХУ вакцинаа НҮБ-ын ажилтан, сайн дурынханд олгоход бэлэн.