Хүн чанартай, хүнлэг сэтгэлтэй, хүнийг хайрлаж буй дүр бүхэнд хайртай. Тийм сайхан дүрүүдийг удаан тээж явах сан гэж ч боддог. Хамгийн сүүлд үзсэн "Хувь заяа" киноны дүрүүд одоо ч сэтгэлийн "хэц" дээр "өлгөөтэй" байна. Тэр дундаа МУГЖ П.Эрдэнэзааны тоглосон Пунцагийн дүр. Аавынхаа нэртэй ижил энэ дүрд тэр эгэл жирийн эцэг, нуруутай эр хүнийг бүтээжээ. "Хайр, харуусал" кинонд тэр хайрын үнэ цэн, мөн чанарыг хожимдож ойлгосон бол "Хувь заяа" кинонд амжиж гарыг нь атган, учир байдлыг нь асууж, уучилж ойлгоод хайрлаж байна. Заанаа жүжигчнийг бид хошин урлагийн тайзнаа бүтээсэн олон сайхан дүрээр нь илүүтэй мэднэ. Онцолж санаанд орж буй нь "Хэн хэрэлдэв. Хэн ч хэрэлдээгүй байна" гээд хүүхэлдэйтэй яриад байдаг "Маск" продакшны нэгэн номер байдаг даа. Мөн "Дорноговь симба” хамтлагийн үстэй малгайтай хөгжим тоглоод дуулдаг хэсэг гээд олон тоглолтуудад тэр оройлон дүр бүтээдэг. 1994 оноос тайзнаа гарч, 2006 онд Ж.Мөнхсайхан, Б.Баярмагнай нартай хамтран "Маск" продакшныг байгуулжээ.

     Тайзнаас гадна дэлгэцнээ "Single Ladies", “Соёлын довтолгоо", "Тавилан" зэрэг кинонд дүр бүтээсэн. Ингэж даруухан урдах ажлаа чадварлаг хийж, үзэгчдийг инээлгэх санаа, уран бүтээлийн эрэлд он жилүүдийг зориулсан тэрбээр хоёр жилийн өмнө "Гэм зэм" постдрамын Семен Захарович Мармеладовын дүрээр мөн үзэгчидтэйгээ уулзсан. Цагтаа хэргэм зэрэгтэй түшмэл явсан Мармеладов охиныхоо биеэ үнэлж олсон мөнгөөр амьдралынхаа сүүлчийн хундагатай архийг сөгнөнө. Амьдрал тэрхэн мөчид хэчнээн муухай зүйл болохыг мэдэрсэн тэр үсэрч, цовхчиж, салганан орилно. Архинд хэдийнэ өөрийгөө мэдүүлж, амьдрал утгагүй санагдсан хүнээс гарах мэдрэмжүүд. Болдог бол архинд амьдралаа өгсөн хүмүүсийг цөмийг нь цуглуулж байгаад Мармеладовын тэр хэсгийг үзүүлж, өөрсдийг нь тольдуулмаар санагдтал тэр дүрээ тулгасан. Үргэлж л инээдтэй шог байдлаар нь бидэнтэй ойр түүнээс тэс өөр дүр гарцаагүй тэр байв. Эндээс л Монголын урлагийн П.Эрдэнэзаан гэх жүжигчин өөрийнхөө бяр тэнхээг бүрнээ харуулж, ирэн дээрээ яваагаа мэдрүүлсэн. Тэр анх урлагт орж байсан тухайгаа "Би Увс аймгийн Улаангом хотын арван жилийг төгссөн. Багадаа жүжигчин болно гэж бодож байсангүй. Зураг зурах маш их сонирхолтой. Уран зургийн нэлээд тэмцээн уралдаанд түрүүлээд, Орост үзэсгэлэн гаргаж байлаа. Намайг наймдугаар ангид байхад Дүрслэх урлагийн дунд сургуульд орооч гэсэн урилга ирж байсан. Тэр үед наймдугаар ангийн хүү гэрээсээ хол явна гэхээр сэтгэлд багтахгүй байлаа. Ерөнхийдөө сурлагатай хүүхэд байсан.